Ads by Google Ads by Google

Aloa’ia fa’aiuga palotaga ia Novema 8, 2022 e le Ofisa o Palota


[ata: foa'i]

Pago Pago - AMERIKA SAMOA

Ua fa’amaonia e le Komesina o Palotaga a Amerika Samoa, ia Uiagalelei Lealofi, ua “aloaia” le fa’aiuga o le Faiga Palota Tutotonu o le 2022 ia Novema 8, mo le tofi o Amerika Samoa i le Konekeresi a Amerika; faipule o le Maota o Sui a Amerika Samoa;  fa’apea ma suiga i le Fa’avae o Amerika Samoa. 

O le aso e fa'aulu ai se fa’atu’iese, i le fa’aiuga o le faiga palota o le 4:30pm i le aso 15 o Novema ma e tusa ai ma le fa’ai’uga aloa’ia a le Ofisa o Faiga-Palota, e leai se isi na finau i le fa’aiuga o le palota e pei ona faia ia Novema aso 8.

E tusa ai ma tulafono o palotaga a Amerika Samoa, na fa’alauiloa ai e Uiagalelei e fa’apea, “ua mae’a le aso e fa’agata ai le finauina o fa’ai’uga mo le Faiga Palota Tutotonu 2022”.

Ma o le fa’aiuga aloaia o le palotaga sa fa’alauiloa fa’alauaitele e le Ofisa o Palota, i le te'a o le 5 I le afiafi o le Aso Lua, Novema 15. 

Mo le tofi faipule o Amerika Samoa i le Konekeresi, o le tamaitai faipule ia Uifa’atali Amata - na tauva e aunoa ma se isi sui tauva - na mauaina palota e 6,637, o le 46% lea o le aofaʻi o tagata palota e 14,313 sa lesitala i le Ofisa o Palota.

O lo’o fa’aalia i fa’amaumauga a le Ofisa o Palota, o le maualuga o le aofa’i o tagata lesitala palota – e 3,085 – o le Itumalo #15 – Tualauta, ae na o le 1,169 tagata na faia palota.

I le Maota o Sui o le Fono Faitulafono a Amerika Samoa, o le “I’uga Aloaia” na fa’amaonia mai ai le to’alima o faipule-filifilia fou: Shaun Onosai Va’a; Malaeoletalu Melesio Gurr; Tapai Alailepule Benjamin Vaivao; Sauasetoa Tautoloitua Ho Ching; ma Fiu John Saelua.

O i latou ia e to’alima, faatasi ai ma faipule ua toe filifilia o le a fa’atautoina o latou tofi a o lei o’o i le itula e 12 i le aoauli ia Ianuari 03, 2023 - e tusa ai ma tulafono tau palota - mo le Fono Faitulafono, Nofoaiga Lona 38.

Ma o le taimi foi lea, pe a ma’ea ona fa’atauto faipule, o le a filifilia ai e le Maota o Sui se Fofoga Fetalai.

O le afioga i le Fofoga Fetalai i le taimi nei, le afioga Savali Talavou Ale, o le faipule ua leva ona tautua i le maota, na toe filifilia lona nofoa mo le Itumalo 14 Alataua, ma ua fa’amoemoe e toe sailia fo’i le tofi ta’ita’i o le Maota o Sui i le nofoaiga fou.

E le’i i ai lava se taumatematega i le taimi nei e uiga i se isi faipule poo se faipule-filifilia, o loo fa’amoemoe e tauva mo le tofi Fofoga Fetalai. 

E pei o tausaga ua mavae, o le a auai le Komesina o Palotaga i le taimi o le sauniga o le fa’atautoina, e tu’uina atu ma fa’alauiloa fa’aiuga aloaia o le palota o le 2022. 

O le a misi mai le sui fou o le Maota o Sui i le nofoaiga fou o se faipule tamaitai ina ua le taulau fa’amoemoe o le afioga i le faipule ia Andra Samoa, lea sa toe tauva mo le  Itumalo #13, Fofo. Ua manumalo mai i le itumalo ia Fiu John Saelua, e avea ma faipule. 

Ae ui i lea, o le a iai pea i le Fono Faitulafono lona 38, sui tamaitai, le afioga i le Senetoa ia Sen. Fonoti Tafa’ifa Aufata i le Maota Maualuga. 

PALOTA SUIGA O LE FA’AVAE

E i ai ni nai suiga laiti i fa’ai’uga o le palota a le atunu’u i le 11 o teuteuga o le Fa’avae, ae e le’i suia ai le pasia ma le le taliaina o teuteuga e pei ona fa’alauiloa e le Ofisa o Palota i le aso 9 o Novema.

O le fa’aiuga aloaia mai teuteuga o le Fa’avae ua fa’amonia e pei ona pasia e le au palota:

• Tuuina atu i le Faipule o Swains le aia tatau e palota ai i le Maota o Sui; 56% na palota ioe.

• Suiga e auiliili ai faagasologa e faatula’i ai le Kovana poo le Kovana Lutena; 61% na palota ioe.

• Suia ai le “Government of American Samoa” i le “American Samoa Government”; 58% na palota ioe.

• Suia le Ma’uputasi i le Ma’oputasi; 58% na palota ioe.

• Suia Leasina ia “Leasina ma Aitulagi”; 56% na palota ioe.

O ni isi o fesili sa le’i pasia e le au palota, e aofia ai mataupu nei:

• O le a le toe i ai se pule a le Failautusi o le Initeria e sui ai faai’uga a le Faamasinoga Maualuga o Amerika Samoa.

• O le a le toe i ai se pule a le Failautusi o le Initeria e sui ai le fa’aleaogaina e le Fono Faitulafono le vito a le Kovana.

• Fa’aopoopo ai le Faipule e tasi (1) i le Ituau ma se Faipule e tasi (1) i Ma’upu (Tualauta). O le a sui ai le aofa’i o Faipule mai le 20 i le 22.

• Toe fa’aatoa ai le lima (5) o Senatoa o Manu’a. O le a sui ai le aofa’i o Senatoa mai le 18 i le 20.

Sa fa’afetaia e le Komesina o Palota le atunu’u lautele i le faia o a latou palota i lenei tausaga fa’apalota o le 2022.