Pago Pago - AMERIKA SAMOA

O se tasi o mataupu tuga sa tula’i mai i le iloiloina e le Komiti Soofaatasi o le Paketi a le Fono Faitulafono, o le totogi fuafuaina mo pulesili o le Falema’i o le LBJ, mo le tausaga tupe fou 2024. 

Ua le gata i lea e tele foi isi mataupu sa tuufesiligia e sui o le Fono, ma faia ai le fa’aiuga a le komiti soofaatasi e toe faafoi le paketi a le falema’i ina ia faia suiga e tatau ai ona toe auina atu lea. O le vaiaso lenei sa fesiligia ai e le Komiti Soofaatasi a le Fono le tupe fa’asoasoa a le LBJ. 

Na tula’i i luma o le Komiti soofaatasi o le Paketi ma le Tala Faatatau a le Fono le Taitaifono o le Komiti Faafoe o le LBJ, Dr. Malouamaua Tuiolosega, Pule Sili (CEO) Dr. Akapusi Ledua ma le CFO Sefanaiya Kaumaitotoya, e tali fesili e uiga i le paketi a le falemai e $91.2 miliona, o se siitaga e silia i le $21 miliona fa'atusatusa i le $70 miliona tala fa'atatau o le tausaga 2023.

Na taua e le afioga i le faipule ia Larry Sanitoa e faapea, sa ia maitauina e $4 miliona le vaega tupe fetarale a le ARPA mo le Aufaigaluega ma sa ia fesiligia ai pe ua fuafua lea mo le faafaigaluegaina o tagata faigaluega ae pe o nei avanoa fou o auaunaga tau galuega po o konekarate.

Na fa’amanino e Kaumaitotoya e fa’apea, e itiiti lava ni filifiliga e mafai ona fai e foia ai le fa’afitauli tuga o le le lava o tausi soifua, ma o se tasi o itu e mafai ona fai, o le fa’a faigaluega lea mai fafo o le teritori.

Fai mai a ia, ua uma ona latou faafaigaluegaina ni tausimai se toafitu mai Thailand e ala i se kamupani faufautua i fafo atu o le teritori, 21 tausimai mai Fiti lea ua latou saunia e suʻe le suʻega faʻatulafonoina a le US tausimai, e faʻaaoga ai tupe a le ARPA. Na ia faʻaalia foi latou te faʻamoemoe e 13 tausimai mai Thailand.

Na fa’ailoa e Sanitoa e fa’apea, e tusa ai ma fa’amaumauga a le falema’i, o lo’o i ai le avanoa mo le Ofisa Sili - Executive Officer - i le va o le Komiti Fa’atonu ma le Pule Sili.

“O se tulaga fou lea,” o le faaaliga lea a Sanitoa. “Pe na tu'ufa'atasia e le Komiti Fa'atonu po'o le Ofisa Sili o Pulega? Ae o le a tonu le Ofisa o Pulega e ese mai i le Ofisa Sili o Pulega?

Na tali Dr. Tuiolosega e fa’apea, o le fa’avaeina o lea tofiga o le fa’ai’uga lea na faia e le Komiti Fa’afoe, ona e tele naua matafaioi a le Pulesili.

Na ia fa’amatala e fa’apea, o le Pulesili o lo o i ai nei Dr. Akapusi Ledua, o se foma’i sa avea ma Pule Sili le tumau i le taimi na tofia ai o ia e le Komiti Fa’afoe e avea ma Sui Pule Sili.

“E tofu le Ofisa Sili o Pulega ma Sui Tofia ma Ofisa Sili e fesoasoani ia te ia i le fa’atinoina o galuega lelei,” o le saunoaga lea a Dr. Tuiolosega. “O lea na tonu ai i le Komiti Fa’afoe e fesoasoani i le Pule Sili o Ledua i fafo ona o lo’o ia togafitia gasegase e maua ai tupe mo le falema’i, ae o lo’o fa’atinoina fo’i ona tiute o le CEO.”

Na faaalia foi e le taitaifono, e taua tele le sao o le Ofisa Sili i le pulega o le ofisa ma na ia faaalia ai o le taitai o le pulega sa tulitatao poo fea o iai le $4.5 miliona o tupe a le falemai i le Ofisa o Tupe na mafua ai ona maua o iugafono pepelo.

