Vaega: 128

Fa’atalofa atu i lou maleifua mai i fanuga lelei o lenei taeao fou, ona o le pule fa’asoa a lo tatou Matai oi le lagi, e ao ai ona o tatou fa’apea ifo, “Le Ali’i e, ia maualuga pea lou vi’iga e fa’avavau fa’avavau lava, amene.” Ae alo maia, o le a toe fa’aauau atu la tatou tala mo lenei aso.

Fai mai le tala, na avea le maliu o Paulo ma ala ua fa’atupu ma’i ai i le lo’omatua o Eseta, ma na fiu lava lana fanau e fa’afiafia i le loto o le lo’omatua, ae ua leai lava. Atonu e fa’apena mea o lo’o tutupu i totonu o aiga, aua a avea loa le tasi, ua le toe i ai lava se isi mea e toe manatu i ai, ua fa’apea la le mea na tupu i le lo’omatua o Eseta. Ua fiu fo’i si ona aiga i Nu’uuli e a’ami, ae tasi lava le tala a le lo’omatua i lona tuagane, “Samuelu, ou te oti lava i lima o si a’u fanau, o a mea e maua e Petelo ma Losalia, ae maise ai o le alofa mai o Samuelu mai Amerika, o le mea le na ou te ‘ai ai, ma e malie lava lo’u loto Samuelu, ae ou te fa’afetai atu ia te oe si o’u tuagane, ona o lou alofa mai i a te a’u.”

O manatu ia ma mafaufauga o le lo’omatua o Eseta, fai mai o mea na fiafia i ai lona loto, ua pei lava ua mou ‘ese atu. O ona uiga fo’i sa i ai fa’apea ma le fa’alala so’o o lona lima, ua mou ‘ese le fiafiaga ina ua leai Paulo sa o la fa’atasi.

Fai mai, e fai mo le tuagane o Eseta le aiga i tua, o aso uma, e le misi le alu atu o le toeaina o Samuelu, e asi ia Petelo ma Losalia. Fai mai, o lo’o tausi pea e le toeaina o Samuelu le mavaega a lona tuafafine, ina ia alofa i si ana fanau i le faiga o le aiga. O le tama’ita’i fo’i o Vaitimaleata Caroline, e le misi lona asiasi i a Petelo ma Losalia i fa’aiuga o vaiaso uma.

E i ai le aso na alu atu ai le asiasiga ma le tafaoga a le tama’ita’i o Vaitimaleata i a Petelo ma Losalia, ae o lo’o i ai fo’i ma le tuagane o Eseta, le toeaina o Samuelu. O le alu ane lea a Vaitaimaleata, e talatalanoa i a Petelo ma Losalia, mo le fausiaina o le fale fa’apapalagi e nonofo ai ma si a la fanau. O lea la e taunu’u ane le tama’ita’i, o lo’o i ai ma le toeaina o Samuelu.

Ua talatalanoa nei, ma ua fa’ailoa fo’i se manatu na o’o ane ma le tama’ita’i. Ua malie i ai Petelo, e o’o fo’i i le toeaina o Samuelu, na ia lagona le fiafia o lona loto, ma ia maua le agaga fa’afetai, ina ua tula’i mai Vaitimaleata i se tulaga maualuga, ma o le a ia fa’aeaea i le aiga.

O fuafuaga a le tama’ita’i, e le i iloa e ona matua, ae o le manatu na tula’i mai, a maea le galuega o le fa’atinoina lea o le fale mo Petelo ma Losalia, e fai fa’atasi lava ma le faletalimalo o le aiga. O le isi itu o le fanua lea na fa’amasina ai i tausaga ua mavae, o le a fau ai le fale o Salamasina ma Larry, ae maise fo’i o le tama’ita’i o Vaitimaleata.

Ua fa’apea lava ona fai, e leai se tasi na toe fa’alavelave i fuafuaga a Vaitimaleata, o le pito o le ‘ele’ele o Alava’a, o le mana’oga o le tama’ita’i, ia fau ai se fale mo nai ona matua, aua e fiafia si ona tama o Larry e i le ea o le sami, ae maise ai o se nofoaga ua sili ona matagofie i le va’ai.

Ua fa’apea lava ona fai, fai mai ina ua fa’ailoa e Vaitimaleata i ona matua ae maise o si ona tina, na va’aia ai e le tama’ita’i le sagisagi  fiafia o si ona tina. Atonu o se fuafuaga ua leva ona nofo ma le lo’omatua o Salamasina, ae e le mafai ona tautala, aua ua fa’asolo lava ina ma’i. Talu mai ona maliu si ona tuagane o Paulo, ua fa’atupu ma’i i a Sala, ae sa maua pea le fiafia o le lo’omatua, ona o si ana tama o Vaitimaleata.

E faia pea…