E fa’atalofa atu i uo ma paaga masani a le tatou polokalame i lenei vaiaso, fa’amoemoe o lo o manuia mea uma i le lavea’iga a le Tapaau o le Lagi. Ae o le tatou Fagogo fou lenei ua taumafai e momoli atu, e fa’ato’a filemu ai lau silasila ao feagai ai ma tiute o aso ta’itasi.

O le upu o le alofa, o se upu lea e mafai ona ia fa’amatalaina gaioiga uma e fa’atino e le tagata soifua i so o se taimi na te ofo atu ai se mea, po o lona faia fo’i o se galuega po o se isi lava tulaga e fa’ailoa atu ai se lagona o lo o ia te ia. So o se aiga Samoa, e felefele le uiga o le alofa i le va feagai ai o tagata ta’itoatasi, aua fo’i o le alofa lea e fa’atino ai galuega uma ae fusia i tu ma aganu’u a Samoa. E fa’apena le ituaiga olaga na tupu a’e ai le teineititi o Menime i totonu o le aiga o le uso o lona tina, le fafine o Lesa ma lona to’alua ia Lafi, o se ulugali’i e amanaia e le nu’u atoa o Amouta i le motu tele i Savai’i, e le gata e tu lelei le aiga, ae o Lafi fo’i o se tasi o matai fai upu i totonu o le nu’u. E to’alua le fanau tama a le ulugali’i, to’atolu i le teineititi o Menime.

E pei ona masani ai aiga Samoa uma, e malu loa le afiafi ma ua tagi alisi o le po, e le toe fesiligia le taimi lea o faigalotu i aiga. E fa’alogoina i totonu o le nu’u le tau fai alalaga o aiga uma mai totonu o a latou faleo’o, faleapa ma fale papalagi i pese e fa’aleo ai le agaga fa’afetai ina ua i’u ma le manuia galuega o le aso, ao laulaututu taulele’a o le nu’u mo le latou leoleoga i afiafi ta’itasi. Ua pei o se pese malie i le fa’alogo a le fanau tama e toalua a Lafi ma le teineititi o Menime fa’atonuga masani ma upu apoapoa’i e masani ona tautala atu i ai lo latou tama, ma ua avea lea o se tapasa pito sili ona taua mo lo latou lumana’i.

O ni isi o gaioiga ua masani ona vaaia e tamaiti i totonu o le latou aiga, o aso Sa mulimuli uma lava o masina ta’itasi, e usuia ai le fono a taulele’a i le latou fale talimalo, aua fo’i o le atali’i matua o Lafi o lo o avea ma ta’ita’i taule’ale’a i le nu’u, o ia fo’i na te fa’amaopopoina taulele’a mo a latou fonotaga aemaise ai o a latou sailiga tupe o lo o fa’agasolo i aso To’ona’i ta’itasi, e fesoasoani ai i le fa’atupeina o so o se manaoga e manana’o i ai le vaega a taulele’a.

O le tama’ita’i o Menime, o lana lava masani o le alu i le fale o le faifeau i afiafi uma o aso Sa, atoa ai ma le fesoasoani i lona tina i feau o le aiga. A o o i taimi o aoga a le Faifeau ona teteu lea o le tama’ita’i i ana teuga faa Samoa moni ae savali fa’amaliuliu i le ogatotonu o le nu’u pe a alu i le fale o le faifeau, se’i vagana ai le tamaitiiti laititi, e le anoanoa lava e Lafi ma loa to’alua lona olaga ma ana mea e fai, se’i vagana lava le popole ina ne’i lavea pe a alu e tafafo ma isi ana uo. O le ali’i o Keli, o le uo mamae lea a le atali’i matua o Lafi, lea ua fa’aigoa e le tama’ita’i o Menime o lona tuagane, mao le tele lava o aso e tafao ai Keli i le fale o Lafi ona o le la mafutaga ma le alii matua o le toeaina, ae ua avea ma itu ua masani ai lana vaai ia Menime.