Ads by Google Ads by Google

FAGOGO: O OE NA FILIFILIA E O’U MATUA

Vaega #9

[E toe faatalofa atu i uo ma paaga masani a  le tatou polokalame i lenei vaiaso, ae alo maia o le toe faaauauina lenei o le tatou polokalame mai le vaiaso na te’a nei, lea na gata mai i le taimi lea ua faailoa atu ai e le tamaloa o Pegi i lona to’alua, o ia ua tuli ma le aoga.]

E tagi lava le tamaloa o Pegi ma vau lona tino ae o Lineta ua na o le nofo ma pupula to’a i le faitoto’a o le la fale, e pei o se tagata gugu e le iloa tautala. A uma ona faliu i le isi itu ona toe faliu lea i le isi itu, ua saputu le mau mafaufauga i lona loto, ua le mapu foi lona mafaufau i le tau sailiina lea o se auala e mafai ai ona maua se mapusaga i lona tiga ua i ai. A’o nofonofo le fafine e le gagana i se upu, na te’i ina ua pa’i atu le lima o Pegi i lona tauau ma fesili atu, “Neta, o le a le mea lena ua e mafaufau loloto ai faapena, ua e ita ia te a’u,?” na pei lava e talanoa Pegi i le ogalaau, e tiga ona saputu ana fesili ae leai ma se ano ane i ai o le fafine, sei vagana ai le faasagasaga pea i fafo o le fale ma ona foliga le fiafia.

“E ke iloa alii Pegi, faakoa oo lea o lo’u olaga i se maasiasi uiga ese kalu oga ou ola mai oga o le mea ua oo i ai le ka aiga, ua ou maasiasi ma ua ou le koe fia i ai foi i legei olaga,” o upu ia o le tiga na tautala atu ai Lineta i lona to’alua. “Le mea kogu lava lea ga ou musu ou ke oo i ai, o le pologa o lo’u loko i se mea ou ke le’i maga’o i ai.” E tetele atu lava Lineta ae na o le punou lava o le tamaloa o Pegi e le tautala, ae na o le faalologo lava. “O le a le uiga o lana kala Neta ua e pologa i le mea eke le’i maga’o i ai,?” o le fesili tuli tatao atu lea a Pegi i le fafine, peitai e le’i toe tali le fafine sei vagana ai le maligi lemu ifo i lalo o ona loimata, ona ea lea i luga ma faapea atu i lona to’alua, “Pegi, e le o so’u loko ga ka gogofo ai ae ga mafua oga ka gogofo, o oe filifilia e o’u makua, e le o a’u, lea la ua ou igu i le filifiliga sa faia e o’u makua.”

E muliga foi le lauaitu o le maliu i le lauaitu lea e fai i totonu o le fale o loo nonofo ai le ulugalii i totonu o le aoga, e fai o le mafatia ina ua tutuli ese ma le aoga ae ua sili ai ona mafatia Pegi i le tala lea ua lafo atu e lona to’alua ia te ia.

E lua aso talu ona tuu atu le faaiuga a le aoga i le ulugalii ae tapena ese loa ma le lotoa ma toe fo’i atu i le aiga o Pegi e faamautu ai, ma sailiili ai se isi lumana’i lelei mo i laua. O Lineta na i’u lelei lana vasega 13 i le Kolisi o Vaipouli i Savai’i, ma o loo tele le avanoa e saili ai se isi lumana’i mo ia, ae o Pegi, o le mae’a ai o lana vasega 12 i le aoga faaitumalo a le latou nuu na ulufale ai loa i le aoga faafaifeau, ina ua pasi lana suega na su’e ai. “Talofa lau susuga i le faletua,” o upu ia na te’i ai le faalogo a Lineta ma faliu atu ai i tua e vaai poo ai lea o loo talanoa atu, ae na te’i ina ua faasaga atu i tua, o le alii o Amako. “Talofa Amako, o fea sa i ai,?”. Na umi se taimi o fetalia’i le tama ma le fafine o Lineta i luma o le polotito o le faleoloa o Amau i Apia ma toe faamanatu ai tala i aso a’o la aooga.