E toe fa’atalofa atu i le aufaitau i lenei aso, faamoemoe sa outou maua se vaiaso manuia i feau ma tiute masani, ae alo mai loa, o le toe sosooina lenei o le tatou talafaasolo lea na gata mai i le vaiaso na te’a nei i le taimi lea ua taunu’u ai Tania i le falema’i e asi si ona to’alua o Veli.

Na te’i le teine tausi ma’i i le fesili a Tania, e aunoa ma sona iloa e fai se to’alua o le ali’i o lo o tigaina i totonu o le potu, ae na avea le fa’atau pupula o le teine tausi ma’i ia Tania ma lana fesili na toe oso atu ai le isi fesili fia iloa a le fafine, “Se fa’amolemole lau susuga a le teine foma’i, pe i ai se mea ua tupu isi ota to’alua ua e le gagana mai ai, o a mai Veli fa’amolemole”, e le i uma lelei le fesili a Tania i le maligi o ona loimata ona ua masalosalo lona loto i le pupula a le teine tausi ma’i, e foliga mai e i ai se mea ua tupu i lona to’alua. Ua le iloga se itu e fetafa’i solo i ai le mafaufau o le fafine, ua tau i uiga tau sa’afia o lona to’alua, ma le ulua’i taimi na fa’atoa la masani ai i le falema’i i Moto’otua, i taimi a o tausi ma’i Veli i lona tama i le taimi ao taofia ai mo le fa’amamaina o lona toto, ua tau lona mafaufau i le taimi na la nonofo ai ma le tamaloa i lona aiga i Savaii, ma mea lelei uma sa fai atu e le tamaloa ia te ia, ao lenei ua amata ona fa’atuatuana’i i ai lona alofa.

Na avea le mafatia o le loto o Tania ma itu na fa’apau ifo ai lava le fafine i le tuli manu o le falema’i o lo o tu ai ma tagi ai lava na o ia i le leva o le po, ae ua ta’aligoligoa totonu o le falema’i, se’i vagana ai le teine tausi ma’i o lo o tu i le isi faitoto’a o le falema’i ma fa’atau pupula i gaioia uma o lo o faia e le fafine, o lea na ia savali atu ai ma opo mai i luga si fafine ma taumafai e fa’aloto tele o ia, ae le o mapu ai le fesili pea o le fafine po o a mai lona to’alua, pe ua oti pe leai fo’i. “Tina, aua ete popole i se mea e tasi, o lou to’alua sa aumai analeila ma fai ai loa togafiti a foma’i, ou te lei toe alu la i totonu o le potu o lo o faia ai le taotoga a lou to’alua, ae aua ete mafatia, sei maea togafitiga o lo o faia mo si ou to’alua ona toe maua mai lea o se isi fa’amatalaga mo oe, a ia e loto tele ma fa’amalosi, atonu e manuia togafitiga a foma’i o lo o faia i le taimi nei, ona o le matuia o se manu’a o lo o a’afia ai le ulu o si ou to’alua”, o upu fa’amalosi lea a le teine tausi ma’i na amata ai ona tau to’a mai i lalo le mafatia o le mafaufau o le fafine.

Ua savali atu nei Tania ua saofa’i i luga o le nofoa lea e i luma o le ofisa o le falema’i, e fa’atalitali ai le taimi e ulufafo mai ai foma’i o lo o i totonu o le potu lea e togafitiina ai lona to’alua, se’i fesili atu i ai po o ai mai si ona to’alua, e lei umi ae ulufale mai loa ma se ali’i foma’i fai’ava, e foliga mai o ia tonu lea o lo o tiute i le po lea, e lei fa’atali Tania ae ua oso atu loa e fa’afetaui le foma’i, ma fesili atu ai loa, “Fa’amolemole, po o a mai si o’u to’alua o Veli”, o le te’i o le tamaloa i le fesili a Tania na mafua ai ona leai sana tali ae ua na o le fa’atau pupula atu i le fafine.