Pago Pago - AMERIKA SAMOA

I se fonotaga a le Matagaluega o le Soifua Maloloina ma le vaega o le au tusitala ma le au fa’asalalau i le aso ananafi, sa fa’ailoa ai Dr. Fiona Trail, o lo’o fa’anofo va’avaia i le taimi nei le au malaga lea na taunu’u mai i le po o le aso Gafua i le malaga a le Hawaiian Airlines mai Honolulu. 

Sa fa’ailoa e Dr. Trail, e 262 le aofaiga o le au malaga ma o lo’o nofo va’avaia i latou i le Tradewinds Hotel, Sadies by the Sea ma le Fatu-o-Aiga. 

O le siakiina muamua - test - mo le Koviti-19, sa faia i le aso ananafi mo i latou i le Sadies by the Sea ma Fatu-o-Aiga, ae o le taeao nei ua fa’atulaga mo i latou o lo’o i le Tradewinds Hotel - ona e toatele le au malaga o lo’o i ai i le Tradewinds. 

E pei ona masani ai le matagaluega, e faia se isi fonotaga ma le au tusitala pe afai e i ai se tasi ua fa’amonia e maua i le Koviti-19.

Fa’ailoa e Dr. Trail e sefulu aso e nofo va’avaia ai le au malaga, ae afai e i ai se tasi e fa’amonia ua pesia i le Koviti-19, ona nofo va’avaia lea mo le 14-aso.

Mo le au malaga sa taunu’u mai i Amerika Samoa mai Honolulu i le malaga a le Hawaiian Airlines i le aso 14 o Oketopa, ua fa’ailoa e Dr. Trail o le tagata malaga lea sa fa’amonia pesia i le Koviti-19 ma taofia ese o ia, sa tu’uina atu i lona aiga i le aso Gafua o le vaiaso lenei. 

Ae o le au malaga uma sa nofo va’avaaia i le Tradewinds Hotel, Sadies by the Sea ma Fatu-o-Aiga, sea tu’u atu i latou e fo’i i o latou aiga i le aso Faraile o le vaiaso ua te’a.

Sa fa’amaonia foi e le Matagaluega le toe fa’aauau lea le malaga atu o pasese mai Amerika Samoa i Samoa i malaga i aso Lulu ma aso Faraile, e pei ona fa’atagaina e le malo o Samoa.