Vaega: 71

Fa’atalofa atu i le mamalu o le atunu’u, i lou alafa’i mai i fanuga lelei o lenei aso fou, o se aso e fa’aopoopo i lou soifua fa’apea ma si o’u nei ola. E ao ai ona o tatou fa’apea ifo, “Lo matou Tama e, oi le lagi, matou te lafoa’i atu i Ou a’ao alofa o matou mo’omo’oga ma fa’amoemoega o lenei aso, aua ua o matou talitonu e leai se mea e faigata i Lau Afio, e o’o i le fa’avavau, Amene.”

Ae alo maia, o le a toe fa’aauau atu la tatou tala mo lenei aso, ae ia manuia faiva ma tiute o le a feagai ai ma le atunu’u. O le a o tatou asia le Faifeau, le toeaina o Paulo, le lo’omatua o Eseta, o le tama o Samuelu ma Salamasina ma lona to’alua po’o fea ua o’o i ai le pati tele lea na fai i le po. Ua ma’ea le pati, ma ua o’o nei i le taimi e fai ai se malologa, ona o le aso e soso’o ai, o le a toe tu’ua ai e le Fa’afeagaiga ma Paulo si o la tuafafine o Salamasina ma lona to’alua o Larry.

Fai mai ina ua o’o i le taimi e fa’amavae ai, e foliga mai o le a malaga Paulo, Sila, Eseta ma Samuelu i se mea mamao lava, ona ua tagi aue, ue nei Salamasina ma fusi mai nai ona tuagane. ina ua o’o lana fa’amavaega i le lo’omatua o Eseta na fusi mau e le teine ma fa’apea ane, “Eseta, fa’afetai lava mo mea uma, afai e te va’ai atu ua ma’i Paulo, alofa ia vave logo mai a’u fa’amolemole.” Ua fusi mau e le lo’omatua le teine i lea taimi, aua fai mai e leai se mea sa ga se i le va o Eseta ma Salamasina, fai mai a fai mea a le aiga, ae maise fo’i o le momoliga o le Fa’afeagaiga o Sila e lona aiga i Tula, sa fa’aeaea Eseta i a Salamasina i mea uma.

O le ala fo’i lea e iloa ai e Salamasina lo la va ma le lo’omatua o Eseta, o a lava mea o le aiga, e fesilisili lava Salamasina i a Eseta mo lana fesoasoani, a’o to’alua o isi tuagane o Sala, ua iloa lelei e le teine uiga o fafine ia, lea la e lavea atu ai ma le Faletua o le Faifeau. E le tautala Salamasina, ae e fai i le ‘ofe e le lo’omatua o Eseta, ia ta’ito’alua o isi uso o Petelo, “Fai fa’alelei mai a, o le tagata na a’oa’oina e ona matua i totonu o lona aiga, o le tagata fo’i lea na te iloa le mea e tu ai, a fa’alogo ifo o le si’usi’u, ona ‘aua lea e te fia ulu, tausi pea lou mamalu, ae le o le fa’alogo ifo lava e le o’o i ai, ae fai lava, polili teuteu mai si a tatou mea.”

Fai mai e leai ma se isi e toe tautala i lea taimi, ona ua folafola fo’i le leai lava se tagata na lavea i lima nei a le lo’omatua o Eseta. O le isi mea e fa’amanatu pea e Eseta i ta’ito’alua o isi uso o Petelo, “Fa’alogo lelei mai lava outou, o Petelo e ulumatua a, tatou o ai la’ia i le laina le na, ona leai lava lea o se mea e fa’aletonu o le aiga, ae ‘aua le fia osooso i mea e fa’alogo atu e mu ai le lima.”

Ua fai nei le fa’amavaega ma ua fa’atofa, fai mai e savali fua Paulo, ae ua tafe ifo ona loimata i lea taimi, na a’apa ane nei i ai le lo’omatua o Eseta, “Paulo, loto tele, e faia e le Atua se isi aso tatou te toe feiloa’i ai ma lou tuafafine, ‘aua e te loto vaivai fa’apena.” Fai mai ua fiu lava le lo’omatua o Eseta e fai ane ana tala e fa’aloto tele ai le toeaina, ae ua pei o le maligi ifo o uaga, ia loimata o Paulo i lea taimi. Na i’u lava ina toe tu, ma tilotilo atu i le tu mai a si ona tuafafine e to’atasi o Salamasina ma talotalo mai.

Ua atili ai le tagi a le teine i lea taimi, ua le mafai ona iloa mai nai ona tuagane i le tafe ifo o ona loimata. Pau le mea na iloa mai e Salamasina, o le solosolo pa’epa’e lea e talotalo atu ai Paulo ma soloi ona mata. O le taimi lea i le Faifeau, e savali fua fo’i, ae o le mea fo’i lea o lo’o tupu i a te ia, ua le ea a’e i luga, ae ua na o le savali lava ma soloi ona mata i lea taimi.

E faia pea…