Ads by Google Ads by Google

6 masina fa’anofova’avaia Fiu John Saelua e le faamasinoga


[ata: foa'i]

O le lua vaiaso talu ai, ia Tesema 21, sa lauina ai le fa’asalaga o Fiu John Saelua, e le Fa’amasinoga Itumalo, e fa’anofova’avaaiga mo le ono masina.

 

O le masina ua te’a ia Novema, na tulai ai Fiu i luma o le afioga i le Faamasino ia Fiti Sunia mo le fofogaina o lana mataupu ma fa’ailoa ai se maliliega ua ma’ea ona sainia e le malo ma le itu tete’e.

 

I lalo o lea maliliega, lea foi ua ma’ea ona talia e le fa’amasinoga, sa tali ai Fiu e fa’apea e le o tete’e o ia i le moliaga mama o le fa’aoolima i le tulaga tolu. Sa talosagaina loa e le Fa’amasinoga se ripoti mai le Ofisa Faanofovaavaaia e tusa ai o lenei mataupu.

 

O le fa’asalaga o le moliaga mama e pei ona tuuaia ai Fiu, e fa’asala i le falepuipui mo le 15 aso ma le sala tupe e $300.

 

E fa’alua ona tolopoina le lauina o le fa’asalaga o Fiu ma o le aso 21 o Tesema sa tulai ai loa le ua molia mo le tuuina mai o le fa’asalaga a le Fa’amasinoga.

 

O le susuga i le ali’i loia ia Marcellus T. Uiagalelei o loo tula’i mo Fiu, ae o le ali’i loia tua ia David Vargas o loo tula’i mo le malo, i le mae’a ai lea ona tofia o ia e le Fa’amasinoga e avea ma Loia Tuto’atasi na te su’esu’eina le mataupu a Fiu.

 

Ae le’i lauina le fa’asalaga o Fiu, sa fa’ailoa e Vargas i le fa’amasinoga e fa’apea e i ai se isi mataupu mai le 2008 lea na fa’asala ai Fiu i le fa’atupu vevesi i nofoaga faitele. Sa ioeina e Uiagalelei lea mataupu ma saunoa e fa’apea ua ma’ea ona faamonia atu e Fiu lea tulaga.

 

Sa fa’ailoa foi e Uiagalelei i le fa’amasinoga e fa’apea e leai se fa’amatalaga a Fiu e faia ae le’i lauina lana fa’asalaga. Ae peita’i sa faailoa e Uiagalelei i le faamasinoga le tele o tausaga o le tautua a Fiu i lona aiga, nu’u, ekalesia ma le malo o Amerika Samoa.

 

Ua le gata i lea ua salamoa Fiu e pei o le mataupu o lo’o molia ai o ia ma sa ia fesoasoani i le malo i lana suesuega ma ma’ea ai lenei mataupu.

 

Ina ua maua le avanoa o le malo, sa saunoa Vargas e fa’apea o le fautuaga a le malo mo se fa’asalaga fa’anofovaavaia mo le ua molia.

 

Sa faia se malologa pu’upu’u a le fa’amasinoga a’o taumafai le afioga i le fa’amasino ia Sunia e aoina mai nisi o fa’amaumauga i le moliaga fa’asaga ia Fiu i le 2008 e pei ona ta’ua e Vargas.

 

Ina ua toe fa’aauau taualumaga a le fa’amasinoga, sa muamua saunoa Sunia i faamaumauga mai le lipoti a le Ofisa Faanofovaavaaia o lo’o fa’ailoa ai le tele o tausaga i le olaga galue o Fiu. “E le fesiligia le tele o tausaga o lana tautua i le nu’u, ekalesia ma lona aiga,” o se fa’amatalaga lea a le afioga i le ali’i fa’amasino.

 

Ua le gata i lea, e eseese mamao lava faamaumauga o le olaga tautua o Fiu o lo’o fa’ailoa mai e le lipoti a le  Ofisa Faanofovaavaaia ma le o lo’o i luma nei o le fa’amasinoga mo le lauina o lana fa’asalaga.

