Vaega: 88

Ua o tatou molimauina le alofa ma le agalelei o le Atua i lenei aso, ina ua o tatou fa’alogoina le tausagi mai o manulele i le taeao, ae maise ai o le oso a’e o le la mai i lona nofoaga i le itu i Sasae’. Ona o tatou fa’apea ifo ai lea, “Le Atua e, fa’afetai i Lau Afio, i le ola ma le malosi o lo’o E foa’i i aso uma o lo matou ola, alofa ma foa’i mai ia i matou le loto fa’amaualalo ma le loto mama, ina ia mafai ai ona o matou iloa atu Lau Afio i Lou mamalu ma Lou matagofie, e o’o i le fa’avavau, Amene.”

Ae alo maia, o le a toe fa’aauau atu la tatou tala mo lenei aso, ae ia manuia le alo faiva o le atunu’u i faiva ma tiute o le a feagai ai i lenei aso. Na muta mai la tatou tala, ina ua maua e le uso la’ititi o Paulo le tusi na fai e lona uso o lo’o Faifau i le afio’aga o Tula le tusi. O lea la ua i ai lona manatu, o le a ia liliu mai e fa’atino le mana’oga e pei ona mana’o i ai lona uso o Sila.

E moni lava le upu, e mafai ona gausia le loto momomo pe afai e te tufa atu i se isi tagata i mea o lo’o e mafatia ai, ae o le mea e sili ona taua ma lelei, o lou tu’u atu lea o lou loto i le Ali’i. O a lava mafatiaga ma faigata e o’o mai, e tasi lava le tali mo i tatou, o le lafo atu lea o o tatou mafatiaga i le Atua, aua e leai se mea e faigata i a te ia.

Ua fa’apena le tulaga ua i ai nei le Fa’afeagaiga ma lona Faletua i lea afiafi, ua fetufa’ai nei i auala e ao ona fai ina ia vave ai ona fofo le fa’afitauli ua tula’i mai i totonu o le aiga. Ua i ai nei le manatu o le a toe ta’alo se isi fa’atasiga a le aiga i le vaiaso fou, ma o le a mafai la ona auai le uso la’ititi le tama o Pati, lea e fai ava i le afio’aga o Vatia.

A’o le isi itu, ua toe mafaufau nei i le Fa’afeagaiga, o ona uso e to’alua o lo’o i Amerika, aua e tatau lava ona o la iloa le mea lea ua tupu i lo latou aiga. Ae sa i ai lava lona popolega, ona o le faigata o ala e feoa’i ai. Ua tonu nei i le mafaufau o Sila, e sili e a fa’afeso’ota’i vave ia lona tuafafine o Salamasina i Fagatogo, ina ia logo vave Eteuati ma Falaniko o lo’o i Amerika e tusa ai ma le mataupu ua taoto ai nei lo latou aiga i Samoa nei.

Ua fa’apea lava ona fai, ua sau le  pasi i le taeao ma le tusi mai le Fa’afeagaiga o Sila, mo lona tuafafine o Salamasina, ina ia logo vave tama o lo’o i Amerika, ona maua mai ai lea o se tali pe mafai ona o mai, pe leai. O le aso fo’i lea, na sau ai fo’i le pasi mai tua i Tula, ma tusi e tu’u i le avepapsi e alu i Vatia mo Pati.

O nei mea uma ua fa’ataunu’u e le Fa’afeagaiga, ona o lona manatu e vaivai si ona uso o Paulo, e moni lava sa a’oga, ae e le o’o i se tulaga e fa’apea ai o se tagata e atamai i mea fa’apea. O le ala lea na ia gaioi ai loa, ina ia faia se auala vave mo lo latou aiga, ona o ua ‘uti’uti le taimi.

Fai mai ina ua maua e Pati le tusi na alu atu ma le avepasi i Tula, sa ia faitau ma le fa’anoanoa o lona loto, ona o lenei mea ua tuala’i mai i lo latou aiga. O le isi fo’i itu sa manatu i ai Pati, ona e moni lava sa ola a’e i lona aiga, ae sa le i lava sa latou mafutaga ma ona matua, ona e lona tama e na o le sefulu ona tausaga. A’o le taimi na maliu ai lona tina ua sefulu iva ona tausaga. E le tele la sona iloa o mea ia, ae sa i ai lava lona fa’atuatuaga, o lo’o silafia e lona uso Faifeau ma lona uso matua o Paulo mea uma o lo latou aiga, ona o ia o lo’o nofo mai e tausi lo latou aiga. Ae galo ai i a Pati, o le tele o mea o lo latou aiga, o lo’o nofonofo lelei ma le lo’omatua o Eseta, ona o Eseta sa mau paolo i totonu o le aiga, lea ua tolusefulu ma le lima tausaga, fa’atasi ai ma le upu e lafo pea a le lo’omatua, “E leai lava se isi na lavea ai lima nei.”

E faia pea...