Ads by Google Ads by Google

FASI LE FAFINE MAFUA SIAKI LAFOGA

Na fa'ai’u puta le mulugaveve a se ulugali’i i le fa'ai'uga o le vaiaso na te’a nei, ina ua uma ane le vevesi ae loka ai ma le tamaloa i le falepuipui e fa'atali ai le aso e tula'i ai i luma o le fa'amasinoga fa'aitumalo, ina ua tu'ua'ia o ia i lona fasiina lea o si ona to’alua e mafua mai i le tupe o le lafoga.

O le vevesi e pei ona ta'ua e leoleo na amata mai ina ua maua e le fafine le tala, ua 'ave e lona to'alua le $700 mai le siaki o lana lafoga e totogi ai pili a ona matua ma amata ai loa ona fa'a’isa’isa lo la afiafi ma i’u ina tau 'upu ai.

Na fa'ailoa e le fafine i leoleo e fa'apea, e le gata na tu’i e lona to'alua o ia ae sa ia titinaina fo'i o ia,  ina ua mae'a se la tauga'upu e mafua mai i le tupe o le lafoga. O lo o tu'ua'ia fo'i le aga'i atu o le ua molia ma se fasi u’amea i lona to'alua, peita'i na taofi mai e ni isi o lo latou  aiga ma  maua ai loa ma le avanoa e sola 'ese ai le fafine mai le fale a lona to'alua.

Ae ina ua fesiligia e leoleo le ua molia e uiga i le fa'alavelave na ia ta'ua ai e fa'apea, ina ua mae'a la la'ua tauga'upu ma lona to'alua, sa ia fa'atonuina ai loa o ia e tago e fafaga le la tama e lua tausaga, peita'i sa le’i fa'alogo lona to'alua, ae na tago ma togi le tama i lalo, lea na mafua ai loa ona oso lona ita ma ia tu’iina ai loa o ia.

Ina ua mae'a su'esu'ega, sa toe 'ave'ese mai e leoleo le pepe mai le ua molia ae toe tu'u atu i lona to'alua, ae taofia ai loa o ia i le to'ese e fa'atali ai le taimi na tula'i ai i luma o le fa'amasinoga.

Na te'ena e le ua molia tu'uaiga o le fa'atupu vevesi i nofoaga faitele ma le fa'ao'olima i le tulaga tolu e fa'asaga ia te ia,  ina ua tula'i i luma o le fa'amasinoga i le vaiaso nei ma fa'atulaga ai loa le $200 e totogi ona fa'atoa mafai lea ona tatala o ia i tua mai le to'ese.

Afai ae mafai ona tatala o ia i tua mai le to'ese, ua poloaina o ia e le fa'amasinoga ina ia aua nei toe taumafai e fa'afeso'ota'i lona to'alua i so o se taimi, ma ia aua fo'i nei ona toe soliiina se isi tulafono a le malo, a ia auai i taimi uma e vala'au ai ona fa'amasinoga ma aua fo'i nei ona taumafai e sola 'ese ma le atunu'u.

Na ta'ua e le loia a le malo e fa'apea, o lo o fa'aauau pea a latou su'esu'ega e uiga i lenei mata'upu.