Ads by Google Ads by Google

IOE LE ULUGALI'I SA IA LA'UA MARIUANA

Ua ioeina nei e se ulugali'i talavou i luma o le Fa'amasinoga Maualuga lo la umia o mariuana, ina ua osofaia e leoleo i la'ua i le aso 1 Iuni 2011, i lalo o se poloa'iga sa tu'uina atu i ai e le Fa'amasinoga.O le vaiaso na te'a nei na ioeina ai e Angelica Hudson lona umia o mariuana, i lalo o se maliliega sa ia sainia ma le malo, ae solofua le moliaga o lona umia fa'asolitulafono o se fana, ae o lona to'alua o Sene sa ia fa'ailoa i le fa'amasinoga i le vaiaso nei, sa ia te ia fo'i se sikaleti mariuana ina ua aga'i atu leoleo ia te ia.E 'ese'ese nofoaga na maua i ai e leoleo le ulugali'i i le taeao o le aso 1 Iuni ina ua sa'ilia i la'ua. O le Angelica na maua e leoleo i totonu o le la ta'avale ma se isi ali'i talavou, lea na maua i ai mariuana ma se fana, ae o Sene na taofia mai i lona fale faigaluega ina ua aga'i atu i ai leoleo, ma maua ai fo'i se sikaleti mariuana i totonu o le taga o lona 'ofutino sa fai.Na muamua aga'i leoleo i le fale faigaluega o Sene ma fa'ailoa i ai le mafua'aga o la latou sa'iliga, fa'apea ma le tu'uina atu i ai o le kopi o le poloa'iga a le fa'amasinoga e sa'ilia ai lo la fale ma lona to'alua.Na va'aia e leoleo le le mautonu o Sene e ala i ana gaoioiga sa faia, ma i'u ai loa i lona tu'uina atu o se sikaleti mariuana sa i totonu o le taga o lona 'ofutino sa fai i leoleo. Sa fa'ailoa fo'i e Sene i leoleo, o ia e ula mariuana ae le o le pauta o'ona o le 'aisa.Ina ua aga'i atu Sene ma leoleo i lo la fale, sa va'aia ai e leoleo le la ta'avale i luma o le malae ta'alo i Tafuna, ma mulimuli atu ai loa leoleo se'ia afe le ta'avale i se tasi o faletupe i Tafuna, ma va'aia ai loa Angelica o lo 'o ia aveina le ta'avale, ma toe fa'atonuina ai loa le ua molia ina ia 'ave le ta'avale aga'i i le ofisa o leoleo i Tafuna, lea na sa'ilia ai loa e leoleo le tino atoa o le ta'avale e aofia ai ma totonu.I lea sa'iliga na maua i ai ni fana se lua, le ituaiga o le .357 ma le .38 fa'apea ai ma ni pulufana. Sa fa'apea fo'i ona maua ai i totonu o le ta'avale se taga pepa iila o lo 'o i ai lau mariuana, sikaleti mariuana ua uma ona ta'ai atoa ai ma le paipa e ula ai le 'aisa.Na ta'utino le ulugali'i i luma o le fa'amasinoga maualuga, e fa'amaonia tu'uaiga a le malo i lo la umia lea o ni vaega o le la'au fa'asaina o le mariuana, ma o lea gaoioiga sa la'ua faia e le tusa ai ma ala o le tulafono.O le moliaga lea ua ta'usalaina ai le ulugali'i lea, e mafai ona fa'asala ai se tasi i le to'ese mo le umi e le sili atu i le 5 tausaga, pe fa'asala fo'i i le salatupe e le sili atu i le $5,000, po 'o le fa'asala fo'i i fa'asalaga uma ia e lua.O le aso 8 o Tesema lea ua fa'atulaga e lau ai le fa'asalaga o Angelica ae o le aso 21 Tesema ua fa'amoemoe e lau ai le fa'asalaga o Sene. O lo 'o tumau pea poloa'iga o lo 'o tatala ai i tua le ulugali'i e fa'atali ai le aso e lau ai a la'ua fa'asalaga.