Ads by Google Ads by Google

Alo o Amerika Samoa galue i le kamupani a le Boeing i Amerika


Le susuga Taulapapa Ed Salatielu Su’e ua aofia fa’atasi i le laina o e maupaolo i le Auaiga Sa Elisara i Vailoatai. Lea ua taulamua ai le afioga le Alalagafa Tauanuu, le tofa Galoia, Taulapapa, le tina o Siaolele Elisara, le tofa Salima Eucharist ma le tamaitai faia’oga i le Laumua o le Liona ua fa’atasia i le ‘aiga fiafia ua tapena e lana susuga Taulapapa ma le Faletua i le la’ua maota. O se toona’i fiafia ae i’u i le fa’anoanoa aua o le a tu’ua e le to’atele le mafutaga mo le toe taliu mai i fanua aua galuega ma aiga. [ata: Leua Aiono Frost]

SEATTLE, Washington (Samoa News) - O se tasi o alo o Amerika Samoa, Taulapapa Edward Salatielu Leota, amatalia a’oa’oga i le Manulele Elementary ae soso’o ai ma le ulufale i Fagaitua High School ma faau’u mai ai. Ona soso’o lea ma le ulufale i le USArmy, mae’a le tautua ae maua ai le avanoa e faigaluega ai mo le Kamupani Fau Va’alele a le Boeing i Renton, Washington. 

 

“I le taimi nei ua avea nei a’u ma Flight Control Manager mo Va’alele uma a le Boeing o le ituaiga 737, i matou lotoa atoa i Renton, Washington,” o se tala lea a Taulapapa. 

 

Ua ia fa’ailoa fo’i, e i ai lava vaitaimi e feutaga’i ai ma ta’ita’i o Malo i nisi taimi e fetaui ai i le Iunaite Setete i fa’alavelave tau aiga, poo le oo mai fo’i i le atunuu. Peita’i e mautinoa, e le to’atele nisi o alo o le atunuu o Samoa e mafai ona oo tofiga e galulue ai, i ni tulaga fa’apenei i Kamupani Tetele nei, e fausia va’alele, ma o latou totoga fo’i.

 

I le taimi nei pe afai e tuufa’atasia tausaga talu ona faigaluega Taulapapa e afua mai le Vaega Au se’ia oo i le Boeing ua atoa lelei le 33 tausaga. O lo ua fa’ailoa mai fo’i, e i ai le fa’anaunauga ia te ia, e fia aoga fo’i i le atunuu pele, pe afai o le a mae’a le auaunaga o i ai, ma ua malolo mai nei faiva, ae ua mafaia ona fa’atulaia se isi taumafaiga e aoga ai i le atunuu. 

 

“I le taimi nei ua fa’aaoga mai isi agavaa, ina ia mafai ona fa’atautaia fa’atasi se ma’ua taumafaiga ma si o’u to’alua, ua fa’ato’a mae’a ona fa’apoopo mai se ma’ua pisinisi gaosi mea tausami susua ma le tofolelei, ua faaigoaina o le “Taste of Paradise” e mafai ona fa’atonu mai e tagata ma aiga i ni o latou fa’alavelave e fia saunia lelei a latou ‘aiga. O le isi lea agava’a o Taulapapa, e maua ona tusi pasi mai fa’apitoa i le gaosiga o mea’ai e fa’aigoaina o le French Cuisine,” o se tala mai lea a Ma Meleiseleisa le faletua. 

 

O Taulapapa o se alo e fa’asino ia Rev. Salatielu Leota o Fagaitua ma Siufaga Aiono Fina’i - Leota o Fasitoouta. O i la’ua nei sa tautua i le galuega a le Atua ma fa’ai’u mai i le la’ua auaunaga i Ofu, Manu’a. Ua faiilagi le folauga a nai ona matua nei, ae ua fa’afetaia lo la’ua sao i ona soifua a’oa’o lelei, ma ua iloga i lona soifuaga atoa lea lava ta’ita’iga sa soifua a’e ai.

 

O ona matua sa soifua a’e ai Taulapapa Ed o Su’e ma Vasa Tanupo, mai Nofoalii ma Faleatiu i Samoa. O lona uiga o lenei alo o le atunuu sa tele se taimi na soifua a’e ai i Ofu Manu’a ona o le auaunaga a ona matua Rev. Salatielu & Siufaga Leota. Ona soso’o lea ma le soifua a’e i Fagaitua ma fa’aiu mai ai a’oga maualuluga i’ina.

