Ads by Google Ads by Google

FIU AIGA VAOVAO MA’I AITU FAFINE NOFOTANE

Na fiu se tasi o aiga i le itu i sisifo o le atunuu e tau vaovao ma faato’a filemu le ma’i aitu a se tasi o a latou fafine nofotane, ua matua le mafai lava ona taofiofi, ma tau foliga mai ai ua sili atu le malosi o le aitu nai lo tagata soifua.

O le itu e malie ai le tala e pei ona momoli mai e le au faitatala o le aiga i le Samoa News, talu ona nofotane le mafine lea i totonu o le aiga, e le’i tupu ai lava se ma’i tiapolo faapea, a ua atili ai ona le talitonu tagata o le aiga aemaise ai o matua o le tamaloa, ona o le latou fafine nofotane o se tasi o tagata e malosi i mafutaga tatalo, e le misi fo’i sana lotu i se aso Sa.

O le ma’i aitu a le fafine nofotane na alia’e mai ina ua lata lava ina mae’a le mafutaga tatalo a le aulotu i le aso Sa na te’a nei, ae faafuase’i loa ona ee le fafine i luga ma tafiti solo ma alaga o lona ulu o le a malepe.

“Sa pei o se mea malie i le vaai a tagata, peitai ina ua foliga e moni le mea o loo tupu, na amata ai loa ona tulioso atu nisi o le aulotu faatasi ai ma tagata o le aiga, ma taumafai e taofiofi le mafine ma tau faato’ato’a lona mafaufau, a ua atili ai ona alaga i luga ma fai mai, ‘lo’u ulu o le a malepe, lo’u ulu o le a malepe faamolemole.’

Fai mai le molimau, a fetagofi atu fafine o le aiga ma le aulotu e lomi le ulu o le fafine nofotane ae ee i luga ma fai mai, ‘auoi o le a ou mu, auoi o le a ou mu i le vevela,’ ae ta fetagofi atu fafine e tau tatala ese ona ofu ae ua faapipi’i i totonu ona lima ma taumafai e taofi ona ofu mai le tatala ese e fafine o le aulotu.

Toeititi lava atoa le 3 itula o fai le valea a le aitu ma ua motu faafuase’i atu ai ma le mafutaga tatalo a le aulotu lea o loo fai i le fale talimalo a le aiga lea.

Na avea le faa faigata ona tau faato’a filemu o le ma’i aitu a si mafine lea ma itu na fai ai loa le fautuaga a le toeaina matua o le aiga, o le tama foi lea o le to’alua o le mafine lea, e sili pe a vili se taavale falema’i e ave ai le fafine i le falema’i ne’i te’i ua tupu se faalavelave, peitai na ona faalogo mai lava o le aitu o le a ave o ia i le falema’i, te’i lava ua gase ifo i lalo ma vaaia loa ua filemu le fafine ua le toe pisa, ae ina ua maea le siaki sa fai i le falema’i i le po lea, na maua ai loa le au o le paipa, o si mafine lea ua tau le lua masina o lona ma’itaga.

Fai mai le molimau, na ona iloa lava e matua o le tamaloa o lea e ma’itaga le latou fafine,  e lei toe faia lava i ai se isi suesuega, ae na faatonu loa e uu lana ato pa’u ma saili se mea e alu i ai, ua uma foi le la aiga ma le la tama.

O le tamaloa o loo tuli sona faasalaga faafalepuipui i le toese i Tafuna i le taimi nei, ma ua atoa le 4 masina talu ona loka o ia i le falepuipui.

Na ata le molimau ma fai mai, e ese lava foi nei ituaiga aitu alii, e tiga lava ona iloa o si fafine e ma’itaga ae ulu lava i ai.