 

Ae peitai e ui i lea, i le fa’aiuga o le aso, o le solitulafono lava e tasi ma le fa’asalaga lava e tasi. Ma e ui ina mao’ae ma lelei fa’amaumauga mai le lipoti a le Ofisa Faanofovaavaaia fa’asaga ia Fiu, o le moliaga ua ta’usala ai le ua molia e tutusa lelei ma se solitulafono ua faia e se isi tagata, e pei o se faiaoga, ave pasi, po o se tasi e leai se galuega, ae ua molia i luma o le fa’amasino.

 

E ui foi sa fesoasoani le ua molia i le malo i le latou suesuega ae maise foi le matagofie o lipoti a le  Ofisa Faanofovaavaaia, ae o lona fa’aiuga lava e tasi - o le moliaga ua talia e le ua molia o se moliaga mama, o se vaega lea o le saunoaga a Sunia.

 

Ma lauina ai loa le fa’asalaga o Fiu, e ono masina e fa’anofovaavaiga ma ua fa’atonuina foi o ia e totogi le sala tupe e $100.

 

Sa fa’amanino foi e Sunia e fa’apea o le fa’asalaga ua tuuina atu ia Fiu, e leai sona eseese i fa’asalaga ua ma’ea ona faia e le fa’amasinoga i nisi foi ua ta’usala i lea lava ituaiga solitulafono. O se fa’ata’ita’i, e le’i leva atu nei ona fa’asalaina se ave pasi i se solitulafono fa’apea, e pei ona ta’usala ai Fiu.

 

O le tofa ia Fiu o se tasi o sui sinia i le Ofisa o le Kovana.

 

O le tagi fa’asaga ia Fiu na alia’e mai i le 2016, ina ua faila e se tama’ita’i sa nofo ai i lona aiga se tagi fa’asaga ia te ia, ona o amioga le tatau ma le le taupulea sa tu’uaia e lea tama’ita’i sa faia e Fiu ia te ia i le taimi o le latou mafutaga.

 

Na taua e le tama’ita’i lea e fa’apea, o le alia’e ai o le tu’uaiga fa’asaga ia Fiu, na fa’afuase’i ai ona taumafai ni ali’i Ofisa o Femalagaaiga e tipoti fa’amalosi i laua ma lona to’alua i Samoa e aunoa ma se solitulafono.

 

Ae na mafai ona taofia lenei gaioiga ina ua vaaia e se alii faigaluega mai le Ofisa o Femalagaaiga le tama’ita’i ma lona to’alua i luga o le va’a o le Lady Naomi i le aso lea, ma ia taofia ai loa le taumafaiga e fa’afo’i fa’amalosi i laua.

 

E tele tausaga o taulimaina e le Ofisa o Leoleo lenei mataupu peita’i e leai ma se taunuuga na alia’e mai ai. O le mafua’aga lea na tofia ai loa e le Fa’amasinoga Maualuga le ali’i loia ia Vargas e avea ma Loia Tuto’atasi na te suesueina i lenei mataupu.

 

Na maua le avanoa e fa’atalatalanoa ai e le Samoa News le tama’ita’i na a’afia i lenei mataupu, i le lua masina ua te’a, ma o ia lea o se Tina ua 33 ona tausaga.

 

Na taua e lea Tina e fa’apea, o le tausaga e 2014 na amata mai ai uiga le taupulea a Fiu ia te ia, e ala i lona lafo atu o upu e fa’ailoa atu ai lagona tu’inanau, seia oo lava i se taimi o le tausaga e 2016 ao pisi i faatosina o le palota ina ua tago atu Fiu i lona itutinosa i nofoaga lautele.

 

O lea gaioiga e pei ona taua e lea Tina na iloa atu e lona to’alua, ma fa’afuase’i ai loa ona fesili atu lona to’alua ia te ia, pe fai se la faanunumi ma Fiu. O iina na amata mai ai le vevesi i le va o ia ma lona to’alua, seia oo lava ina alia’e lenei mataupu.