Vaega: 119

Taeao manuia i le alafa’i mai o le atunu’u i fanuga lelei o lenei taeao fou, i Lona alofa ma Lona agalelei e le mavae mo i tatou. E ao ai ona o tatou fa’apea ifo, “Le Ali’i e, ia tumau atu pea i Lau Afio le fa’ae’etaga ma le vi’iga e fa’avavau, fa’avavau lava, amene.” Na muta mai la tatou tala ia ua fetaui le tamo’e ma le auselasela o Misi ma le taunu’u ane o le tama’ita’i o Losalia. O lea la ua fai nei le mumugafalo, a Misi ma Losalia, ae o lo’o vevesi le aiga o Losalia i lea taimi.

“Misi, fa’atali ea la, o le a lau tala, oi a toe fia talanoa fo’i le ali’i o gaugau, o lea na ou taumafai e fia maua se avanoa, ae foliga mai ua musu i a te a’u, talutalu ai lona fa’alogologo tala ma le fia tama mamafa.”

Ua le tautala Misi ae ua na o le tilotilo ane nei i a Losalia, “Se sau ia si o’u tuafafine fo’i, va’ai oe, o se ala na o tama tane i tama’ita’i, ae malie maia lou loto, e te le alofa mai lava i a te a’u, e fai o le tau gali e maile, ae na toe titi maua a’u e ou tuagane, sau ia ta o, o lo’o fa’atali mai Petelo, malie maia lou loto, o le mea e tatau ona fai pe a oulua talanoa ma le ali’i le na, na ona uma lava, susu’e loa i ai ma lou i’e.”

Fai mai o le tosoga lava lea e Misi o le lima o Losalia na o ai lava i le fale o lo’o fa’atali mai ai Petelo. Fai mai e taunu’u ane, o lo’o nofonofo mai lava na o ia, fa’atasi ai ma si ana kitala lea ua to ifo nei e fa’atalitali mai ai le taunu’u ane o le tama’ita’i i lea afiafi. Na fa’ate’ia Petelo i le va’ai mai o alu atu le solo a Misi ma Losalia, ua pei o ni ufi e tutupu fa’alogona o le tama, ina ua va’ai mai i si ana manamea fa’apelepele i lea taimi.

O uiga fa’alekeakea na i ai Petelo, ua ifo i lalo, ae ua va’ai nei uiga filemu ma le tausa’afia o le tama i lea taimi. Ua tu a’e nei i luga  ma savali mai e fa’afetaui le savali atu a Misi ma Losalia. Na ona taunu’u ane lava o le solo e le i toe fa’atali Misi, “Ali’i Kelo, se ua tau ‘ai a’u e ta’ifau i le auala, e le gata i le na, ae ua tau maua le tama i le fale o le tama’ita’i nei, se na o mea gau ma mea nuti se ta’ua mea, ia sau loa e fai se lua tala, ona ou toe alu ai lea e momoli Losalia, ne i te’i ua su’e e ona matua.”

Ua ‘ata Petelo ma fa’apea ane, “Misi, ua lelei, ae se i fai se ma tala ma Lia ona ta o ai lea e toe momoli. Ua le tautonu le mea na i le fai’ai o Misi, ona sa i ai lona manatu e na o ia e alu e momoli Losalia, ina ia maua uma ai le ‘au o le paipa, po’o a tala a Petelo na fai ane i a Losalia. Na toe tali Misi, “ia o oe lava, ae sa ou fa’apea ou te alu na o a’u e momoli le mafine nei, ae e fai lava e oe le tonu.”

Ua liliu nei Misi ma savali atu i le faleo’o o matua o Petelo, ua amata nei ona po po namu, a uma ona liliu i le isi itu, ua liliu i le isi itu, ua fa’apea lava ona fai, a’o le taimi lea ua amata le talatalanoaga a Petelo ma Losalia. “Lia, ia e muamua lava ona ou fa’apa’i malu atu i lou finagalo, ona o tulaga fo’i na o’o i ai i le ma o’o atu ma Misi, o lo’o e faifau mai i le maota o le galuega, ae o upu moni lava ma upu tu’usa’o, ua leva lava ona ou fia talanoa i a te oe, ae paga lea, ona o lo’u le malie tele i a te oe, o le mea lea sa fa’atuatuai ai so’u manatu.”

Ua liliu ‘ese Losalia i lea taimi, ae tau tonu ai ma le u a le namu i ona autaliga, ua toe fa’aauau le tautalaga a Petelo, “Lia, va’ai oe, ou te fia iloa ma ou fia mautinoa po’o  fea o i ai sou manatu ma lou loto e uiga i le ta mafutaga, po’o le mea o lo’o e fa’ase’eina a’u, po’o le mea e te alofa moni i a te a’u pe leai, ou te mana’o e te tautala sa’o mai lava i a te a’u.”

E faia pea ...