Ads by Google Ads by Google

Aiga na mafatia i matagi malolosi


[ata: foa'i]

Talu ai o matagi malolosi ma timuga tetele na aafia ai le atunuu i le vaiaso ua te’a, soso’o ai ma afa e lua, o lea ua fa’amauina ai e i ai aiga ua fa’aleagaina o latou falenofo, ma o lo’o manomia e i latou se fesoasoani i nofoaga e nonofo ai.

 

Ua fa’amauina Tutuila e lua fale o aiga ua fa’aleagaina. O le fale Malaloa ma le fale i Pago pago. Peita’i e to’a ono aiga ua tele vaega o latou falenofo ua faaleagaina e ao ina fa’aleleia ae le’i toe nofoia e i latou, ma le to’a 58 o aiga o lo’o i ai lava ni mea ua fa’aleagaina o latou fale, e afua i le matagi nisi, e afua i lologa nisi, ae mafai ona vave fa’aleleia latou falenofo ma toe fa’aaoga pe a mae’a lipea nei fa’aletonu.

 

E 32 nisi aiga foi ua lisia mai ua a’afia o latou maota i lologa ma matagi, ae peita’i e mafai lava ona nofoia ma fa’atautaia galuega toe lipea o latou fale.

 

Ua fa’ailoa mai i le aso Lua na te’a nei, e i ai le asiasiga na alu i le Manu’atele i le aso Gafua ma ua mae’a toe taliu mai i lea lava aso lea au suesue mo fa’amaumauga mai o mea ua fa’aleagaina i motu o le Manuatele.

 

I Olosega lava latou, e tetele a’afiaga o le lologa ma le matagi na iloga ave’esea ai taualuga o se tasi o maota i lea afio’aga ma o le lologa fo’i na fa’aleagaina ai se tasi o falenofo i lea lava afio’aga fa’atasi ai ma fa’ato’aga ma tunoa.

 

Fa’ailoa e le fa’atonu o le Homeland Security Semo Veavea, “E ao ina fa’amae’a lelei le lipoti mo le Manuatele ona faatoa fa’asalalauina ai lea mo le silafia e le mamalu lautele o le atuu, ae ua matauina, ua amata ona toe galulue nisi o afio’aga i le Manu’atele e faaleleia nisi o mea na fa’aleagaina i le matagi ma timuga tetele.”

 

Ina ia vave ona toe fa’aleleia lea tulaga fa’aletonu mo aiga i Olosega, na galulue fa’atasi uma le afio’aga e elia le alavai e aga’i atu i le sami ina ia fa’aalu ese ai le suavai to’a mai timuga tetele.

 

Fa’ailoa e le fa’atonu o le Matagaluega o Fefa’ataua’iga, Keniseli Lafaele, “Ua mae’a ona matou fa’auia se tasi o aiga ua fa’aleagaina lo latou falenofo i matagi malolosi ma timuga i le polokalama o le Housing Urban Development HUD lea e fa’atautaia e le Faletupe o Atina’e, ae ua faauia fo’i nisi o fesoasoani mo i latou i le tausiga fa’aletino i le Matagalugea o Alagamanuia mo Tagata Lautele (DHSS), ina ia maua e i latou se fesaosaoni ao le’i mae’a fa’atula’ia lo latou fale e nonofo lelei ai.”

 

O le DHSS e latou e ofoina mai se fesoasoani e totogia ai se falenofo e nofoia e lenei aiga, a’o taumafai e toe fa’aleleia le latou fale ua fa’aleagaina nei i matagi malolosi ma timuga.

 

Fa’ailoa foi e Lafaele, “ua matou saunia se lisi o aiga ma ituaiga fa’aletonu ua mae’a lisia mai i o latou falenofo ua fa’aleagaina, ma o i matou fo’i o le a fa’auia atu ai aiga eseese nei i nisi vaega o tautua lautele a le malo, mai isi ofisa, o i latou na e mafai ona tali atu i o latou mana’omia.”