Vaega: 68

Fa’atalofa atu i le mamalu o le atunu’u i lenei taeao fou, taeao manino, taeao toto’a, o lea ua o tatou va’aia sulu o le la i le alofa ma le agalelei o le Atua Soifua. E ao ai ona o tatou fa’apea ifo, “Le Atua e, ia e alofa ma foa’i mai i a i matou manatu ma mafaufauga lelei, ina ia mafai ai ona fa’atautaia a matou fuafuaga i le alofa ma le fa’amaoni, a’o le vi’iga matou te fa’afo’i atu i Lau Afio e fa’avavau, amene.

Na muta mai la tatou tala ina ua fai le fa’atasiga a le aiga o Paulo i le fale o lona tuafafine o Salamasina ma lona to’alua palagi o Larry, o lea fo’i fa’atoa fa’alogologo lea o Sila, Paulo ma Salamasina i le matagofie o le si’ufofoga o Samuelu.

Ae se i liliu la tatou tala i le fa’amuli a Petelo po’o fea ua o’o i ai, fai mai, na moe gapepe le tama ina ua ma’ea lana fa’afiafiaga faito’atasi i lea po. E ui lava ina ua le lagi’ula mua o le la ma ua le so’oli’o le masina, ae ua tasi moemoe le loto o Petelo, afai o le mea lea ua mana’o ma loto i ai Losalia, e leai se mea na te toe mafaia, tu’u ia le tama a le lo’omatua e fai le mea e loto i ai.

Ina ua malama le taeao o le aso e soso’o ai, na fa’ate’ia le miti malie a Petelo ina ua fa’apea ane se tagata, “Petelo, Petelo, ia o le a e saga moe lava ua ao, nofo i luga, o lea ua ou sau, se i fai se ta tala, nofo i luga, ai a na fa’apea e te faiava i lo’u aiga, ua leva ona tamo’e ma le i’ei’e i le vaomatua, nofo maia i luga.”

Na tau pulapula a’e nei mata o Petelo, ma lona iloa ane, o Misi lea ua nofo ifo i ona talane. “Sole, aisea ua e moe ai fa’apea, e i ai se mea ua tupu, o fea na e moe se se ai anapo, ua e vaivai ai?” Ua tau nofo a’e i luga Petelo, ae ua na manatua vave le mea na tupu, a’o le i moe.

Ua punou ifo Petelo ma tau mafaufau, ae na tasi lava lana fesili, “Misi, o fea na e i ai ana po?” Ua ‘ata Misi ma tali ane, “Sa ou moe i le fale o Solo, ae o le mea malie, ou te te’i a’e i le isi taimi, e leai se Solo o moe i o’u talane, ua ou le iloa po’o fea ua alu i ai. Se o le tama lea o Solo se, ua pei o se tiapolo.”

O le mea ua tupu, e le iloa e Misi, o lea ua iloa e Petelo le mea na nimo i ai Solo. Na tilotilo ane nei Misi i a Petelo, “E a, o e iloa le mea na alu i ai Solo?” E leai se tali a Petelo, ae ua na o le punou ua le tautala.

“Petelo, tautala mai i a te a’u, po’o le a le mea ua tupu, o lea fo’i ta te pogisa ta ‘ita ia, ae o lea ou te tautala sa’o atu i a te oe, ou te ala a’e i le isi taimi ua leai se Solo, ua le iloa po’o fea na alu i ai.” Na fai si umi o fa’atalitali Misi i se tala a Petelo, e ui lava ina lagona e Petelo lona ma ma lona maasiasi, ae na liliu ane nei ma fa’amata i a Misi le mea na ia va’ai ai ma fa’alogo i ai i le fale o matua o Losalia i le po.

A’o faia le fa’amatalaga a Petelo i a Misi e uiga i a Losalia ma Solo, na lagona e Misi le alofa i a Petelo, ona ua iloa uma e tagata le faigauo a Petelo ma Losalia. Ae o le mea ua tupu, e le o iloa e matua o Petelo se mea e tasi, ae ua na o le tama o Samuelu, lea e fautua ane pea i lona uso, e ‘aua ne i feoa’i ma Losalia. Atonu, o le ala lea na musu ai Samuelu e feoa’i Petelo ma Losalia, ona ua iloa e Samuelu, o lo’o fai le fa’alapiti a Solo ma Losalia, ae foliga mai o lo’o fa’ase’e e Losalia lona uso.

E faia pea…