Ads by Google Ads by Google

Fuafua Komiti Fa’afoe faaitiitia totogi o pili mo le falema’i

Ua i ai se fuafuaga a le Komiti Fa’afoe o le falema’i o le LBJ i Fagaalu, e le o toe mamao se taimi e faamamaluina loa sa latou fuafuaga ua faataoto mo le faaitiitia lea o le totogi mo pili a le falema’i, e pei ona latou fa’amaonia i se iloiloga sa faia i luma o le Komiti o le Soifua Maloloina a le maota o sui i le taeao ananafi.

 

Na taua e le Ta’ita’ifono o le Komiti Fa’afoe a le falema’i ia Mase Akapo e faapea, ua i ai le fa’amoemoe e tatau ona o o atu i le masina o Fepuari ua aloaia lea fuafuaga mo le faaitiitia lea o totogi mo pili a le falema’i.

 

E ui e le i faamautu e le tofa Mase i luma o le Komiti pe fia sa’o le aofa’i o le tupe lea o le a faaitiitia mo pili a le falema’i, ae sa ia faailoa e faapea, o lo o vaavaai le Komiti Faafoe e tatau ona faaitiitia le ta’i $5 mai pili eseese o lo o totogi e le atunuu i le falema’i.

 

“E pei ona silafia e le komiti, e eseese uma lava pili o lo o totogi e le atunuu i le falema’i, e ese le $20 o lo o totogi e vaai ai le foma’i, e ese fo’i isi pili o lo o totogi mo tautua eseese i totonu o le LBJ, ae o se tasi o fautuaga ua taoto i luma o le Komiti, o se tulaga lelei pe afai e faaitiitia le ta’i $5 mai soo se pili o lo o totogi e tagata i le falema’i, ina ia faamama avega i le tulaga faaletonu o lo o i ai le tamaoaiga i le taimi nei,” o le saunoaga lea a Mase i luma o le Komiti.

 

Taua e Mase e faapea, o se tasi o mafuaaga ua manatu ai le Komiti Faafoe e faia se suiga i totogi o pili, ona ua i ai ni isi o vaega tupe ua mafai e le LBJ ona maua mai i polokalame o lo o faatupe e le feterale, lea ua faamanuiaina ai Amerika Samoa.

 

O le talitonuga fo’i lea na faaalia e le Pulesili a le LBJ, susuga Joseph Davis Fleming e faatatau i le suiga o totogi o pili mo le falema’i, ina ia mafai ai ona avatu se faamama avega mo le atunuu.

 

Na taua e ni isi o afioga i faipule e aofia ai Puleleiite Liamatua Tufele Jr ma le Timusa Tini Lam Yuen le manaia o fuafuaga a le Komiti Faafoe e faaitiitia totogi o pili a le falema’i.

 

A’o le i malolo le maota o sui i le aso Gafua te’a nei mo le umi e lua vaiaso, o se tasi lenei o mataupu na laga e ni isi o faipule, ina ua faalogoina le faasea o ni isi o le atunuu i le tumau pea ona taugata o pili a le falema’i.

 

Na taua e ni isi o faipule e faapea, talu ai e le tutusa uma le malolosi o le tamaoaiga o aiga i le atunuu, e tatau ai i le Komiti Faafoe ma le pulega a le LBJ ona vaavaai i auala e gafatia ai e tagata uma ona totogi pili mo le falema’i.

 

Na fesili le afioga ia Puleleiite i le Pulesili o le falema’i, pe ua i ai ni suiga tetele ua ia faia mo le LBJ talu ona avea o ia ma pulesili mo le 9 masina.

 

Na tali Fleming e faapea, o lo o faaauau pea ona latou galulue ma le alii kovana faapea ai le Komiti Faafoe a le falema’i, mo le faataunuuina o ni isi o fuafuaga ua uma ona faataoto mo le falema’i, aemaise lava i le tulaga o le faaleleia o le tautua mo le soifua o le atunuu, atoa ai ma le faalelei atili o tautua a le falema’i.

 

I le faaiuga o le iloiloga, sa fautuaina ai e le komiti le pulega a le falema’i ina ia ave pea la latou faamuamua i le faaleleia o le latou auaunaga mo le atunuu, aemaise lava tulaga i le soifua o tagata.