OLYMPIA, Uosinitone - I le taumafaiga a le Ekalesia Samoa o le Amataga Fou i Olympia, Uosigitone ina ia saili tupe i le latou Posiva Fa’a-Tausala, e tofu sao i ai latou matafale e sefulu ma le ono. Sa matua fa’afiafiaina i latou e afua mai le amataga o le latou fa’amoemoe se’ia oo i le fa’ai’uga, aua ua mafai ona tuufa’atasia mai ai le aofaiga o le seleni e $45,374.00.

Mai le amataga sa fa’amalosia ai e le Komiti Fa’afoe o le sailiga, e ao ina mua’i sao le ta’i $2,000. a le Matafale e tasi e tatala ai latou Siva. O lona uiga ua manino lava mai le a’ao taumafai o le Ekalesia, e saofaga lava le $32,000.  I le po siva lea sa fa’ataunuuina i le afiafi o le aso To’ona’i 29 Aperila 2023 e afua i le 7:00 i le afiafi i le a’ai o Lacey.

O le nofoaga na fa’atino ai o le Thurston County Fairgrounds, i le 3054 Carpenter Road SE, Lacey WA, 98503.

O lea nofoaga atofa mo le fa’amoemoe sa fa’atumulia e le gata i aiga o matafale eseese o lea ekalesia a’o ua aofia ai fo’i ma latou uo mamae sa vala’aulia ina ia latou foa’i mo le latou fa’amoemoe. 

Ina ua fa’asolo pea lava Auaiga Matafale o le Amataga Fou e i ai nisi sa le pa’au ane mo le afiafi fiafia fa’atasi, ona ua i ai nisi o latou tuatuagia e le ma’alofia, ae ua fa’afetaia pea lava lo latou agaga i le sailiga ae a se malumalu o le latou Ekalesia, aua ua fa’ao’o ane a latou tusaga  ua mae’a tapena mo le fa’amoemoe.

Mai le latou sailiga talu ai sa tuufa’atasia ai e le komiti le aotelega e $38,000+ peita’i o lenei ua mae’a mautu mai le isi vaega lea e $45,374. i se fa’aopoopoga fa’atopetope lava. O lo latou naunauta’iga, ia maua le $250,000. mo le amataga o le latou malumalu. Ua fa’ailoa mai e se tasi o sui iloga, ua tauau lava ina atoa le $200,000. mai le sailgia lenei ua mae’a i le aso, o lona uiga pe toe tasi lava se latou una’iga e toe afuafua, ona mautu loa lea o le latou fa’amoemoe e amatalia le galuega o le latou malu mo le galuega a le Atua.

I le Amataga Fou NonDenominational Samoa Church, ua galulue ai le susuga Rev. Aleki ma Lanuola Tonuao. O le toe taualuga o le fa’amoemoe sa sausaunoa ai i la’ua mo le la’ua sao i le taumafaiga ma sa iloga ona manino le $3,408.00 le la’ua sausaunoaga. O le tele lava fo’i o matafale lautogia o le ekalesia sa ausia lava le $3,000. i a latou taumafaiga aua sa latou matua fa’atalau’ula mai i nai o latou aiga i Seattle, Tacoma, Federal Way, Kent ma Auburn ina ia alofagia, foa’i mo le latou fa’amoemoe maualuga, o se taulaga fo’i lea ua fia fai measili ai mo le Atua e ala i le galuega mo le tino o Keriso.

Na fa’afetaia le aofia uma na auai i se fa’afetai na tula’i lana susuga le Fa’afeagaiga taulagi ma fofogaina e fa’ai’u ai saunoaga o le afiafi a tamali’i.

“A mae’a se galuega ona tatou fa’apea ane lea, “O auauna le aoga lava i tatou!” Peita’i i e uma o tatou pelega ma uo mamae ua afifio mai ma foa’i mo lenei fa’amoemoe, tau ina ia fa’atutumu e le Atua mea ua fa’agaogaoina ona o le matou taumafai ia au se matou taumafaiga, ia tumati’e fo’i se Nila o le Atua i lenei ‘a’ai, ia iloga ai sa matou galulue punoua’i ma le fa’atuatua e alofaina matou taumafaiga uma, ia matua fa’ai’uina o matou faiva! Fa’afetai lo outou agalelei ma le tausoa i o matou taumafaiga uma, tatalo ia tali le Atua i la outou foa’i i ala eseese ae maise le seleni mamala, ua matou tiu ai ma fa’afetai i lenei aso. Fa’fetai fa’afetai tele lava!”