 

O ana uo mamae lava i’ina o le au uso o Alex, Carl ma Dennis Sene, ma e feso’ota’i atili tau aiga i le susuga John Kruse ma le faletua, e matele lava ina feso’ota’i ona o latou sa soifua fa’atasi a’e ma o loo tumau fo’i ona feso’ota’i i lenei vaitau, ma tau matau ni ala e mafai ai ona fesoasoani a’i i latou e tau fa’aleleia nisi o tautua lautele i le atunuu.

 

“O lo ua fiafia lava i matou e feso’ota’i ona o loo mafai fo’i ona talatalanoa ma fuafua tulaga o lo’o fesoota’i ai tomai i tulaga o va’alele ma telefoni, ala fo’i o pisinisi, peita’i e le’i mautu lava se fuafuaga, ae mafai lava ona fa’atino i se taimi e tatau ai ma atagia ai ni tautua lelei mo le atunuu,” o se tala lea a Taulapapa e tusa o a latou fa’auoga ua leva ona fa’atasi ma ua atagia o se ‘au uso i latou uma.

 

O le tautua a Taulapapa i lana Ekalesia, ua avea ai o ia ma Tiakono ma ua auai fo’i o le totino o le Aufaipese ma sa umi sona taimi na avea ai ma totino o le Autalavou a’o le’i avea ma Tiakono.

 

O le tamaita’i ua la’ua mafuta nei o se aiga fou, o Ma Meleiseleisa Elisara Reupena mai Vailoatai. Ua mae’a tuufa’atasia i la’ua i le sauniga mamalu o le fa’aipoipoga ia Setema 04, 2021 i le CCCAS i Tacoma, Washington. 

 

O Ma Meleiseleisa o loo avea ma Social Worker, poo se tasi e fesoasoani lea ia i latou e o atu ina ia sailiilia pe agava’a i penefiti poo alamanuia mai le setete.

 

“Toatele lava le mamalu o si tatou atunuu ua gasolo mai ma ua mafai ona fesoasoani i ai i ala e fa’atumu ai latou talosaga, ina ia tausia lelei fo’i latou aiga e fa’aaoga ai penefiti a lenei setete ae maise ai o alamanuia fa’aopoopo ona o le a’afiaga i le Covid-19 o le atunuu. A maua se avanoa e fesoasoani ai i nisi uma o le atunuu, o se avanoa lelei lea e tautuaina ai le mamalu lautele o tatou tagatanuu o lo’o soifua ma autova’a mai iinei,” o se tala lea ma le fiafia a le tamaitai o Ma Meleiseleisa

 

I lona soifua mai o se talavou i Amerika Samoa, sa iloga ona tautua lenei tamaitai i lona afio’aga e ala i le tinifu ma mea e fai i totonu o aiga, e ala i taimi o fa’alavelave ma fe’au masani tau tamaitai e fa’atino. 

 

I lona Malo sa filifilia o ia o le Tausala Lalelei o le Moso’oi, ma sa avea o ia ma Peresetene o le Asosi a Tamaiti A’oga o le Kolisi Tuufa’atasi a’o a’oga i le ASCC a’o aoga ai o ia.

 

Sa ia faaauau mai lea tulaga tausa’afia i le Setete nei o Washington ma ua auai fo’i i le Ekalesia EFKAS i Tacoma, ma ua iloga ai lana tautua i le Aufaipese ma le sui totino o le Autalavou. O lenei mafutaga ua fa’ataunuuina o se Aiga Fou, sa amata mai i totonu o le Ekalesia i Tacoma, na feiloa’i ai ma fa’amasani, ma ua avea ai fo’i le Tusi Pa’ia o se fa’avae i o la’ua olaga taumafai i lenei olaga.

 

O le tupuaga o lenei tamaitai ua mautinoa e afua mai i Vailoatai, Leone, Fagatogo, Fagasa, Olosega. O loo soifua pe le tama o le tamaitai, Rev. Eteuati Reupena Manase ma ua malolo manumalo mai le avea ai ma Faife’au Samoa i Tanugamanono Samoa. Ua toe faatasia i la’ua ma Minime Ete Reupena mai Uafato, Lufilufi, Leauva’a  ma Sapapalii ma ua maua ai nisi uso ma tuagane mo Ma Meleiseleisa ma Salima Eucharist Elisara Reupena.

 

Talu mai le taimi na maliu faafuase’i ai le tina o Meleiseleisa Elisara Reupena i Hawaii a’o itiiti le fanau, Salima Eucharist ma Ma Meleiseleisa, ona tausia loa lea e le tofa Fa’aua’a Kateferu Elisara Sr ma Siaolele Elisara i la’ua. O lona uiga, o lo’o soifua fo’i le tina ia Siaolele Elisara na te molimauina le aso fiafia o lona alo tamaitai o Ma Meleiseleisa.