Ads by Google Ads by Google

Amata le Faamasinoga autu o le sa avea ma Pulesili Ofisa o Femalagaaiga


[ata: SN]
ausage@samoanews.com

Pago Pago - AMERIKA SAMOA

 

O le vaiaso nei lea na amata aloaia ai le fa’amasinoga autu o le ali’i sa avea ma Pulesili o le Ofisa o Femalagaaiga a le malo o Amerika Samoa, Peseta Dennis Fuimaono, lea o lo o tu’uaia i lona auai i se taumafaiga e faamalosi ai le toe faafo’i atu i Samoa o se ulugali’i, ina ia le mafai ai e le ulugalii ona faila le tagi faasaga i le tofa a Fiu Johnny Saelua, e tusa ai o ni uiga mataga sa ia faia i le fafine.

 

O le afioga i le ali’i Faamasino Sili lagolago ia Fiti Sunia o loo ia faafoeina lenei mataupu, ae lagolagosua i ai afioga i ali’i Fa’amasino ia Mamea Sala Jr ma Tunupopo A. Tunupopo.

 

O le ali’i Loia ia David Vargas na tofia e le Faamasinoga e tula’i mo le malo i lenei mataupu, ae o le susuga i le Matua ia Togiola T. A Tulafono o lo o tula’i mo Peseta, lea o lo o tatala i tua ina ua ia totogi le $15,000 e tatala ai o ia i tua.

 

O moliga o lo o tu’uaia ai Peseta e aofia ai le moliga o le ave faamalosi o se tagata, taumafai e faalavelave i se molimau, ma le taumafai e faalavelave i galuega a le malo, o solitulafono mamafa uma ia o le vaega C.

 

E pei ona taua e le malo i le latou tagi, o le susuga a Peseta na auai ma nisi i se taupulepulega e aveese faamalosi ma Amerika Samoa se ulugalii sa nonofo i le fale o Fiu Johnny Saelua i Leone, ae toe faafo’i faamalosi lea ulugali’i i Samoa e aunoa ma ni tusi folau poo ni pepa faamaonia e malaga ai.

 

O lea taumafaiga, ina ia le mafai ai e le ulugalii ona la faila se tagi faasaga ia Fiu.

 

O le ulua’i molimau a le malo na valaau, o le tofa a Fiu, lea sa avea ma Taitai o le Ofisa a le ali’i Kovana ia Lolo Moliga ua mavae atu. Ina ua fesiligia e le loia a le malo, na taua ai e Fiu i lana ulua’i folasaga e faapea, o le mafua’aga autu na talanoa ai ia Peseta mo se auala e aveese faamalosi atu ai ma le atunu’u le ulugali’i sa nonofo i lona fale ae toe faafo’i atu i Samoa, ina ia le mafai ai e le fafine ona faila lana tagi faasaga ia te ia.

 

Na taua e Fiu lona telefoni ia Peseta ma talanoa i ai e tusa ai o le mataupu, ma fautua atu ai Peseta ia te ia, e taoto atu le mataupu la te galulue ai ma le sponsor a le ulugali’i, o le tuafafine lea a Fiu, ia Sinu’u Saelua-Toelupe.

 

I lana molimau i luma o le Fa’amasinoga, na saunoa ai Fiu e faatatau i lona malamalama lea i le mataupu o lo o tu’uaia ai Peseta. Ina ua fesiligia e faatatau i le ulugali’i o loo ogatotonu i ai lenei mataupu, na saunoa ai le tofa Fiu e faapea, o le Tina o le fafine o lo o aafia i lenei mataupu sa nofo i lona aiga mo le tele o tausaga.

 

Mulimuli ane, na aumai ai loa e le Tina sa nofo i lona aiga lana tama teine ma latou nonofo faatasi ai lava i lona aiga i Leone. Na taua e Fiu se mataupu na tula’i mai i le va o ia ma le fafine na aafia, lea na tu’uaia ai e le fafine o ia i lona faia o uiga mataga ia te ia. 

 

Sa ia taua se taimi na faia ai se talanoaga a le latou aiga, lea na faailoa ai e le fafine uiga mataga sa ia faia ia te ia. O le faaiuga o lenei mataupu e pei ona taua e Fiu i lana molimau, na faila ai e le malo moliga faasaga ia te ia.

 

I le faaiuga o le tagi a le malo faasaga ia te ia, na latou sainia ai se maliliega e faai’u ai le mataupu. O le maliliega e pei ona saunoa Fiu, ua malie le malo latou te faaitiitia le mamafa o le solitulafono e molia ai o ia, pe afai e ioe atoatoa e molimau ma le faamaoni i le mataupu faasaga ia Peseta.

 

“O lau molimau la i le aso lenei (aso Gafua na te’a nei), o le faataunuuina lea o tuutuuga o le maliliega na sainia ma le malo,” o le fesili lea a Vargas ia Fiu. Na tali Fiu, “O lea lava”.

 

I le toe foi atu ai i le la talanoaga ma Peseta e faatatau i le faafoiina atu o le ulugalii i Samoa, na taua ai e Fiu le la talanoaga ma Peseta i luga o le telefoni, lea na ia faailoa i ai lona mana’o o lo o i ai.

