Vaega: 142

Vivi’i fai a’e pea o tatou loto i le Atua Silisili ‘Ese, ona o Ana fa’amanuiaga ma lona alofa mutimutivale ia i tatou i aso uma o lo tatou ola. E ao ai ona o tatou fa’apea ifo, “Le Atua e, ia e alofa ma foa’i mai le loto fa’amagalo ia i matou, ina ia mafai ai ona o matou fa’amagalo atu, ia foa’i mai le alofa, ia mafai ai ona o matou alolofa atu i e o lo’o mo’omia le fesoasoani, a’o le vi’iga ma le fa’amanu e tumau atu i Lau Afio e fa’avavau, fa’avavau lava, Amene.”

Na muta mai la tatou tala, ina ua fa’atasitasi nei lo’omatutua o Su’e, Lisi, Tupu ma Vaitimaleata, o lea la ua amata e le teine le talatalanoaga i lea aso. Ua fa’ate’ia fo’i lo’omatutua, aua e leai se tasi o i latou na iloa le mafua’aga ua ave ai latou e Vaitimaleata i le fale’aiga.

“Su’e, Tupu ma Lisi, ua ou maua le tala, o lo’o outou taumafai e ave’ese le suafa matai ma le Sa’o o lo tatou aiga mai i a Petelo, ua ou iloa, ona ofo ai lava lea o lo’u loto i a te outou, taga’i fo’i, ua o matou fa’atina atu lava, o lo’o i ai fo’i si o’u tina, ae a outou manatu i le tausiga o lo’o fai e Petelo ma si ona to’alua i le aiga, ailoga e i ai se aiga i lalo o le la fa’apea ma Samoa nei, o le Sa’o o le aiga, ae tautua i lona aiga. E leai se mea e tasi o ga se i le aiga, aisea, ona o Petelo, e ui lava ina fa’apea e la’ititi, e ui fo’i ina fa’apea e vaivai, ae fa’afofoga mai outou tina, e fa’aaoga e le Atua tama valevale, e tutupu mai ai mea lelei ma mea silisili.

“O la’u talosaga, ia outou alofagia, ia ‘aua ‘aua lava ne i tupu mai le mea lenei i totonu o lo tatou aiga, ia gata ai i’inei, o le ala fo’i lea ua ou sau ai, se i o tatou talatalanoa, e le o iloa e lo’u tina se mea e tasi, ou te iloa fo’i e le o iloa e toeai’ina lenei mea.

“Ae ia outou alolofa mai, afai o le faiga lea o outou ua fa’atina i ai le tatou aiga, o lona uiga e leai se nonofo fealofani o matou le fanau e maua, ona e mafua mai i a te outou le leaga, alofa mai, tu’u loa, ia ‘aua lava ne i o’u toe fa’alogo i ia fa’amatalaga fa’apea, na o le tina e le alofa na te faia ia tulaga.

“Po’o le a lava le mafua’aga na outou talanoaina ai lenei mea, ia outou va’ai muamua lava i a Petelo, e moni o le atali’i o Paulo, ae ua aoga si nei tama i le tausiga o outou uma lava, e le o fua tasi le tausi a Petelo na o lo’u tina, e leai, e tausi uma lava outou, pau lea o se Sa’o o se aiga, e tautua, e galo i a te outou na galuega lelei, ia outou alolofa mai, tu’u loa, ma e tanu ifo lava i le fale lenei la tatou fetufa’aiga.

“Tatou tatalo ma tatou talosia le taumafaiga a Salamasina ma si ona to’alua, ona aoga lea, ae o le fai o tala e malepelepe ai aiga, e le o se tulaga lea e tatau ona talanoa i ai ni tina o se aiga. O outou o fa’ata’ita’iga lea o matou le fanau, va’ai fo’i i le tulaga o lo’o i ai nei lo tatou aiga, ua ea, ua le toe faifai tala ni tagata, aisea, o le alofa o le Atua, ma Lana foa’i, ia tatou maua le agaga fa’afetai, ma talosia nai fanau o lo’o galulue i atunu’u mamao, ma fanau o lo’o i ta’ua, ina ia maua e i latou le filemu ma le malosi, ona aoga lea, ae alolofa mai, tu’u loa, ‘aua ne i toe faia.”

Ua sao le potu atoa i lea taimi, ae na va’aia e Vaitimaleata le tagi a le lo’omatua o Su’e, ua tau le mafai e le lo’omatua ona toe ‘ai. “Vaitimaleata, fa’afetai atu ia te oe si a matou tama, ua o matou ta’u tama atua oe, e moni uma lava lau talanoa mai, o a’u e to’atasi sa amataina le mataupu lenei, e pei ona e talanoa mai ai, alofa ma fa’amagalo mai matou, o a fo’i fa’amatalaga ua e fa’alogo i ai, ia e alofa, ia ‘aua ne i iloa e toeai’ina, ae maise o lou tina. O taimi fo’i o le vaivai o le mafaufau, ae ou te fa’afetai atu Vaitimaleata, i lou agaga malamalama ae maise o lou alofa mai ia matou tina leaga.

“Ou te fa’afetai atu fo’i, i lau fesoasoani malosi i si a’u tama o Salamasina ma si ona to’alua, fa’afetai tele Vaitimaleata i mea uma lava. Ae ia e alofa ma fa’amagalo mai a’u, i so’u sese i totonu o le aiga, ae ia e alofa mai, ia ‘aua lava ne i iloa e Sila lenei mea.”

E faia pea…