Vaega: 79

Fa’atalofa atu i le alafa’i mai i le manuia o le mamalu o le atunu’u ae maise o le au faitau i lenei taeao manuia, taeao toto’a, taeao manino i le alofa ma le agalelei o le Atua Soifua. E i ai pea le fa’amoemoe maualuga, o lo’o maua pea e le atunu’u le filemu ma le manuia i le tausiga alofa a lo tatou Tapa’au i le lagi. E ao ai ona o tatou sula lapalapa o malo ma fa’afo’i le vi’iga i le Atua Soifua, ona o Lana tausiga alofa mo i tatou i aso uma lava.

Ae alo maia, o le a toe fa’aauau atu la tatou tala fa’asolo e pei ona masani ai, Alofa, se ia tiga. Ua fai nei la ma fetufa’aiga ma si a’u uo o Tino, ua lagona lava le vaivai o lo’u loto i lea taimi, ona o mea uma sa ou natia mai ia Tino, ona o tulaga o lo’o ia i nei lo’u aiga, o lea ua foliga mai, o le a sasa’a uma atu a’o fa’alogologo Tino i lea taimi.

Ua avea nei le talatalanoa mai o Tino ma ala ua vaivai ai lo’u loto, ona ua ou manatua nei, amuia Tino o lo’o mafuta pea ma ona matua, o lona tama ma lona tina, a’o a’u, o lo’o maua le alofa fa’amaoni o si o’u tama, ae ua misia lava le alofa moni o si o’u tina na ou iloa ai le lalolagi.

Ua atili ai ona maligi ifo o’u limata ua le mafai ona toe taofiofi, na a’apa mai nei Tino ua fusi atu a’u, ma ua ma nofonofo ai lava fa’apena mo sina taimi. Na ou tau mafaufau nei, po’o le a la’u tala o le a fai atu ia Tino, ona o le tulaga o lo’o i ai nei lo’u aiga, aemaise ai o o’u matua. Ae sa ta maua lava i lo’u loto ma lo’u mafaufau, e le o le taimi lenei e fa’ailoa ai ia Tino mea uma, atonu lava e sau se taimi oi luma ona ou fa’ailoa ai lea ia Tino le tulaga o lo’o o’u i ai nei.

“Averia, va’ai oe, e ‘ese le faigata o le tulaga o lo’o ta i ai nei, ae ui lava i ia mea uma, e le mafai ona ave’esea ai lo’u alofa ia te oe, e ui fo’i ina ua ou iloa le isi ou itu, e te le mana’o e iloa e ni tagata lou aiga, ma e fa’apena fo’i ia te a’u, ou te le mana’o e aiai fua nisi tagata i mea a lo’u aiga.”

Na fa’alogo mai nei Tino ua ou masusu i lea taimi, ua le mafai lava ona tofiofi lo’u tagi, ona ua ou fa’alogologo atu i tala ua fai nei e Tino e uiga ia te a’u, ona ou lagona ai lea o le vaivai o lo’u loto ma lo’u mafaufau.

“Averia, ‘aua e te tagitagi fa’apena, ae tautala mai ia te a’u ona ou iloa ai lea o le tulaga e taoto ai le ta mafutaga.”

Na ou iloa nei, e ui lava ina faigata ia te a’u lea tulaga, ae e tatau lava ona ou tautala ma ou talanoa ia Tino e tusa ai ma le tulaga o lo’o ma i ai nei.

Na ou a’apa atu nei ua u’u mai le lima o Tino i lea taimi, “Tino, out e fa’amalie atu ia te oe, afai fo’i o le a sou va’ai mai ia te a’u ma lo’u nofonofo atu, ia malie lou finagalo, o le tele o mea o lo’o tutupu ma o lo’o a’afia ai lo’u aiga, o le fa’apogai le na, ae afai lava ua e iloa ua e alofa ia te a’u, ua fa’apena fo’i lo’u alofa fa’amaoni ia te oe.”

“Tino, e ‘ese le ma’ale’ale o le tulaga o lo’o i ai nei lo’u aiga, atonu ua e le va’ai i lo’u tina i lo’u fa’au’uga, ma e i ai le mafua’aga ua le o’o mai ai, o la’u avega mamafa lea o lo’o tauave e o’o mai i le taimi nei.”

Na ou fa’alogoina le opo mau a Tino ia te a’u, ae ua ou taumafai e fa’amatala atu le tulaga o lo’o i ai lo’u olaga i si a’u uo sa alofa, fesoasoani ma fa’amalosiau ia te a’u, a’o fa’afeagai a’u ma a’u a’oa’oga.

E faia pea