 

“Na e faailoa ia Peseta lou mana’o sa i ai ina ia saili se auala e faafo’i ai le ulugalii i Samoa ina ia taofia ai i laua mai lo la faila o se tagi faasaga ia te oe,” o le fesili lea a Vargas a Fiu. Na tali Fiu, “Ou te manatuaina na ou talanoa i ai ma faailoa i ai le tulaga sa i lo’u loto”, o le saunoaga lea a Fiu.

 

“E sa’o la pe a ou faapea atu, o le manatu autu na mafua ai ona e vili ia Peseta e faatatau i le faafo’i faamalosi o le ulugalii i Samoa, ina ia taofia ai le ulugali’i mai le faila o se tagi faasaga ia te oe”, o le fesili lea a le alii loia ia Vargas.

 

Na tali Fiu, “O lea lava”.

 

“Na mafai la ona faafo’i faamalosi le ulugalii i Samoa,” o le fesili lea a Vargas ia Fiu.

 

Na tali Fiu, “E lei mafai ona faafo’i le fafine.”

 

Ina ua fesiligia e le Loia a Peseta ia Togiola T. A Tulafono le susuga a Fiu, pe na te manatua sa ia faailoa ia Peseta i le taimi o le la talanoaga i le telefoni, lona mana’o e faafo’i faamalosi le ulugalii sa nonofo i lona fale i Samoa, ina ia taofia ai i laua mai lo la faila o se tagi faasaga ia te ia, na tali Fiu, “Ou te talitonu na ou faailoa ia Peseta i le ma talanoaga lo’u mana’o sa i ai ina ia faafo’i faamalosi le ulugalii i Samoa”.

 

“O se tasi o tuutuuga na outou sainia ma le malo, o lou sau lea e te molimau ma le faamaoni mo le malo faasaga i le mataupu a Peseta,” o le fesili lea a Togiola ia Fiu.

 

Na tali Fiu,”O le tulaga lena sa i ai la matou maliliega ma le malo, na malilie le malo e faaitiitia le mamafa o le moliaga faasaga ia te a’u, i lalo o tuutuuga ou te molimau ma le faamaoni mo le latou itu pe a oo mai i le taimi o le faamasinoga”.

 

“O lau molimau la i le taimi lenei, o se auala e faamalie ai tuutuuga o le maliliega ina ia taofia ai le tuuina atu e le malo o se faasalaga faa falepuipui ia te oe,” o le isi lea fesili a Togiola.

 

Na tali le tofa Fiu, “O lea lava”.

 

Na toe fesili Togiola ia Fiu pe na faatonu e se isi o ia e aofia i lana faamatalaga tauto le mataupu e faatatau i lona lagona sa i ai e toe faafo’i le fafine na aafia i Samoa. Na tali Fiu, o le vaega lea o le latou talanoaga ma le loia a le malo faasaga ai Leoleo Suesue, ina ia aofia ai i lana faamatalaga le tulaga e pei ona taua.

 

O isi molimau e to’alua na valaau e le malo e aofia ai le tuafafine a Fiu ia Sinuu Toelupe ma lana tama teine.

 

O i laua ia na galulue ma alii Ofisa e to’alua mai le Ofisa o femalagaaiga i le tapenaina o le tusi e aloaia ai le faamutaina o le toe sponsor e Sinu’u o le ulugali’i, ma faigofie ai loa ona toe faafo’i le ulugali’i i Samoa.

 

Na taua e Sinu’u i le Faamasinoga lona manatua o le la talanoaga ma Peseta e faatatau i le mataupu lenei, ina ua ia fesiligia Peseta e faatatau i ona tiute o se sponsor i lalo o Tulafono Tau Femalagaaiga. 

 

Na taua e Toelupe le faailoa atu e Peseta ia te ia o le auala e tatau ona faatino, atoa ai ma le naunautaiga e vave faafo’i le ulugalii lenei i Samoa ina ia taofia ai i laua mai le la faila o le tagi faasaga ia Fiu.

 

I le aso 1 o Tesema 2016, na aga’i atu ai sui e to’alua o le Ofisa o Femalagaaiga ia Ita’i Sataua ma Jerry Gaisoa i Leone ma piki mai le ulugalii na aafia, ma aga’i atu loa i le Ofisa o le ASI (American Samoa Insurance) mo le pikiina mai o le tusi e faamuta ai le toe sponsor e Toelupe o le uluali’i.

 

E lei maua atu e alii Ofisa e to’alua ia Toelupe, sei vagana ai lana tama teine o loo faigaluega ai i le ASI. I le mae’a ai ona o se talanoaga puupuu, na faatonu mai i loa e Toelupe lana tama teine o loo i le ofisa o le ASI e tapena le tusi ma tago e saini ai lona igoa, ona o loo pisi o ia i isi tiute masani.

 

Ina ua fesiligia e Togiola le tama teine a Toelupe pe sa ia sainia le igoa o lona Tina o Toelupe i luga o le tusi lea na o ma alii ofisa o Femalagaaiga e aloaia ai le aveesea o le aia na te toe sponsor ina ai le ulugalii, na tali le molimau, o lea lava.

 

Ina ua toe fesiligia e Togiola le molimau, na ia taua ai loa, na te le o manatua pe na faatonu e lona Tina o ia na te sainia lona igoa. Pau le itu na te manatua, sa ia sainia le igoa o lona Tina i luga o le tusi.