[Malo le faitau, malo fo’i le onosa’i, ae alo mai loa o le toe soso’oina lenei o la tatou tala fa’asolo, lea na gata mai i le vaiaso na te’a nei i le taimi lea ua aga’i atu nei le ta’avale a le ‘au ali’i leoleo ia o lo o tau sa’ilia Iose e tuli atu le va’a moe i le uafu i Salelologa.]

Na pei e lele le ta’avale a le ‘au ali’i leoleo ia o lo o ta’amilo i le tau sa’iliina o Iose, i le tulituliina atu lea o le va’a moe mo Apia, ona o lea ua latou mautinoa o Iose lea ua toe fo’i atu i lona aiga i Palisi, ma, afai latou te le mauaina le va’a moe, lona uiga o le a fa’afaigata fo’i la latou sa’iliga ina ne’i sui se isi nofoaga e sola aga’i i ai Iose, ae o se tulaga fa’anoanoa i ali’i leoleo ona e taunu’u atu loa i luga o le uafu i Salelologa ae o latou va’aia loa le keli o le va’a ua fuli mai lona tua ma le pasese e tumu i ta’avale ma tagata, lea ua fa’amoemoe mo le uafu i Mulifanua.

Se’i o tatou liliu atu lava i le tamaloa o Iose ma lana sola’aga lea ua taunu’u i lona aiga. Na ona mae’a lava o le mea’ai a Iose ma Fatu i le aoauli lea, toe fo’i loa Fatu i le fale ae ua ta’oto ane loa Iose ma fai lana malologa ona ua vaivai i le alu o le po e le’i moe ona o le popole i leoleo ia na ta’u ane e lona aiga ia te ia, o lo o o atu e sa’ili o ia i Savai’i, ae talu lava ona taunu’u le tamaloa i lona aiga, e le’i maua lava se la talanoaga ma si ona to’alua, peita’i na manatu le ali’i, o le avanoa lelei lea mo ia la te fa’asoa ai ma si ona to’alua i le tulaga o lana malaga atoa ai ma le mafua’aga o lona toe vave o’o mai.

“A’o oe ea ali’i Iose e pei lava o lo o i ai se mea o lo o mamafa i lou mafaufau, a ea,?” o le fesili lea a Lumepa i si ona to’alua ma a’apa atu ua lomilomi lona ulu, ae o Iose i le taimi lea, e na o le ta’oto lava i luga o le sofa pei se tagata ua sauni e fa’ao’o i ai le sala o le oti. “O a mai oe, o le a sau fa’alogo, e te ma’i a Iose,?” o le saputu atu lea o le mau fesili a le fafine i lona to’alua, ae na o le ta’oto lava o Iose e le gagana i se tala, se’i vagana ai ona mata o lo o pupula to’a aga’i i le fa’alo o lo latou fale’apa.

“Se ou ke le o ma’i,” o le tala tau le lagona lea a Iose ma nofo a’e lava i luga, ona me’i te isi lea i tua ma taumafai e fa’alagolago lona papatua i le puipui o le potu lea o lo o ta’oto ai, a’o nofo pea i luga o le sofa. “Ua ‘ese lava la’u faalogo, e pei lava ou ke ma’i ae leai so’u ma’i, ou ke kau fa’alogologo aku fo’i i lo’u ulu pei a malepe, e kiga ikukasi mai fo’i le piko i kua,” o le talatalanoa atu lea a le tamaloa i lona to’alua, ma tusi lava lona lima e fa’asino ai le vaega o lona ulu lea o lo o ia lagonaina le tiga, ma ua a’apa atu fo’i lima agalelei o le fafine o Lumepa ma taumafai e fofo ma lomilomi le ulu o si ona to’alua, ma tau to manatu i le mafua’aga ua ala ai ona tutupu nei suiga ia te ia. Na avea le le mautonu o le mafaufau o le fafine o Lumepa ma itu na te’i ai Iose o lo o nofo fa’alagolago pea lava i le puipui o le fale, ae oso atu le fesili a lona to’alua ia te ia ma fai atu, “A ali’i Iose, o lona uiga ea o oe na mafua ai ona oti si tamaloa o Pulusi,?”.