Ads by Google Ads by Google

Amata le Faamasinoga Autu o se ali’i tu’uaia faia uiga mataga i lona afafine


[ata: SN]
ausage@samoanews.com

Pago Pago - AMERIKA SAMOA

 

O le vaiaso nei lea na amata aloaia ai i luma o le Fa’amasinoga Maualuga le faamasinoga autu o se ali’i o lo o tu’uaia i lona faia lea o uiga mataga i lona lava afafine moni e 16 tausaga le matua i le masina o Mati o le tausaga nei.

 

O le afioga i le ali’i Fa’amasino Sili le tumau ia Elvis P. Patea o lo o faatautaia lenei mataupu, ae lagolagosua i ai afioga i ali’i Fa’amasino Lagolago ia Suapaia Pereira ma Paepae I. Faiai.

 

O le ali’i Loia Fautua lagolago ai Ryan Anderson o lo o tula’i mo le ali’i ua molia, ae o le tamaitai Loia Sili lagolago ia Kristine Soule’ o lo o tula’i mo le itu a le malo. O le aso Gafua na te’a nei na filifilia ai sui e to’a 6 o le Vaega Iloilo Iuga, o i latou uma o Tamaitai.

 

E 4 moliga mamafa ua faila e le malo faasaga i le alii ua molia. O ia moliga e aofia ai le faiaiga faamalosi ma se tamaitai e laititi i le tulafono; faapea ai ma le moliga o le faia o uiga mataga faasotoma i se tamaitai talavou, o le vaega B lea o solitulafono mamafa, lea e mafai ona faasala ai se tasi i le Toese mai le 5 e oo atu i le 15 tausaga le umi; faapea ai le moliga o le tagofia o itutinosa o se tamaitai talavou, ma le moliga o le faia o feusuaiga ma se tamaitai e aiga pe tau toto i ai, o le vaega D lea o solitulafono mamafa, lea e mafai ona faasala ai se tasi i le Toese mo le umi e oo atu i le 5 tausaga, pe faasala i le salatupe e oo atu i le $5,000, poo le faasala foi i faasalaga uma ia e 2.

 

E $30,000 le tupe na faatulaga e le Fa’amasinoga e tatala ai le ua molia i tua. Talu mai le aso na pu’e faapagota ai e Leoleo le ua molia, o lo o taofia pea o ia i le Toese seia oo mai i le taimi nei, ina ua le mafai ona ia totogi le tupe na faatulaga e tatala ai o ia i tua mai le Toese.

 

I ulua’i folasaga a Loia e tusa ai o lenei mataupu, na finau ai le Loia a le malo e tau faamanino le faavae na mafua ai ona alia’e mai lenei mataupu faasaga i le alii ua molia, ina ua ia faia uiga mataga faasotoma i lona afafine moni lava i totonu o le potu.

 

Ae na finau le Loia a le ua molia e faapea, o le tagi ua faaulu e le malo atoa ai ma faamatalaga o lo o i ai, ua na o ni faamatalaga lava e tu’uaia ai le o loo ia tauaveina lana mataupu. O le tiute o le Vaega Iloilo Iuga, o le faafofoga faalelei ma mata’ituina uma mau faamaonia o le a folasia e le malo, ina ia manino lelei la latou faafofoga ma faia ai loa la latou faaiuga, e le nofosala le ua molia.

 

ULUA’I FAAFINAUGA A LE MALO

 

Na taua e le tamaitai Loia ia Soule’ e faapea, i le leva o le po i le aso 4 o Mati, 2021, na faateia ai se teineititi e 16 tausaga le matua ao moe i totonu o lona potu ina ua tago atu se tagata ia te ia ma taumafai e tatala ese ona lavalava ae taumafai e faamalosi o ia i uiga faafeusuaiga

 

Na pupula mata o le tamaitai ma ia iloa ai lona Tama o loo taoto atu i ona luga. Na tafiti solo le tamaitai ma taumafai e tulei ese lona Tama ae tau saili se avanoa e sola ese ai, peita’i na matua faigata ana gaioiga ona e malosi atu lona Tama ia te ia. Na taumafai malosi pea le tamaitai ma i’u ina mamulu ese lima o lona Tama, ma taumafai ai loa e tamo’e agai i le faitoto’a o le potu, peita’i e tago atu o loo loka le faitoto’a o le potu.

