I le taeao o le aso Faraile na te’a nei na tu’ufa’atasia uma ai e le Samoa Tuna Processors le foa’i tele sa taua’aoina e ona tagata faigaluega fa’atasi ai ma le foai  a le Kamupani i a latou pusa apa i’a ua mae’a gaosia lelei e 100 pusa ta’i 12 apa i totonu.

“O lenei foa’i e avatu ma le agaga alofa i le atunu’u o Fiti lea sa matua iloga ona afaina i le afa na fa’ato’a mavae atu nei i le pasefika, o Winston. Ua tatou iloa o le afa lenei ua mae’a fa’amauina i le lalolagi, e matua maoa’e lona malosi ma e tele na’ua mea totino e afua mai fale ma soifua fo’i na maumau ai.” O se tala lea a le susuga Kalilimoku Hunt o le STP sa fa’ailoa mai i le sui o le tatou nusipepa.

O nisi o mea sa va’aia o aofia i nei pailate e tolu na tu’ufa’atasia, e aofia ai pusa saimin, suka, mea’ai tu’uapa, pusa masi, ma isi o mea lava ua silafia e le mamalu o le aufaigaluega, e mo’omia e aiga mo le tausiga o i latou i taimi pagatia i vaitau o afa.

O sui mamalu o le sosaiete a Fiti i Amerika Samoa sa auai, e aofia ai nisi o fa’afeagaiga ma tama fanau a lea atunu’u, sa latou o atu ina ia fa’afetaia atili le kamupani ma le aufaigaluega ua latou taua’aoina nei oloa, ma ua fa’ailoa fo’i lo latou agalelei e ala i nei foa’i.

O se tasi o tama’ita’i sa iloga ona tu malosi mo le taumafaiga ina ia vave taunu’u lenei fa’amomoli fa’atasi ma isi fa’amomoli ua mae’a tapena fo’i i le lotoa a le KS Mart i Tafuna ina ia faao’o atu i le Kamupani va’a a le Polynesia Shipping mo le utaina atu i Fiti, Rachael Whitcombe sa ia fa’ailoa mai, “O lenei foa’i, o le a tu’ufa’atasia i le pusa oloa tele ua mae’a fa’atulaga i le Lotoa a le KS Mart, lea ua ofo mai e tu’ufa’atasia ai oloa ma le a’ao foa’i a le atunu’u ina ia utaina atu ai i Fiti.”

Sa ia fa’ailoa mai fo’i, “E tauau e o’o ina atoa le fa o pusaoloa tetele e fa’atutumu, aua o le taimi nei, e le’i o’o uma atu isi meaalofa, ae ua taumafai ona vave fa’ate’a atu pailate nei e tolu a le STP ia mautinoa ua mae’a tumu ai le pusa oloa lona lua.”

O le ofo fo’i a le KS Mart ma lona taupulega, ua mafua ai ona tu’ufa’atasia i le latou lotoa nei pusa oloa uma, ae o le Kamupani a le Star Kist lea e fa’auia ai pusa oloa nei ona ua totogia e lea Kamupani ma le foa’i a le latou aufaigaluega le utaina o nei oloa i se tau fa’apitoa mai le Kamupani va’a a le Polynesia Shipping.

“O le aso To’ona’i le toe aso e ao ina fa’ao’o ane ai nei foa’i uma i le lotoa a le KS Mart, afai ae tuai, ona toe faia fo’i lea o se isi fuafuaga mulimuli, peita’i, mo le taimi nei, ua fa’atulaga e tapunia faitoto’a o pusa oloa i le itula e 2:00 i le aoauli, ma fa’ae’e loa i le va’a i lea lava aso, ae tu’uva’a ese atu le va’a oloa i le aso Sa.”