Vaega: 8

E i ai pea le fa’amoemoe maualuga, o lo’o aoina le masina i le soifua manuia o le atunu’u i lenei taeao fou. ina ua e alafa’i mai i le manuia i le tausiga alofa a lo tatou Matai oi le lagi. E ao ai ona o tatou fa’apea ifo, “Le Atua e, ia e alofa mai mo i matou i lenei aso, foa’i mai le loto fa’amagalo ia i matou ina ia mafai ai ona o matou lagona lou alofa i mea uma lava, a’o le vi’iga ma le fa’afetai e fo’i atu lava i a te Oe Tama e le aunoa, Amene.”

Ae alo maia, o le a toe fa’aauau atu la tatou tala mo lenei aso, ae ia manuia lou alo atu i feau ma galuega o lenei aso. Na muta mai la tatou tala, ina ua fai nei le finauga a le lo’omatua o Eseta ma le toeaina o Paulo. O lea la ua liliu nei le lo’omatua ma tau vala’au i lana tama fa’alogo gata o Samuelu, ae lilo i manatu o le lo’omatua, o lea ua alu le ti’eti’ega a Samuelu i luga o le pasi e aga’i atu i Tula.

Ae ua lelei, se i ma’ea le tatou lotu afiafi, ona fai lea o sa tatou talatalanoaga ma tama, ou te mana’o ia fa’ailoa mai e Petelo ona fo’i manatu ma ona fa’alogona, atonu e to’a malie ai mea uma.”

Ua na o le nofonofo nei o le toeaina o Paulo ma fa’asolosolo ona mafaufauga, ua ia toe manatua vave i lea taimi nai ona uso laiti e to’a fa, o lo’o Faifeau le isi tama ma lona to’alua, o isi tama e to’alua o lo’o i Amerika ma o la ta’ito’alua ma a la fanau, a’o lona uso la’ititi o Pati, o lo’o avea ma Pule A’oga i le isi nu’u, e fai lava sina mamao ma le nofoaga o lo’o latou i ai. Ua fai fo’i le to’alua o Pati, ma e to’a ono lana fanau. Ina ua tau mafaufauga o le toeaina i si ona tuafafine e to’atasi o Salamasina, na avea lea ma ala na maligi ifo ai ona loimata, ua fia va’ai i si ona tuafafine ua tolu nei masina e le i toe feiloa’i.

A’o le mea ua tupu, na ona u mai lava o le tua o Samuelu, alu atu lava i lalo o le toga fa’i, alu fa’asasa’o loa i le isi itu, alu atu ma alu ai lava e le i toe fo’i ane i lo latou aiga i le afiafi. A’o lea o lo’o i ai lava le manatu o le toeaina ma le lo’omatua, ai ua tai uma le togafa’i atoa ona sala ‘ese e Samuelu le lau sului.

O le taimi lea, ua toe titi lava ma’ea le faiga o le meatausami lea o lo’o feagai nei ma Petelo i tua i le umukuka. E fai atu lava mea a Petelo, ae ua le mafai lava lona ita tele i lona uso la’ititi o Samuelu. Ua alu nei le tomumu a Petelo i lea taimi, ma fai lava le mea’ai. “O le ali’i lea, se’i iloga e sau le mea mumu i le gutu ma isu, ona tu’u loa lea o lana amio. A ou pologa a’e i le taumafaiga o mea o le aiga, e fai o le faiga o mea ‘ai a le lo’omatua ma le toeaina, a’o le faiga o le ma’umaga, o mea fafaga, e na o le lua o’u lima e fai ai nei mea uma. Amuia ia, na o le alu sau, alu sau, ua pei o le tama fo’i lele, e tele mea o lo’o ia maua. Ae ai ana alu e fa’aaliali lona fia malosi e tau ai i le taua o lo’o fai i Iraki o sili, a’o le fia fa’aaliali lea o lona fia malosi i tagata o le nu’u, na o le tagata pala’ai na te faia uiga ia.” Na fa’ateia le tomumu le leoa a Petelo ina ua fa’alogo atu o sau le vala’au a lona tina, “Kelo, Kelo, ua a ea le mea’ai a lailai ifo tagata, ua leva le aso.”

E fetaui le vala’au mai a le lo’omatua, a’o lea e tau fe’ula le afi ua pe, na tali Petelo, “Se onosa’i mai tina, o lea e tau fa’amalu le moa, ua iloa fo’i, se’i iloga e fitu aso o saka fa’atoa malu, onosa’i mai, toetiti malu lelei, ona fai loa lea o le lua meatausami. Se fai ane se lua fa’agogo ma le toeaina e fetaui lava le uma ona lua pa’ilima ma le malu o le moa.”

E faia pea…