Ads by Google Ads by Google

Fagogo: Lupe o le Filifili

Vaega: 99

 

Fa’atalofa atu ma fa’afeiloa’i atu i le mamalu o le atunu’u, e i ai le fa’amoemoe ua maleifua mai i fanuga lelei le atunu’u i lenei taeao fou i le alofa ma le agalelei o lo tatou Matai oi le lagi. Tatou ave ai le fa’amuamua i le Atua Soifua,ona o le ola ma le malosi o lo’o ia foa’i pea mo i tatou e ala i Ana fa’amanuiaga i aso uma o le soifuaga. Ae alo maia, o lea toe fa’aauau atu la tatou tala, ae ia manuia le alo atu o e atunu’u i faiva ma tiute o lenei aso.

 

Na  muta mai la tatou tala, ina ua fa’ate’ia Petelo i le au selasela atu o Misi ma le tusi na avatu i a Losalia, ae o lea ua taunu’u atu fo’i ma matua  o Petelo, le toeaina o Paulo ma le lo’omatua o Eseta. O lea la ua fai nei le a’oaiga a Eseta i a Misi, atonu e le i fa’alogo lava Misi i ia upu. Ae sa lagona le fa’afetai o Misi, i le lo’omatua o Eseta, aua o lea ua ia iloa le isi itu o le lo’omatua, e loto alofa, toe tausi i Fa’afeagaiga o so’o se Ekalesia.

 

E le i umi ae tu a’e loa i luga le lo’omatua, “Ia o mai loa si a’u fanau, ua lava le na galuega, e o mai e o i le itu la e tu mai ai le toeaina, e fafai ni talo se luasefululima, Petelo, fa’alogo mai oe si a’u tama. Na o’o mai le feau mai le Faifeau o Tavita, e mo’omia lava la tatou fesoasoani i ni nai meamata mo a la malo.” E le i uma mai le tala a Eseta ae ‘oso ane Misi, “Oe, se fai i le Faifeau e alu e fai sona ma’umaga, o le a ‘ai a’i, se i va’ai, ua mo’omia e le Faifeau le fa’amalosi tino.”

 

“E a Misi, fa’alogo mai oulua, o tagata ‘ese nei e ala mai ai manuia i a tatou, ia oulua fa’alogo lelei mai lava. ia o tatou tausi i Fa’afeagaiga, a Petelo, ua uma ona a’oa’i oe i tulaga fa’apea, e ala mai ai manuia o le aiga, ae maise oe Petelo. Misi, ia ‘apo i luga lou auvae a, fa’alogo lelei taliga.”

 

Na tilotilo ane nei Misi i a Petelo po’o le a se tali e tu’u ane i a te ia, e tusa ai ma le tusi a Losalia lea ua ia mauaina, ae e pei lava e le ano ane i ai le tama i lea taimi. “Misi, savali ta o e fafai mai talo mo le Faifeau.” Ua alu nei le solo a Misi ma Petelo, ae ua mulimuli atu ai ma le lo’omatua o Eseta.

 

Ua taunu’u i le isi itu o le ma’umaga, e lilo i le va’ai atu i isi la’au tele ua matua’i ufita’i i le talo, a’o le isi itu, o lo’o i ai le toga fa’i, o le toga koko, a’o le isi itu o lo’o ta’oto ai iina le fa’ato’aga o fuala’au ‘aina. E ofo le loto o Misi, aua fo’i a o ane e ave fa’anana pe gaoi fo’i le ma’umaga o si tama o Petelo. E le i o’o i le itu lea, aua ua na o le topetope o lima ne i te’i ua maua atu e se tagata.

 

O lea la fa’atoa va’ai lelei Misi i le ma’umaga ma le fa’atoaga o lo’o galue ai Petelo, i aso uma, ono aso o le vaiaso, a’o Aso Sa, e alu ane ai Petelo e tilotilo ma matamata i galuega ua mafaia e ona lima, ma momoli lana fa’afetai i le Atua, ona o lenei tamaoaiga ua maua, e ola ai nai ona matua ma tua i ai si ona aiga.

 

“Petelo, o mai i le itu lea ou te tu atu ai, ua ou iloa ua matua talo o lo’o i ai.” O le vala’au ane lea a lona tama. Ae na te’i Paulo ina ua tilotilo mai, o lo’o mulimuli atu ai i tua ma le ula leaga lea o Misi. “Oi Misi, ua a, o a mea a lou tama o fai?” Na tali Misi, “E leai ni mea, o lo’o malolo fo’i i le fale.” Na toe sau le isi tala a le toeaina o Petelo, “Ia a malolo la ae le o i fafo e sua le ‘ele’ele ma toto ni talo, o le a nonofo, nonofo, o a mea e ‘ai.” Ua le tautala Misi i lea taimi, ae ua na o le tu ma ‘ata.

 

“O lou tama se Misi se’i iloga e saviligia le no’o fa’atoa tu lea i luga ina ua va’ai ifo ua leai se ie, fai i lou tama ua ou fai atu e tu’u le fa’apalapala ma le paie, ae tu i luga e gaioi, ma fa’aafu le tino ma le ma’i so’o, ma’i so’o.” Ua le tautala Misi, ae ua tilotilo ane i a Petelo, ma ‘ata.

 

E faia pea…