Ads by Google Ads by Google

Fagogo: O le Sone Vevela

Vaega: 86

 

Fa’amalo atu i le mamalu o le atunu’u i lenei taeao fou, malo le soifua, malo fo’i le onosa’i i faiva ma tiute o lo’o feagai ai i lenei aso. E ao ai ona o tatou fa’apea ifo, “Le Atua mamana e, o Oe o lo matou olataga ma lo matou maluapapa, a i’u lenei aso i le manuia, ona o matou fa’apea ifo lea, o i matou lava o ni tagata le aoga, ae ia vi’ia pea Oe Tama e fa’avavau, fa’avavau lava, Amene.”

 

Na muta mai la tatou tala, ina ua fa’aauau pea le feiloa’iga ma le fonotaga a ta’ita’i o le nofoaga a le Ami USAMRIID, ma e tolu lava fuafuaga ua manatu nei i ai ta’ita’i nei, e pei ona fa’ailoa mai e le tusi tala o Richard Preston.

 

E leai ni fuala’au fa’asaina e mafai ona togafitia ai le Ebola, e leai fo’i ni tui fa’agata e mafai ona taofia le Ebola, ma ua na o le manatu e tasi, o le ta pe uma lea o manuki o lo’o i totonu o le nofoaga o lo’o tausia ai i Reston.

 

E lua fuafuaga ua manatu nei i ai i ta’ita’i o le nofoaga lenei a le Ami, o le tapunia lea o le nofoaga o lo’o i ai manuki i Reston, pe fai fo’i tui e vave ai ona mamate,  ona tu’u ai pea lea o manuki e pe pe ai.

 

Ua leai lava se isi fuafuaga, ua na o le pau lea o le mea e tatau ona fai, ua malilie i ai ta’ita’i o le nofoaga o le USAMRIID. Na fa’apea le manatu o Nancy Jaxx, o lo’o i ai pea le virusi i totonu o le fale o lo’o i ai manuki i Reston, ma o le a le umi se taimi e nofo ai, ona pepesi ma a’afia ai loa lea o le tele o manuki o lo’o i ai. Na fa’apea ane nei Nancy i isi ta’ita’i o le Malo, o ia e fia alu i totonu o le fale o lo’o i ai manuki nei, na te fia iloa ma fai ana su’esu’ega pe moni ua mama’i manuki pe leai.

 

Fai mai ina ua uma ona fa’amatala e Nancy Jaxx le la su’esu’ega ma le ali’i foma’i o Eugene Johnson, na toe fesili nei i ai C.J. Peters, pe na fai ni fa’amaumauga e ala i la su’esu’ega ia. Na tali le tama’ita’i foma’i o Nancy Jaxx, “E leai.”

 

Ua pupula to’a ane nei i ai C.J Peters i lea taimi, ma toe fesili ane, pe aisea na le fa’alauiloa ai. Na manatu Nancy, e tele lava mafua’aga na le mafai ai ona fa’alauiloa ma fa’amaumau, ae e le o mana’o le tama’ita’i foma’i e fa’ailoa i le taimi lea. Na manatua nei e Nancy le isi mafua’aga, ona e faigata tele i le ali’i foma’i o Eugene Johnson ona tusitusi, o le isi itu, e fai lava si faigata o tusituisga ma fa’amaumauga.

 

A’o fa’agasolo pea le mataupu lenei, na lagona e le ali’i foma’i o Peter Jahrling, e sili pe a ‘aua ne i fa’ailoaina i luma o le fonotaga lenei e fa’apea, sa ia manavaina le ea, o lo’o i ai le virusi i totonu o le potu numera 4. O le manatu o le ali’i foma’i, afai ae fa’ailoa i le taimi lea, o lona uiga, e utia ai i le va lea, ma i’u ai ina velo ia e C.J Peters i totonu o le Slammer e nofonofo ai ma lagi ai sana pese malie.

 

E vevesi lava la le fonotaga lenei, ae ua matu’ai usi lava le fa’afofoga a le ali’i foma’i o Peter Jahrling i lea taimi, ua le toe fia faia sana fa’amatalaga, ua le toe fia au ai fo’i i le fonotaga lea. Fai mai le isi ona manatu, e leai, e le i maua ia i le fa’ama’i, ae manatua fo’i, o le fili lava o le tama, o le maua.

 

E faia pea…

 

Fa’aliliu: Akenese Ilalio Zec