VAEGA 8

E faatalofa atu i le mamalu o le tatou aufaitau nusipepa i lenei taeao fou, taeao manuia, taeao toto’a.  Faamalo le onosa’i, faamalo le tauata’i.  Talitonu le faamoemoe o lo o faamalieina lau faitau I lenei auaunaga vaivai.  Ae ia se’e maia i ou se’etaga malu, se’i toe soso’o atu le tatou Fagogo.

“E sa’o lava le tala, o tagata ola o lo o fai mai e mafai ona talanoa I agaga o tagata maliliu, e na’o le pepelo lava ma le taufaasese,” o le tala lea a Tavita ma ia tago atu lava toso mai le tamaitai o Tepora ma o la faatopetope atu I le faitoto’a o le fale mata’aga.

Na toeititi lava taunuu Tavita ma Tepora I le faitoto’a ae faalava a’e loa se tagata I lo la auala ma valaau mai, “Malo le soifua Tepora! Ua fai sina leva!”  Ua tepa atu Tepora I le tagata lea e tu I o la luma, ae o le taimi lea ua fai sina malosi o le u’u o lona lima e Tavita.

“Oi, Talofa Iosefa.  O a mai le afioga?” o le tali atu lea a Tepora.

“O lea e lelei mea uma.  Ae ua leva tele ou te le’I vaai ia te oe, talu mai lava ia le ripoti sa lomia I le nusipepa…” E le’I uma mai le faamatalaga a Iosefa ae faasalavei e Tepora, “E leai ma se tala o na faamatalaga e moni, Iosefa.”

O le taimi lea ua faapupu tetele taliga o Tavita I le talanoaga a le to’alua, ona o lona fia iloa o le talaaga o le tamaitai o Tepora.

“Oi, a lea sa ma talanoa ma Luse, sa ia faamaonia le moni o faamatalaga I totonu o le nusipepa,” o a Iosefa lea.  “Oi, faapea a’u e le o oe se tagata e fiafia e su’e tala,” o le tala lea a Tepora ma amata ona savali atu aga’I I le faitoto’a.

“Na e faalogo I le maliu o Rasela?” o le valaau mai lea a Iosefa.

Ua tu Tepora ma liliu mai ia Iosefa, “Ioe, Talofa e i si na tamaitai,” o lana tali atu lea.

“Ou te talitonu o se tagata e maoa’e lona malamalama, I lo Tina, I le feso’ota’iga o agaga o tagata maliliu,” o le tala lea a Iosefa ma tilotilo aga’I I le potu na fai ai le polokalama a le tamaitai o Tina lea na nimo I le taimi na pe ai le moli.  “E foliga mai e le’I lelei le va o Tina ma Rasela.  Ma I la’u faalogo I tala o lo’o salalau, e foliga mai e tele nisi mea na tutupu I le fale o Rasela I le po na fasiotia ai o ia.”

“O le a le uiga o lau tala,” o le fesili lea a Tepora.

“O lo’o ta’ua le mauaina o se uati o taatia I tafatafa o Rasela, e foliga mai na pe tonu lava I le tulua o po ma ao.  O lo o iai se talitonuga ia I latou e talitonu I mea faapea, o le taimi tonu lava lena e aveesea ai le veli I le va o lalolagi o tagata ola ma tagata maliliu.”

E fai le tala lea a Iosefa, ae iloa atu e Tepora o lo’o ia u’uina se ata.  “O le a lena ata?” o le fesili a Tepora.

Sa fa’aali mai e Iosefa le ata ia Tepora ma Tavita ma o la iloa ai, o se ata o se tamaitai lalelei lavao lo o saofa’I luga o se nofoa ae o tua atu o ia, o iai se ata o se fafine e foliga mai ua maliu.

“E foliga mai o se ata sa tusia e se tagata e faaseseina ai le mamalu lautele,” o le tala lea a Tavita ma ia tago atu ua toso atu le lima o Tepora ma o la aga’I atu loa I fafo o le faitotoa.  

“O le a le uiga o le tala a Iosefa? O le a le tala na lomia I le nusipepa e faatatau ia oe?” o le fesili lea a Tavita a’o la savavali ese atu ma Tepora mai I le fale mata’aga.

E FAIA PEA