Ads by Google Ads by Google

Amata aloaia le faamasinoga autu o le Pule o Le Aute Sports Bar


[ata: foa'i]
ausage@samoanews.com

Pago Pago, AMERIKA SAMOA

 

O le vaiaso nei lea na amata aloaia ai le faamasinoga autu o le Pule o le Pisiisi o Le Atue Sports Bar ia Tumuatasi Lefatia, poo MAMA fo’i e pei oa iloa ai o ia e le to’atele. O le aso 9 o Oketopa 2020 na faatulaga e faataunuu aloaia ai lenei mataupu, peita’i na toe tolopo mai i le aso 5 o Aperila na te’a nei ona o le tapunia ai o le atunuu mai puipuiga o le faama’i o le KOVITI-19.

 

O le vaiaso nei lea na toe tolopo mai ai loa le fa’aauauina o lenei mataupu ma faagasolo ai loa mo lenei vaiaso.

 

O le faamasinoga autu lenei o lo o faagasolo i luma o le afioga i le Faamasino sili lagolago ia Elvis P. Patea, ae lagolagosua i ai afioga i ali’i Faamasino Lagolago ia Suapaia J. Pereira ma Paepae I. Faiai.

 

O alii Loia e to’alua ia Marcellus Talaimalo Uiagalelei ma David Vargas o loo tulai mo Lefatia, ae o le tamaitai Loia Sili lagolago ia Kristine Soule o loo tula’i mo le malo.

 

O loo tu’uaia e le malo ia Lefatia i moliaga mamafa e fa e aofia ai le moliaga o le umia faasolitulafono o vaega o le pauta faasaina o le aisa; umia faasolitulafono o le pauta o le aisa ma le faamoemoe e tulei ma fa’atau atu i isi tagata; umia faasolitulafono o le laau faasaina o le mariuana, atoa ai ma le umia faasoltulafono o le mariuana ma le fa’amoemoe e tule’i ma faatau atu i isi tagata.

 

E to’a 7 sui o le Vaega Iloilo Iuga na filifilia i le aso Gafua na tea nei latou te iloiloina se faaiuga o lenei mataupu. E to’a 5 tamaitai ma alii e to’alua. 

 

A o lei amatalia aloaia taualumaga o lenei mataupu, na faafofoga le Faamasinoga i se talosaga mai le itu tete’e e talosagaina ai le Fa’amasinoga ina ia solofua le tagi faasaga ia Lefatia. Na teena e le Fa’amasinoga le faafinauga a le itu tete’e.

 

ULUA’I FOLASAGA A LE MALO

 

Na taua e le Loia a le malo i le Vaega Iloilo Iuga e faapea, o Amerika Samoa, o se tasi lea o teritori o loo pipisi ai le faama’i o le tagofia lea e tagata o fualaau faasaina o le aisa ma le mariuana. O lenei faama’i ua matua aafia ai le to’atele o soifua o tagata e aofia ai aiga ma tupulaga talavou.

 

O se faama’i ua leva ona pipisi ma o loo faaauau pea ona pipisi i le taimi nei i soo se vaega o le atunu’u, ma ua aafia ai le ola lelei ma le soifua manuia o le to’atele o tagatanu’u o le atunu’u. O tagata o loo pito sili ona manuia mai ai i lenei faama’i o le faatau atu o fualaau faasaina, o i latou o loo faatauina le fualaau ma le faamoemoe e maua mai ai se vaega tupe. O se tasi o i latou o loo aafia i lenei faama’i pipisi, o le Tina ia Tumuatasi Lefatia poo MAMA e pei ona iloa ai o ia e le to’atele.

 

O tagata o loo aafia i le faatuputeleina o lenei faama’i o fualaau faasaina e pei ona taua e le loia a le malo, o i latou o loo faatauina atu ma le faamoemoe e maua ai se penefiti tau tupe. O i latou foi nei, o ni tagata e le popole pe manatu alofa i le soifua manuia o tagata lautele.

 

I le taeao sesegi o le aso 12 o Setema 2018 e pei ona taua e Soule i le Vaega Iloiloga Iuga, na osofa’i ai e Leoleo Suesue ma latou a’upega le nofoaga autu o Le Aute Sports & Bar i Malaeloa mo le faatinoina o se poloaiga mai le Fa’amasinoga e saili ai lea nofoaga mo ni aupega mamafa ma ni pulufana.

