[E fa’atalofa atu i le mamalu o le aufaitau i lenei vaiaso, malo le onosa’i, malo fo’i le soifua laulelei, ae alo maia, o le vaega lua lenei o le tatou tala fa’asolo, lea na gata mai i le vaiaso na te’a nei i le taimi lea na fa’aui lavea ai le tamaloa ma ia fesiligia le olomatua, pe aisea na le ta’uina ai ia Tania o ia lea ua la nonofo.]

Ua na o le fa’alologo o tamaiti e o o fo’i ia Tania ma Veli a o fai finauga i le va o le olomatua ma le tamaloa lea ua avea nei ma ona to’alua, ina ua te’i le fa’alogo a le tamaloa i fa’amatalaga a le olomatua, ma foliga mai ai o lea fa’atoa ia ta’uina i lana tama matua o Tania, o ia o lona to’alua ua la nonofo nei.

“Vaai oe Lapa, kusa lava pe ou ke le’i ka’uiga oe i la’u kama makua, ae le avea lega ma iku e aveese ai lo’u alofa ia ke oe, o oe lea ua ou filifilia e fai ma kama o la’u fagau e ko’akele, ua oki le lakou kama oga o le ka’a poka ae le gofo mai e fai se kala ma kamaiki, lea la ua e oo mai i le kakou aiga, o oe lava o le ulu o le aiga ...”

O tausaga e 5 lea na nonofo ai Tania ma Veli i le aiga o Veli i Salafai, o le umi fo’i lena talu ona nonofo le olomatua ma le fasi to’e lea ua fai nei ma ana ma’amusa. O Lapa, e faigaluega i le Ofisa o Galuega a le malo, o se ali’i e tosoina laina o moli eletise i fale o aiga. Na la masani ma le tina o Tania ina ua latou tosoina uaea moli a le aiga o Tania i le isi aso, ae ona iloa ai e leai se to’alua o le olomatua o i ai. O Lapa na tete’a ma lona to’alua ona o le malosi o le inupia ma le ka’a piliaki i fale o ana uo, ae o tausaga e 8 lea na nofo to’atasi ai ua leai se ama, na vaaia ai se suiga tele i lona olaga, ua le toe inupia pe toe ta’a solo i fale o ana uo, ae ua na o le fiafia e nofo i le fale, alu i le lotu ma auai i soo se fa’agaioiga a le nu’u. E ui o lea ua fa’alalolalo le olomatua i le toeaina ona o lona le talanoa ia Tania e tusa ai o le la mafutaga, peita’i ua pei o se tao u’amea lea ua tuia ai le loto o le toeaina, ma ua amata ai ona tau pogisa lana vaai i le aiga i lea afiafi.

O tua fale e i ai le toga fa’i sa toto e le tamaloa o Lapa ina ua fa’atoa taunu’u i le aiga i Palisi, sosoo atu ai ma lana pu pu talo i fanua lisi o isi aiga e le o nofoia, a o lea ua fa’ataga ona fa’amama e le aiga o Tania ina ia faaitiitia ai le vao, ma o iina lea ua fa’amoemoe le tamaloa o Lapa e faasino i ai Veli e galue ai, pe afai e mae’a le ulua’i lua vaiaso o le latou mafutaga ae leai sana galuega e maua. O se olaga faigata ona tau amata le aiga o Tania ma Veli, ona o lea ua manatu le tama’ita’i e toe fo’i e saili sana galuega i le falema’i sa galue muamua ai, ona e manatu alofa fo’i i le tau amataina o le la aiga ma si ona to’alua, ae o le tamaloa o Veli, e lei masani lava lona olaga i le olaga e tatau ona ola ai tamaiti o le taulaga, o lea lava e fiafia e sulu lona ie ie palapala ma savalivali i le malu o le afiafi i Palisi, e le faigata ai foi ona iloa o ia e le tupulaga, o ia o se tagata fou e lei leva ona taunuu i le nuu