Pago Pago - AMERIKA SAMOA

E amata ile vaiaso lenei ona faia aoga faasolosolo a le Matagaluega ole Puipuiga o le Saogalemu Lotoifale (ASDHS) i totonu o aoga a le teritori, e a’o ai le Tamoe, Lafi, ma le Tetee “RUN, HIDE or FIGHT” i se osofaiga tau fana e tupu.

Pei ona faamaonia e le fa’atonu sili ia Samana Semo Ve’ave’a ina ua fesiligia e le Samoa News. 

“O le a’oa’oga lea na afua, ina ua agia ane I luga o fesootaiga faaonapo nei, se taufaamata’u, e ono tupu i le lotoa ase a’oga maualuga I le masina talu ai. 

“Ae leai se fuafuaga a le Matagaluega o Aoga o iai, pe faapefea ona tali atu i se tulaga faapea e tupu mai, lea ua aapa mai ai le matou matagaluega. Ne’i tupu ane se faalavelave tau fana ise potu aoga, ae ua iloa e tatou fanau a’oga ma faiaoga ona tali atu iai.” 

Na saunoa foi le Faatonu: “tatou tatalo e le oo iai, ae ao lava ona sauni, e tali atu i suiga,”

Na ia ta’ua foi ile Samoa News, ua iai le latou fuafuaga sa tapena ma o le ‘a faalauiloa mole silafia lautele, pe’a oo ina tupu sea tulaga. 

O le faamata’u o ta’ua e le Faatonu, na fai ese tama aoga i se aoga maualuga i le atunu’u. Na tago ai faalauiloa I luga o le fesootaiga televave, le ata o le pepa o tusia ai le faamalolo le tumau o ia. Ma tusi ai le “Kakou Kaalo la le oki.” (Lets play with death)  ma le ata ose tama talavou o loo uu le fana/rifle.   

Na ta’ua e Samana i le faatalanoaga i luga ole telefoni ma le Samoa News , ole ata ole tamaititi aoga lea na tuu I luga o fesootaiga televave, “ole ata tuai”. 

Ole faasilasilaga lena na afua ai ona faila le faasea a le Aoga Maualuga a Tafuna I leoleo. 

Ma avane ai i luga o le latou itulau Facebook , ua faamauina e le aoga, e faamuamua lava le saogalemu, i taimi uma. 

Ole manatu o le Faatonu, ole “RUN, HIDE, poo le FIGHT”, tamo’e, lafi ma tetee atu, ose tulaga e alagatatau lava ona faailoa i totonu o aoga uma, mai aoga tuma’oti ma aoga ale malo, mai lava i aoga amata, aoga tulagalua, aoga maualuga, ma kolisi. 

“Ia silafia e faiaoga ona latou tali atu pe’a pa se fana i lona siosiomaga, ia iloa le auala e saogalemu ai tamaiti aoga, ma ia taumamao mai le oo atu ise na laasaga ma faaitiitia aafiaga o tagata. 

“Ia vave lau minoi mo lou saogalemu ile taimi lava ete faalogo ai ile pa ase fana pe ete vaai atu ua faamata’u tagata.  Fai vave lau faaiuga , poo fea ete saogalemu ai, poo le RUN, HIDE or FIGHT,  tamo’e , lafi poo le tetee atu”.

Na faamaonia e le Susuga a Faafetai Teofilo, ole Sui Faatonu ole Matagaluega o Aoga, I luma ole maota o sui, ile vaiaso talu ai, e leai   se fuafuaga a le Matagaluega o Aoga o iai,  pe’a tupu mai sea faaletonu pei ona tupu ai ile Aoga Maualuga a Tafuna. 

O le tamaititi aoga lea na tuua le faasilasilaga I luga o le Facebook, e leai se moliaga na faia iai, ona e laititi, ae sa valaau ai lea mataupu I luma o le Family and Drug Court, poo le Faamasinoga o Aiga ma Fualaau faasaina.  E faasa ai le au faasalalau ma tusitala.