Pago Pago - AMERIKA SAMOA

O le Aso Gafua, Fepuari 13, 2023, na fa’ataunu’u ai le ulua’i asiasiga aloaia a sui sinia o le Faalapotopotoga o le Soifua Maloloina a le Lalolagi (WHO) na afea ai Amerika Samoa. 

O lea aumalaga sa ta’ita’i mai e Dr. Kim Eva Dickson, faatasi ai ma nisi o sui o le latou vaega. Ma o Dr. Dickson ua tula’i mai nei o le taitai o le ofisa o WHO i Samoa. 

Ma sa fa’afeiloai ma fono le au malaga a le afioga i le Lutena Kovana, Talauega Eleasalo Ale, lea o loo avea ma taitai o le malo i lenei vaitau ‘ao malaga le afioga a le kovana sili i fonotaga i Amerika.

O le ofisa o le WHO i Apia, e aofia ai Samoa, Amerika Samoa, Cook Islands, Niue, ma Tokelau.

I se pepa o fa’amatalaga mai le Ofisa o le Kovana, o lo’o fa’ailoa ai e fa’apea, o Dr. Dickson ose Foma'i Soifua Maloloina ma toetoe 30 tausaga o le poto masani fa'avaomalo. 

Sa galue o ia i tulaga faaleatunuu ma faava o malo ma atunuu i Aferika, Asia, Europa, Amerika, ma ua i ai nei i le Pasefika.

I le avea ai o se vaega o lana taʻamilosaga aloaʻia, na tuʻuina atu ai e Dr. Dickson ana faʻamaoniga ma faʻaalia aloaia ai o ia o le Ulu o le WHO Office. Sa ia faamalo atu i le Sui Kovana, o ia foi Ta'ita'ifono o le Covid-19 Task Force ma o se fautua mo mataupu tau le Soifua Maloloina, mo le "lelei ona tali atu a Amerika Samoa i le faama'i o le COVID”.

“O le soifua maloloina o se vaega taua tele o le olaga,” o le tala a Talauega i le feiloaiga ma Dr. Dickson, a pei ona fa’ailoa i pepa o fa’amatalaga mai le Ofisa o le Kovana. 

“Matou te faamalo atu ia te outoue uma mo la outou lagolagosua i taimi faigata o le faama’i o le COVID, ma matou te faamoemoe e mafai ona faaauau pea ona fai paaga i auala e mafai ona fesoasoani ai i la outou misiona iinei i lenei itulagi ma Amerika Samoa,” o se isi lea saunoaga a Talauega. 

Na faaiuina le feiloaiga tomua i le fefaatauai o meaalofa ina ua tauaao e Dr. Dickson se ipu kava Samoa faatasi ai ma ona pepa aloaia, ma se kopi saini o le lomiga lata mai o le tusi a “Amerika Samoa 100 Years Under the United States Flag” mai ia Talauega. 

E to’afa isi sui o le WHO sa malaga mai ma Dr. Dickson.