E toe fa’atalofa atu i le aufaitau i lenei aso, faamoemoe sa outou maua se vaiaso manuia i feau ma tiute masani, ae alo mai loa, o le toe sosooina lenei o le tatou talafaasolo lea na gata mai i le vaiaso na te’a nei i le taimi lea na fa’ailoa ai e le tuagane laititi a Tania i lona tina le la talanoaga ma Veli.

Ua le iloga se ituaiga fa’amatalaga na mapuna a’e i le gutu o le olomatua i le aoauli lea i le ita tele, ona o lea fa’atoa malamalama lona mafaufau i le mea o lo o tupu i le aiga o Tania ma le tamaloa o Veli lea ua maua tala ua teva ese ma le latou aiga. E lei avea le manaia o kuka o le aso Sa ma itu na taofia ai le ote leotele o le olomatua, ma ua faigofie ai foi ona mateia e aiga tuaoi le faafitauli o lo o tula’i mai i le aiga. Ua leai ma se isi o le aiga e toe ‘ai i le taimi nei, e o o i nai tamaiti laiti, ua na o le fa’atali’oli’o i luga o le laulau ma faataupupula le isi i le tasi po o ai e muamua tago i lana sipuni ma asu lana ipu meaai. Na fa’afuase’i ona motu le ote a le olomatua ina ua ia vaaia le tamaloa o Liko lea e nonofo ma lona aiga i le isi pitonuu o Palisi ua savali aga’i atu i le latou fale e le masani ai. “Liko, susu maia i fale gei ..” e fai lava tala a le olomatua ma tatope atu ana faatonuga i lana fanau e tapena ese mea o lo o i totonu o le fale ae avane se nofoa ia Liko.

“Mama, e ko’akele isi kamaloloa o lo o kuku mai kua i le umukuka ...” o le tala oso atu lea a le isi tama teine laititi a le olomatua na mafua ai ona falo le ua o le olomatua i fafo o le fa’amalama ma ia fa’amaonia ai le tala a si ana tama, ma o iina na amata ai loa ona oso masalosaloga o le olomatua, e i ai se mea o lo o tupu fua i le ulufale o Liko i lo latou fale ae le masani ai. “Fa’amalulu aku ia ke oe le kiga makua i le fa’alavelave mai ae o lo o feagai ma le ko’oga’i o le Sapaki .....” o le fa’alalolalo lea a Liko i le olomatua ma amata loa ona tau fa’a’ilo le mafua’aga o lona o o atu ma ni isi o lana fanau o lo o i fafo, ona o le latou ma’umaga sa gaoi e le tagata i le afiafi po lava o le aso To’ona’i na te’a, ae o lea ua manino i molimau o le latou tamaloa o Veli na faia le faia, “A e o le iku e piko sili oga kiga ai o makou loko, se’i gaoi fo’i ga o le ma’umaga oga lava lea, ae le gaka i le gaoi o le ma’umaga ae koe kakipi uma i lalo ma le koga ka’amu giukini a la’u fagau lea ua fa’amoemoe e ave i le fa’aaliga a le Ofisa o Fa’akoaga i le masiga fou, ae o le koga ka’amu ua maualalo ai lau fagau gale e fepulafi mai fela ...” o upu ia na tautala i ai le tamaloa o Liko ma le ita o lona loto, ma ia talosagaina ai loa le olomatua e avatu Veli sei o latou talanoa i fafo pe aisea na ia faia ai lenei mea. Na pei e fofo’e fa’a pa’u fa’i ese atu le ita o le olomatua sa i ai ina ua taia lana fa’alogo i le fa’amatalaga a Liko, ma ua galo nimo ai isi upu mamafa na lafo atu e le tamaloa isi ana fanau, ae pau upu o lo o taofi i le loto o le olomatua o Veli na gaoia le ma’umaga, e fetaui lava le fa’aifo i lalo o le fa’amatalaga a Liko ae maona a’e loa i luga ma le tagi masusu a le fafine o Tania.