Ae na fesiligia e Sanitoa le pule a le Komiti Fa’afoe i le tofiaina o se Ofisa Fa’atonu ma ia ta’ua e fa’apea, i lona talitonuga, o le fa’amatalaga o galuega a lenei tofiga o se fa’aluaina lea o tiute o le Pule Sili.

“I lalo o le tulafono, e na’o le Komiti Fa’afoe a le LBJ e i ai le pule fa’aletulafono e tofia ai tofiga fa’afoe e tolu, o le Pule Sili, CMO ma le CFO,” o lana fa’aaliga lea. "O lena lava. Aua le faia se isi tulaga. E fia la le totogi o le Ofisa Sili?”

Na tali Dr. Tuiolosega e faapea, o le aofaiga o le konekarate na malilie i ai le latou Komiti Faafoe mo le avanoa e $134,000 ae o le tupe o lo o fuafua i le paketi o le tausaga tupe 2024 e na o le $80,000 faaopoopo. Na ia faamalamalama mai e faapea, “Ose konekarate tumaoti ma o le a totogi pe a tuuina atu se lipoti o galuega i le Komiti Faatino”.

Na fa’ailoa e Sanitoa e fa’apea, o Pule Sili e to’alua ua mavae atu, sa totogi totogi e $120,000 ma le $135,000. Peita’i, e tusa ai ma le tala fa’atatau o tupe a le falema’i, o le a totogi le Pule Sili o lo’o iai nei i le $220,000 fa’atasi ai ma penefiti fa’aopoopo.

“O a tulaga e te fa’aaogaina pe iai se fua fa’atatau e te fa’aaogaina e fa’atatau ai le totogi o le Pule Sili?” o lana fesili lea. “Aua e le’i leva atu ona iai le Pule Sili sa i ai i le konekarate mo le $120,000, a’o lea ua fa’a faigaluega le isi fou ae ua selau pasene le siitaga o lona totogi!”

Sa laga foi e le faipule o Tualauta le mataupu e uiga i taui (stipends) o sui o le komiti faafoe.

“Na ‘ou fa’alogo atu o taimi uma lava e fai ai se fono fa’apitoa a le Komiti Fa’afoe, e maua e tagata uma se tupe e $1,000. E moni lenei mea?” O le fesili lea a Sanitoa.

Na taua e Dr. Tuiolosega e fa’apea, e moni ma o lo o i totonu o latou aia tatau fa’atulafonoina o sui o le Komiti Fa’afoe e tatau ona totogi atu ai se taui mo le fono e ta’i lua vaiaso.

Na faamanino e Sanitoa e faapea, o lo o manino le tulafono e faatatau i taui a le Komiti Faafoe, e $6,000 i le tausaga mo le taitaifono, ae $5,000 mo sui o le Komiti Faafoe.

“E na’o le $27,000 o lo’o fa’aagaaga i totonu o le paketi mo fesoasoani a sui o le Komiti Fa’afoe,” o le fa’aaliga lea a Sanitoa. “Ae o lea ua uma ona fai sau filifiliga i le aofa’i o totogi ma le aofa’i o nei fonotaga fa’apitoa e o’o atu i le tulaga ua ova ai tupe. Afai la e tolu pe fa au fonotaga faapitoa i le masina, o fea la le tupe e totogi ai au tupe?”

Na taua e le sui fofoga fetalai ia Fetu Fetui Jr e fa’apea, o le itu mautinoa e le o lelei le tapenaina o le paketi e pei ona fa’atulaga, ma na ia fa’aagaina ai loa le talosaga ina ia toe fa’afo’i atu i le falema’i, ina ia toe fa’aleleia vaega o lo o mana’omia ai le fa’amanino atili o le paketi.

Na lagolagoina e le afioga i le ali’i senatoa ia Togiola Tulafono lea tulaga na laga e Fetui.  Ma e le’i lagolagoina foi e Togiola le faatinoina o ni tofiga faapolofesa se lua e se tagata e toatasi e faasino i le CEO o loo galue foi i vailaau.

“Afai o ia o le Pule Sili, e tatau ona tausisi i tiute o le Pule Sili, ae le o le togafitia o gasegase,” o le saunoaga lea a Togiola.