Vaega 4

[E fa’atalofa atu i le mamalu o le aufaitau i lenei vaiaso, malo le onosa’i, malo fo’i le soifua laulelei, ae alo maia, o le vaega lua lenei o le tatou tala fa’asolo, lea na gata mai i le vaiaso na te’a nei i le taimi lea ua taunuu ai le pasi usu na malaga atu ai le ulugalii mai Amouta i le uafu i Salelologa.]

Na ona taunuu lava o le vaa i le uafu i Mulifanua, nanati atu loa le fafine o Tania ia Veli e vave i le vaega o lo o teu ai le la umu e piki ne’i ave sese e se tagata malaga, ae o lea o le a faitalia o ia ma amo atu a la ato lavalava, ae na fia toa Veli ma faapea atu i lona to’alua, “fai kalia a’u ma amo aku ako lavalava koe avaku ma le umu, pau lava lau mea e fai o le savalivali faa kaupou atu i lalo o le va’a ma ia vave lau savali aga’i i le pasi gei misi se ka gofoa.” E nanati atu lava tala a Veli ma savali faatopetope lava i le vaega pito i lalo o le va’a lea sa teu ai le la umu e piki mai nei ave sese e se isi o le pasese, ae o Tania i le taimi lea, ua na o le tu tu ma sauni, ua tuai na pipi’i le va’a ae sei savali i le vaega e pu’e ai le pasi mo le malaga atu loa i le taulaga.

“Suga Kagia, o ai oulua,?” o le fesili lea a le fafine o Selina, lea e nonofo ma le isi tamaloa o le nuu o Tania i Palisi, ina ua savali atu Tania i fafo ma le va’a ae fetaui ma Selina o lo o tu tu mai i luga o le uafu, na alu atu e fa’atali le isi ulugalii papalagi e nonofo i le fale talimalo lea e faigaluega ai. “Suga, o maua ma lo’u ko’alua, ma ke o e asi si o’u kiga ua leva fo’i aso e le i koe oo i le aiga.” E fai lava tala a Tania ma savali faatopetope lava aga’i i le pasi, ae o lo o tao tao tua atu ai Veli. O le toatele o le mau tamaloloa na tau fai mulimuli atu i tua o Tania i le taimi na la talanoa ai ma Selina, na faigata ai ia Selina ona ia iloa po o fea tonu le toalua o Tania lea na fai atu ai, ui o lea, ua teu i le loto o le fafine o Selina, o le a alu e eva i le fale o le aiga o Tania i le afiafi, atonu e maua ai ma lona avanoa e faitatala ai pe faapei le toalua o Tania.

Na ona pu lava o le pasi i le maketi o i’a i Savalalo, valaau atu loa ma Tania ia Veli e alu e taofi mai e taxi la te o ai i le fale, ae na ata si fafine ina ua toe tali atu lona to’alua, “ae aisea ka ke le savavali ai ae sefe lega kupe e fa’akau ai se meaai i se isi kaimi,” ae na ee atu i ai Tania ma fai atu i ai, “Se kapugi ia lou guku ae koe ou vae i le mea lea e fai aku e fai, ga e iloa lava agafea e mafai ona savali aku se isi iigei e aga’i i le fale.” O Veli, ua na o le savali punou lava e le tali i se upu, ina ua te’i lava fa’alogo i fa’aupuga ia ua tautala atu ai lona toalua ia te ia, o se taimi muamua fo’i lea ua talanoa faapea atu ai Tania ia te ia talu ona la nonofo i lona aiga i Amouta i Savaii, ae fetaui fo’i ma le alu atu taofi mai le taxi a le tamaloa o Simeki, o le sifi o kuluku i soo se ave taxi lava i totonu o le taulaga, e masani fo’i ona alu ma momoli le tina o Tania pe a tuua le aoga, i taimi ao faiaoga le olomatua i le aoga a Vaimoso.