O le ali'i amio valea e 42 tausaga lea na ia faia ni uiga mataga fa'asotoma i se alualutoto e na o le 10 tausaga le matua, ua fa'asala e le fa'amasinoga maualuga i le to'ese i Tafuna mo le 20 masina, o se vaega lea o lana fa'anofova'ava'aia e 5 tausaga. E 10 tausaga na fa'asala ai e le fa'amasinoga Felise na te tuliina i le to'ese i Tafuna, peita'i ua fa'amalumalu lona tuliina o lea fa'asalaga, fa'alagolago lea o lona usita'ia o poloa'iga uma o lona fa'anofova'ava'aia.Ua poloaina fo'i o ia ina ia fai sana siaki i le siama o le fa'ama'i o le HIV, pe le o a'afia ai lona tino, atoa ai ma le lesitalaina lea o lona igoa o le lisi o tagata ua fa'amaonia e le fa'amasinoga lo latou faia o amioga mataga i fanau teine e laiti i lalo o le tulafono.E ui sa manatu le fa'amasinoga e fa'afalepuipui le ali'i o Iakimo Felise i le umi e 15 tausaga, ina ua ia ioeina le solitulafono o lona faia lea o uiga fa'asotoma i se teineitiiti e 10 tausaga le matua, peita'i o fautuaga ma talosaga a loia e uiga i le tele o le ‘ava malosi sa i le tino o Felise i le taimi na tupu ai le fa'alavelave, na mafua ai loa ona finagalo le fa'amasinoga o le a fa'amama se fa'asalaga mo lenei ali'i.Na fa'ailoa e le ali'i fa'amasino o Lyle L. Richmond ia Felise, o le fa'asalaga lea ua tu'uina atu na te tuliina i le to'ese i Tafuna, o se fa'asalaga ua sili ona mama, pe a fuafua i le matuia o le gaoioiga sa ia faia, ae maise ai le laitiiti tele o le alualutoto na a'afia i lenei solitulafono.Na fa'ato'ese le ua molia i le fa'amasinoga e tusa ai o le solitulafono sa ia faia, sa ia fa'ato'ese fo'i i le aiga o le teineitiiti na a'afia, ma ia talosagaina ai i latou ina ia fa'amagalo se sese sa ia faia.Ae i lana fa'ato'esega i lona aiga, sa ia talosagaina ai se fa'amagaloga mo ia, ona ua ta'u valea le igoa ta'uleleia o le aiga ona o lana solitulafono.Na ta'utino Felise, o le a ia le toe tagofia le 'ava malosi, pe na te toe soliina fo'i se tulafono a le malo, ae o le a usita'i ma tausi i poloa'iga uma e avatu a le fa'amasinoga.Sa ia ta'utino fo'i e fa'apea, o le po lava na tula'i mai ai lenei fa'alavelave, sa ia fa'amavae atu ai loa i le ‘ava malosi, ina ua ia iloa e le aoga mo lona olaga.E tusa ai ma fa'amaumauga a le fa'amasinoga o lo 'o ta'ua ai, na amata inu mai lava Felise i le taeao seia o'o atu i le taimi na tula'i mai ai le fa'alavelave lea na a'afia ai lenei alualutoto.O le fale talimalo a le aiga o le teineitiiti na tula'i mai ai lenei fa'alavelave, ina ua aga'i atu le ua molia ma ia va'aia le teineitiiti na a'afia ma ni isi o tamaiti o lo 'o ta'aalo mai le fale talimalo, ona ia vala'au lea i le teineitiiti e alu atu i le mea o lo 'o tu mai ai.Ina ua taunu'u le teineitiiti, sa tago atu le ua molia ma toso atu i lalo o le sitepu o le fale talimalo, ma ia faia ai loa le solitulafono e ala i lona faia i ai o ni uiga mataga fa'asotoma, peita'i na vave ona taofi e le ua molia nei gaoioiga mataga sa ia faia, ina ua vala'au atu i ai se isi tagata ia te ia, e tu'u lana mea valea o lo 'o fai e laitiiti le teineitiiti o lo 'o fai i ai.Na finau le loia a Felise o Ruth Risch-Fuatagavi i le fa'amasinoga, i le tele lea o le galuega a le ‘ava malosi na faia i lenei solitulafono, peita'i na te'ena e le malo lea fa'afinauga, ona e talitonu le malo, o le fa'ai'uga na faia e Felise na mafua ai ona ia fa'atinoina le solitulafono, ae le o le ‘ava malosi.Saunoa le ali'i fa'amasino, o se tasi o itu mataga i lenei mata'upu, o le laitiiti tele o tausaga o le teineitiiti na a'afia, ma e talitonu fo'i le fa'amasinoga, o le a le toe mafai e le teineitiiti na a'afia ona toe fa'agalo le mea leaga sa faia e le ua molia ia te ia, ae o le a manatua pea i aso uma o lona olaga.O le vaega mulimuli lea o lo 'o totoe i lenei mata'upu e le'i faia i ai se fa'ai'uga a le fa'amasinoga, o tulaga i pepa nofomau o le ua molia, lea e le o manino mai i le taimi nei po 'o fea na fanau ai.Ua fautuaina e le fa'amasinoga loia ina ia sa'ili atu tulaga e pei ona mana'omia e le fa'amasinoga, ina ia mafai ai ona iloilo pe alaga tatau ona toe tipoti le ua molia i lona atunu'u na malaga mai ai, pe afai o ia o se tagata mai fafo.