O le agaga autu o le fonotaga lona lima i le va o Soifua Maloloina a Samoa e lua lea ua tali malo ai Amerika Samoa i le taimi nei, o le tau sailia lea o ni auala e puipuia ma fa’aitiitia ai le tele o le fa’ama’i pipisi i totonu o le atunu’u i le taimi nei.

E silia i le to’a 40 sui o le au malaga mai Samoa na taunu’u mai i le amataga o le vaiaso nei, ma o lo o auai i se fonotaga e lua aso lea o lo o fa’agasolo i le Fale Laumei i Utulei i le taimi nei, mo le fefa’asoaina o auala ma metotia e fa’aitiitia ai le tele o le mau gasegase le pipisi o lo o a’afia ai tagatanuu o Samoa e lua.

O se ‘aiga fiafia sa faia i le po o le aso Lua na te’a nei na fa’afeiloaia ai le taunu’u mai o le au malaga, lea na faatautaia e le Matagaluega o le Soifua Maloloina a le malo, sosoo ai loa ma le ‘ava o feiloaiga sa faia i le Fale Tele i le taeao ananafi, lea na ta’ita’ia e le Ofisa o Mataupu Tau Samoa, i lalo o le fa’amalumaluga a le afioga a Satele Galu Satele, o le Failautusi o le Faigamalo Fa’alotoifale.

O le au malaga o lo o aofia ai Fa’auluuluga o Ofisa ma Vaega eseese tau i le soifua maloloina, faapea ai faipule e to’afa o le Palemene a le malo Tuto’atasi o Samoa, i lalo o le taitaiga a le afioga i le alii faipule ia Tusa Misi Tupuola.

Na taua e Motusa Tuileama Nua ina ua fesiligia e le Samoa News i le taeao ananafi i le taua o lenei fonotaga, sa ia taua ai le faaauau pea lea ona galulue o vaega o soifua maloloina i le va o Samoa e lua, e tapena auala e puipuia ai le ono ulufale mai o fama’i pipisi i le atunuu, atoa ai ma le taumafai e faaitiitia le tele o le mau fa’ama’i le pipisi ua maitauina i le taimi nei.

“O le isi lava mafua’aga autu o le tele o le mau fa’ama’i le pipisi i le taimi nei, o le tele o le meaai o lo o tatou fa’aaogaina, e le gata o taumafa e tele ai le ga’o, ae o taumafa fo’i e le soifua maloloina ai tatou”, o le saunoaga lea a Motusa, le faatonu o le Soifua Maloloina a le teritori.

O le taua o lenei fonotaga e pei ona taua e Motusa, ua mafai ai fo’i ona fa’amausali puipuiga i tulaga o laina tuaoi a atunuu e lua, aua o le isi lea auala o lo o maitauina e mafai ona feavea’i ai fa’ama’i pipisi i le va o atunu’u e lua, e pei lava o le fa’ama’i mata lea na muamua pipisi i Samoa, e le i umi ae vaaia loa fo’i le matua fa’ateteleina i Amerika Samoa nei.

Na taua e le alii faipule ia Toesulusulu Cedric Schuster e fa’apea, o le isi auala sili e mafai ona soifua maloloina ai tagata Samoa, o le toaaga e faamalosi tino i le taeao ma le afiafi, ma faia gaioiga e faaitiitia ai le tino puta, o ni isi ia o auala ua tele ina fa’aaogaina e tagata Samoa i le taimi nei.

Na taua e le Pulesili fou o le Falema’i o le LBJ ia Taufete’e John Faumuina i lana saunoaga e tatala aloaia ai lenei fonotaga i le taeao ananafi e fa’apea, o le galulue fa’atasi o Samoa e lua e saili auala e faaitiitia ai fa’ama’i pipisi, o le auala sili lea e mafai ai ona fa’ato’ilalo nei mau gasegase i le atunuu.