 

O le poloaiga a le Fa’amasinoga e saili ai le nofoaga o Le Aute Sports & Bar, na faavae mai i luga o se talosaga a le Ofisa o Leoleo, ina ua manino i a latou suesuega, o le alii pagota lea na sola i tua mai le Toese i Tafuna i le masina o Aokuso 2018 ma fana se alii i Leone, o le tama a Lefatia, le Pule o Le Autu Sports & Bar. O le fana fo’i na fa’aaoga e faatino ai le solitulafono, e masalomia o se fana o loo nana i le nofoaga lea i Malaeloa.

 

Na taunuu Leoleo ma latou osofai loa le Fale o Lefatia ma lona aiga. Na taua e Soule i le Vaega Iloilo Iuga, ina ua osofa’i e Leoleo le fale o Lefatia, na latou maua ai fualaau faasaina i totonu o le potu moe na moe ai Lefatia.

 

Na faamanino atili e Soule i le Vaega Iloilo Iuga, o aisa ma mariuana na maua i totonu o le potu, na faamaonia ai le faanaunauga o Lefatia e tulei ma faatau atu fualaau faasaina i tagata lautele. 

 

Na taua atili e Soule, e tolu vaega eseese o le fale o Lefatia na osofa’i e Leoleo ona o le manatu e maua ai aupega ma pulufana o loo masalomia a fa’aaoga i le solitulafono lea na manu’a ai se alii i Leone. 

 

Na talosaga Soule i le Vaega Iloiloga ina ia latou iloilo toto’a mau faamaonia uma lava o le a folasia e le malo ma latou tuuina mai le faaiuga e faamaonia ai moliaga faasaga ia Lefatia. E tatau foi ona latou galulue faatasi ma le malo ina ia taofi le faama’i o fualaau faasaina o loo pipisi i le atunuu, ma taofia ai loa le toe pipisi o lenei faama’i.

 

Ina ua maua le avanoa o le Loia a Lefatia ia Uiagalelei, na ia faailoa ai i le Vaega Iloilo Iuga le tatau lea ona latou onosa’i ae faalogologo lelei i mau faamaonia o le a folasia e le malo, ina ia manino la latou silasila ma faia ai loa le faaiuga mautu e le nofosala Lefatia i nei solitulafono o loo tu’uaia ai o ia.

 

Saunoa Uiagalelei e faapea, soo se tagata lava e molia i se solitulafono, e tumau pea le nofo mama o ia e le nofosala, sei vagana ua faamaonia lana soltulafono.

 

O mau ua fuafua le malo e folasia, ua na o ni mau lava e faavae ai le latou tu’uaiga faasaga ia Lefatia, ae o le moni ma le faamaoni o lenei  mataupu, faatoa manino lava pe afai e mae’a ona folasia mau a le malo, aua o le latou galuega lena e tatau ona faia, o le aumai o a latou mau e lagolago ai le latou tagi faasaga ia Lefatia.

 

ULUA’I MOLIMAU

 

O le ulua’i molimau na valaau e le malo o le ali’i Suesue Faapitoa ia Justin Thompson, o se alii sa avea ma Leoleo Suesue mo le Ofisa o Leoleo mo le 5 tausaga. O le taimi nei, ua 4 vaiaso talu ona galue o se alii Suesue Faapitoa mo le Matagaluega e Puipuia le Saogalemu Lotoifale.

 

O le susuga a Thompson, o ia lea na autu ia i le suesueina o le mataupu a Lefatia. Na taua e Thompson e faapea, ina ua latou taunuu i le fale o Lefatia, na latou maua atu ai Lefatia o loo moe i totonu o le potu moe, faatasi ai ma ni pepe se to’alua faapea ai se tamaitai talavou se to’atasi.

 

O tua atu o le moega na moe ai Lefatia sa tu ai se tama’i fata e tuu ai moli. I luga o le fata na maua ai fualaau faasaina. 

 

NOFOVAAVAAIA

 

O Mati 2015 na osofa’i ai fo’i e Leoleo le fale o Lefatia ma maua ai fualaau faasaina, o pulufana faapea ai ma a’upega faasaina. E ui i le fualaau faasaina na maua, ae na suia e le malo i le moliaga o le umia o a’upega faasaina.

 

E 2 tausaga na nofovaavaaia ai Lefatia ina ua ta’usala o ia i le moliaga o le umia o se aupega mata’utia i lalo o tuutuuga na te tuliina aso e 90 i le Toese i Tafuna.

 

O isi tuutuuga e aofia le faasa lea ona ia toe tagofia fualaau faasaina, faasa ona ia toe umia aupega ma pulufana, a ia avea o ia ma tagatanu’u e tausisi i tulafono a le malo i taimi uma.

 

O lo o faagasolo pea le faamasinoga o Lefatia i luma o le Faamasinoga Maualuga i le taimi nei.