Pago Pago, AMERIKA SAMOA

O le aotelega o le tinoitupe pe a tuufa’atasia fesoasoani uma ua toina mai le CARES Act mo Amerika Samoa talu ai le Coronavirus ua maua ai le $35.1 miliona.

I se pepa o fa’amatalaga, sa fa’ailoa e Kovana Lolo Matalasi Moliga lenei vaega tupe mai le fetarale, e pei ona i ai vaega o le tulafono fetarale CARES Act e fesoasoani mo setete ma teritori.

O le fa’aaogaina foi o lenei aotelega o le tupe o le a fa’amauina lelei aua ua mae’a fa’ailoa mai e tuu sa’o mai lava i le matagaluega o tupe a setete taitasi ma teritori ta’itasi lea vaega tupe o le siea o i latou e ala i le CARES Act.

Peita’i o le aotelega lea mai le CARES Act o le a to’esea lea mai le vaega tupe fo’i ua agava’a i ai setete ma teritori ta’itasi foi latou te maua mai le fa’atupega o taumafaiga e tete’e ma le Coronavirus. O lena vaega tupe mo setete me teritori o le a fuafua tatau i le aotelega o le setete i lona faitau aofai ma lona tele.

O le fa’aaogaina o lena vaega tupe e fa’atatau lea i le tele o le aafiaga o le setete poo le teritori i le Coronavirus ma le tele o le lusi i galuega uma sa fa’atautaia e puipuia ai le atunuu mai le Coronavirus. O le a mana’omia uma fa’amaumauga o nei galuega fa’atino ma le aofaiga o tinoitupe na fa’aalu ai talu mai Mati 1, 2020 se’ia oo ia Tesema 30, 2020.

Ua fa’ailoa e Lolo lona agaga fa’afetai tele i le pulega a Peresetene Trump ma le Sui Peresetene Mike Pence ma le la’ua nofoa’iga ona o lenei tinoitupe tele ua foa’ia. mo Amerika Samoa ma isi teritori ma setete uma, ina ia fesoasoani i le taua ma lenei fa’ama’i pipisi tele ae maise e le’i i ai sona vaifofo ua fa’aaogaina mo tagata ua maua ai. Ua mautinoa ua talia mana’oga o loo tuga ai i tatou o atumotu e le lava lona tamaoaiga e puipuia lelei ai i se taimi umi fa’apenei.

Ua fa’apea fo’i ona afea le Matagaluega o le Initeria i le fa’afetai a le tatou ta’ita’i, aua ua le misia lava ona latou fa’amalumalu ma fesoasoani mai i mea uma e fa’auia mo Amerika Samoa ma ona tagata i taimi uma.

E le’i galo fo’i i le tatou ta’ita’i le fa’afetai tele mo le FEMA, aua o i latou lava e nafa ma nei galuega toe fa’aleleia i le atunuu ma ua latou va’ai fo’i so’o se taimi e vala’auina ai e fa’auia mai se fesoasoani mai le Malo Tele, o lo’o latou oo mai ma taumafai e feutaga’i ma i tatou fa’alotoifale ina ia mautu ma lelei, sa’o ma ia fa’amaoni fo’i le fa’ao’o mai o nei alagamanuia uma mo tatou tagata ma le tatou Malo.

“O lo matou naunautaiga, ia le oo mai lava le Coronavirus ma avea nisi o soifua o si matou atunuu. Fa’afetai tele mo lo outou alolofa mai.” Sa ia manatua le sao o le susuga le failautusi o le Initieria Bernhardt le Failautusi a le USTreasury Muchin ma le isi to’atele o aofia i lenei fesoasoani, ae maise ai le tama fanau a Amerika Samoa i le lotolotoi o le Konekeresi Aumua Amata le tatou sui i le Konekeresi. Fa’afetai le galulue ma le lofo i lenei taumafaiga.”

Ua fa’ailoa mai e Aumua olo’o ua fa’aauau nei talanoaga o le CARES Act i Uosigitone ma e matele lenei talanoaga i le taumafaiga ina ia fa’aauau lea fo’i taumafaiga ona o lo’o tumau pea le oia o setete ma teritori o Amerika i lenei taua.

Ua faailoa mai e Aumua Amata, “O le taimi nei i Uosigitone i so’o se taumafaiga lava ina ia mae’a lelei ma pasia fo’i ina ia taua’aoina atu, e ao lava ina mua’i pasia lelei ma malilie i ai vaega fa’aupufai e lua, ma o se olo lea e ao ina sopoia i nei taumafaiga uma.”