Ads by Google Ads by Google

Ioe le pagota sa ia fa'ao'olima i se leoleopo

O le ali'i pagota lea na sosola mai i tua mai le toese i le po o le aso 22 Ianuari 2010 ma isi fo'i ali'i pagota e to'atolu, ma latou fa'ao'olima i se ali'i leoleopo o le faletupe o le ANZ Amerika Samoa Bank, atoa ai ma lo latou taumafai e fao fa'amalosi meatotino a le leoleopo, ua ia ta'utino i luma o le fa'amasinoga i le taeao ananafi, e fa'amaonia le moliaga a le malo o le fa'ao'olima i le tulaga muamua fa'asaga ia te ia.O le taeao ananafi na fofogaina ai i luma o le fa'amasinoga se maliliega ua sainia i le va o le malo ma le ali'i o David Maea, 20 tausaga le matua, lea fo'i o lo'o tuli sona fa'asalaga fa'afalepuipui e 2 tausaga le umi, ina ua fa’amaonia e le fa’amasinoga maualuga le moliaga o le talepe fale fa’asaga ia te ia, i lalo o se maliliega sa ia sainia ma le malo.O Maea na ulua’i tu’uaia e le malo i moliaga e fa o le talepe fale i le tulaga muamua, atoa ai ma le moliaga e tasi o le fa’aleagaina lea o mea molimau a le malo. O ia moliaga na afua mai ina ua ia osofaia ni fale se fa i Gataivai, Vailoa ma Tafuna, fa’apea ai ma lona talepeina o se faleoloa ma gaoia mai ai meatotino a aiga ma pisinisi e pei o DVD, iPod, telefoni, o se tinoitupe e $620, atoa ai ma lona sola lea i se pikiapu a se isi aiga.E 15 tausaga o lo’o fa’anofova’ava’aia ai o ia e le fa’amasinoga i lalo o poloaiga e ao ona ia usita’i i ai, ma o se tasi o ia poloaiga e aofia ai lona tuliina o tausaga e 5 i le toese, atoa ai ma le fa’asa lea ona ia toe soliina se isi tulafono.Peita’i i fa’amaumauga a le fa’amasinoga o lo’o taua ai, o le po o le aso 22 Ianuari 2010 na sosola ese ai Maea ma isi pagota e to’atolu e aofia ai Gasona Mafiti Moemoe ma Sefo Lemalu lea ua mae’a ona la tali ioe i le moliaga o le sosola ese lea mai le toese i Tafuna, ma le isi to’atasi o Pati Lepou lea o lo’o ia teena tu’uaiga uma a le malo, ma ua fa’atulaga ai loa lona fa’amasinoga autu e faia lea i le masina o Ianuari 2012.Na fa’ailoa e Lemalu i Leoleo, na mafua ona latou sosola ese mai le falepuipui, sa latou taumafai e saili se ta’avale latou te o ai i le fale o Lepou i Iliili. A’o latou aga’i atua i tafatafa o le faletupe o le ANZ i Tafuna, sa latou vaaia ai le leoleo o lo’o moe mai i luga o le nofoa, ona ia savali atu loa lea ma ta le ulu o le leoleopo i le laau ma pau ai i lalo, ae taumafai e fao fa’amalosi ese mai le ki o lana ta’avale peita’i sa musu le leoleopo.O lo’o tu’uaia e le malo Maea, o ia na tuiina le leoleopo o le naifi tipi falaoa ina ua mae’a ona fa’atonu o ia e Lepou, peita’i e le’i mamao le alu a le naifi i le tino o le leoleopoE tolu moliaga mamafa o lo'o tu'uaia ai e le malo le ali'i o Maea, ma o ia moliaga e aofia ai le faomea i le tulaga muamua, fa'ao'olima i le tulaga muamua, ma le sola ese lea mai le toese, ae i lalo o le maliliega aufa'atasi lea ua mae'a ona ia sainia ma le malo, ua ia tali ioe ai i le moliaga lona lua o le fa'ao'olima i le tulaga muamua, ae talosaga le malo i le fa'amasinoga ina ia solofua moliaga e lua o loo totoe ai, o le faomea ma le sola ese lea mai le toese.I le tali ioe ai o Maea i le moliaga o le fa'ao'olima i le tulaga muamua na ia ta'utino ai i luma o le fa'amasinoga e fa'apea, i se taimi o le aso 22 Ianuari 2010, sa ia taumafai e fa'ao'o le oti po'o ni manu'a tuga i le ali'i leoleopo o le faletupe, ma o lea gaioiga sa ia faia sa le'i tusa ai ma ala o le tulafono.Ua malie le malo ma le itu a Maea, o le a finau lava le itu ia i le fa'amasinoga mo se fa'asalaga e talafeagai mo le ua molia, peita'i ua malamalama ma iloa e Maea, tusa lava pe talosaga loia i le fa'amasinoga mo se fa'asalaga mama mo ia, e pule le fa'amasinoga pe talia pe teena ia fautuaga, aua o lo'o i ai i le fa'amasinoga le malosi e tu'uina mai ai so'o se fa'asalaga e talafeagai mo le solitulafono sa ia faia.Ua ia malamalama fo'i, afai e tu'uina mai se fa'asalaga a le fa'amasinoga ae le tusa ai ma lona loto, e le mafai ona toe suia lana tali ioe ua tu'uina atu i luma o le fa'amasinoga.O le aso Tofi o le vaiaso nei lea ua fa’amoemoe e toe fa’aauau ai le fofogaina o lenei maliliega ma tu’uina atu ai loa se fa’aiuga a le fa’amasinoga pe talia pe teena.