Ads by Google Ads by Google

Faia’oga o Amerika i le Falepa’epa’e

Ona o lo ua lata mai fo’i le vaiaso e fa’ataua ai e le vasega o fanau a’oga ma o latou matua, le vasega o Faia’oga ma la latou fo’i matafaioi tau’ave i aso ta’itasi, o lea ua fiafia ai le tama’ita’i sa pale i le tofi “Faia’oga o le Tausaga mo Amerika Samoa 2011-12, LitaMarie Timoteo, e fa’ailoa mai ni isi o mea sa fa’amatamata ai o ia, a’o i ai i lana malaga ta’amilo e tusa o le fa’aeaga sa ia maua mai lea tauvaga i la tatou nei teritori.

“O le aso 24 o Aperila, o le aso lea ua atofa mo la matou feiloa’iga ma le Peresetene o Amerika, Barrack Obama i totonu o le Fale Pa’epa’e, le fale e alaala ai le afioga le Peresetene o lenei malo tele.”

O lea ua mafai ai e ia ona fa’auia mai ata i luga o le emeli, po ’o le upega tafa’ilagi mo la tatou nusipepa ina ia fa’asalalauina ai. Ua avea fo’i o ia ma o tatou fofoga, ina ia mafai ona tatou ta’ito’aluaina lana malaga a’o i ai i totonu o lea maota tele ma le matagofie.

Ona o Amerika o le atunu’u e 51 ona setete ma ona teritori o lo ua aofia ai, o lea polokalama fa’apitoa mo faia’oga i le atunu’u, e matua lautele lava. Ua ia fa’aalia, o le vaiaso atoa sa fa’atulaga ai se polokalama fa’apitoa e le “CCSSO” po ’o le Konesula o Ta’ita’i o A’oga i Amerika ma Kamupani ma fa’alapotopotoga uma sa latou ofoina mai la latou fa’atupega o le malaga ta’amilo a faia’oga uma o le atunu’u sa manumalo i tauvaga a Faia'oga i a latou setete ma teritori mo le tausaga a’oga 2011 - 2012.

E aofia ai i lea malaga le asiasiga lea i le Maota o lo ’o alaala ai le Peresetene o Amerika ma lona aiga.

Na maua se avanoa o LitaMarie Timoteo, e pu’eina ai la latou ata ma le Peresetene ma le Failautusi o le CCSSO le susuga Arne Duncan e fa’afeiloa’ia ai le mamalu atoa o faia’oga uma o le atunu’u ma o se fiafiaga fo’i i le peresetene lea avanoa, aua sa ia saunoa fa’apitoa lava, i le galuega fa’afaia’oga, o se fa’amoemoega autu lea o le Malo mo a taeao.

O le ata o lo ’o pu’ea o LitaMarie ma le susuga Jon Quam - o le fa’atonu o le National Teacher of the Year Program ma le tama’ita’i faia’oga o Rebecca Mieliwocki, o le Fa’aoga o le tausaga a le Iunaite Setete o Amerika atoa. O lea ata sa pu’ea fo’i i totonu o le Maota Pa’epa’e.

O le isi ata o lo tatou faia’oga o le vasega 6 a Tafuna Elementary o LitaMarie, ua pu’ea lea ma le ali’i faia’oga o Jonathan Caberra o le faia’oga o le tausaga mai le Northern Mariannas ma le ali’i faia’oga o Chad Miller, o le ali’i faia’oga filifilia mo le tausaga 2012 mai le Setete o Hawaii. O lea taimi sa latou tatalia ai le avanoa e feiloa’i ai ma le susuga le Peresetene o Amerika, Barrack Hussein Obama. O lo ’o pu’ea fo’i lea ata i totonu o le falepa’epa’e.

Ia manuia le vaiaso o Faia’oga pe a to’ai taunu’u i ai le soifua laulelei ma le malosi o ali’i ma tama’ita’i faia’oga uma o le atunu’u!