Ads by Google Ads by Google

FOLAFOLA FAIFEAU ANA FUSUAGA LUGA PULELA’A

Na tete’i se tasi o aulotu ina ua taatia ese e le latou faifeau le faamatalaina o le tusi a Paulo sa faaauau i ai lana lauga, ae faamatala taimi sa fusu ai i le maea fusu a le latou nuu i Savai’i i tausaga ua mavae.

Na taua e le molimau, na iite lava le aulotu e i ai le mea e le o fiafia ai le auauna a le Alii i le aulotu, fua i le sui o ona foliga vaaia i le taimi o taaloga a le autalavou i le lua aso Toonai talu ai, soso’o atu ai lava ma le aiga tuu faatasi a le mafutaga a tina o le ekalesia, e leai lava se suiga i foliga faauu o le alii faifeau, ae sosoo ai loa ma le aso Sa, tete’i tagata i upu o le lauga a le faifeau.

“Ga oga uma lava oga faikau o le kusi a Paulo ia Efeso, kapuni loa ma le kusi paia ae amaka oga faamakala e le faifeau kaimi a’o laikiki i le lakou guu i Savaii, sosoo ai ma le kaimi na avea ai o ia o se kasi o kama fusu faamoemoeiga a le guu seia oo lava i le kaimi ga fusu ai i kokogu o le maea fusu a Saiga i Savalalo i aso ia,” o le tala lea a le molimau ma ata.

“Pau le itu e le’i manino i le faamatalaga a le faifeau, na te le’i faailoaina i le aulotu pe fia ana fusuaga, fia malo fia fo’i faiaina, na pau lava lana tala i le aulotu, o ia sa fusu mai lava a’o laititi, ae na faatoa tuu lava ina ua valaauina o ia e avea ma faifefau o le talalelei,” o le tala lea a le molimau.

Fai mai le sui o le aulotu na momoliina maia le mataupu lea i le Samoa News, na paso le aulotu e mate le mafuaaga na ala ai ona sui le lauga a le faifeau i le aso Sa, na oo lava foi i alii Tiakono e masani ona mafuta a le leoleo mamoe, e leai ma se isi na ia mateia le mafuaaga o le le fiafia o lana susuga lea, peitai ina ua manino le mata o le vai, ua le fiafia le faifeau ina ua i maua tala, ua ave le tusi a le aulotu i le latou ofisa autu e talosagaina ai le sui atu o se isi faifeau e vaaia le aulotu, ona o le latou faifeau o loo i ai e le alu e asiasi i le aulotu, sei vagana ai lava le faatalitali i le aso Sa mo lana toona’i poo sana teutusi foi.

Na sa-o le aulotu i le taimi na faamatala ai e le faifeau le isi ana fusuaga lea na ia faatoilaloina ai le sui o Upolu ina ua sailia se siamupini a Samoa i le aupaga sa fusu ai.

“Pau le itu na gau ai tagata faalogologo, e le’i malo le faifeau ona ua oti lana paga, ae na malo le faifeau ina ua le mafai e lana paga ona faaauau le fusuaga ina ua oso le ma’i maliu.

Fai mai le faamatalaga a le molimau, e le o se taimi muamua lea ua fai ai e le latou faifeau le amio lea o le folafola o lona lima i le aulotu pe afai e i ai se mea e le fiafia ai.

“E le o toe solomuli le aulotu i le latou talosaga ua tuu avu i le ofisa autu ina ia sui se isi a latou faifeau,” o le tala lea a le molimau.

Pau le mea lea ua sauni i ai le aulotu, o le vaavaai lea pe i ai se isi gaioiga a le faifeau i tua atu o lana lauga le ana fai i le aso Sa, ona ua malamalama tagata, a le lava loa le onosa’i o le faifeau ua faaaoga ona lima.