 

O le taimi lea na toe aapa atu ai le ua molia ma toso mai o ia ma ato i luga o le moega ma ia faatino ai loa uiga mataga ia te ia. Na tau le lima o le tamaitai i se peni sa taatia i lalo o le fola o le fale, ma ia aumai ma tui ai le ua o lona Tama.

 

O le taimi lea na mafai ai loa ona matala ese lima o lona Tama ae maua ai loa le avanoa e alu ai i fafo o le potu ma tamo’e i le potu a lona grandmother (Tina o lona Tama) ma faailoa i ai le mea ua tupu ia te ia.

 

Na taua e Soule’ i le vaega iloilo iuga e faapea, o le malo o lo o taoto ai le mamafa o le galuega, e ala i le tatau lea ona latou folasia mau faamaonia e lagolago ai le latou tagi faasaga i le alii ua molia. Ae i le tulaga ua i ai mau faamaonia o le mataupu, na taua ai e Soule’ lona mautinoa lelei, ua lava ma totoe mau faamaonia ua sauni le malo e folasia e ta’usala ai le ua molia.

Sa ia talosaga i le vaega iloilo iuga ina ia faafofoga faalelei i mau faamaonia ua sauni le malo e folasia, ma ia latou toe faafoi mai le faaiuga e ta’usala ai le ua molia i lona faia o uiga. mataga i lona lava afafine moni.

 

ULUA’I FINAUGA A LE ITU TETE’E

 

Na muamua faafetai le ali’i Loia Fautua ia Anderson i le vaega iloilo iuga e tusa ai o le fa’aavanoaina o le latou taimi e avea ai i latou ma Faamasino o lenei mataupu. E ui o lea ua folasia e le malo la latou faamatalaga amata, peita’i na taua e Anderson le tumau pea lea o le le nofosala o le alii ua molia i lenei mataupu.

 

I le masina o Mati o le tausaga nei e pei ona taua e Anderson i lana ulua’i folasaga, na telefoni ai Leoleo i le alii ua molia ma faailoa i ai se tagi ua faaulu e lona afafine ma lona aunty faasaga ia te ia, ma ua tatau ai ona oo atu i le Ofisa o Leoleo i Tafuna mo le faatalatalanoaina o lea mataupu.

 

Na taua e Anderson le usitaia e le ua molia o le faatonuga a Leoleo ma aga’i atu ai loa i le Ofisa o Leoleo i Tafuna mo le faatalanoaina o le mataupu. Na faailoa e le ua molia i Leoleo lona le iloa o se mea na tupu i le va o ia ma lona afafine, na te le manatuaina fo’i se taimi na ia faia ai ni uiga mataga faapea i lona afafine. 

 

Na taua e le ali’i Loia le tumau pea o le tali tete’e a le ua molia i tu’uaiga faasaga ia te ia, ma o lo o faaauau pea lona le nofosala talu mai le masina o Mati o le tausaga nei seia oo mai i le taimi nei. Sa ia talosaga i le vaega iloilo iuga ina ia faafofoga faalelei i mau faamaonia o le a folasia e le malo, ma latou faia ai loa se faaiuga e le nofosala le ua molia i le tagi a le malo faasaga ia te ia.

 

ULUA’I MOLIMAU A LE MALO

 

E na o le tasi lava le molimau na valaau e le malo mo le latou mataupu, o le molimau lea a le tamaitai na aafia.

 

A o le i valaau e le malo le tamaitai mo lana molimau, na fesili le afioga i le ali’i Faamasino ia Patea i le loia a le malo, poo ai le latou molimau lea laa valaau, poo se tagata matua poo se tamaititi e laititi i lalo o le tulafono. Na tali le itu a le malo, o le tamaitai e laititi i lalo o le tulafono.

 

O le taimi lea na faaalia ai loa e le afioga i le ali’i Faamasino ia Elvis le talia e le Faamasinoga o se talosaga na faaulu e le malo ina ia taofia le auai o sui o le Vaega Faasalalau i totonu o le potu faamasino, ma tuuina mai i loa le poloaiga a le Fa’amasinoga i sui Faasalalau ina ia tuua le potu faamasino ae faatali mai fafo.

 

TALOSAGA A LE ITU TETE’E E SOLOFUA LE TAGI A LE MALO

 

O le mae’a ai ona folasia e le malo o a latou mau faamaonia tauala mai i le molimau a le tamaitai na aafia, na faila ai loa e Anderson se mau i luma o le Fa’amasinoga e solofua ai le tagi faasaga i le ua molia, ona e le o lava mau na folasia e le malo e lagolago ai le latou tagi.

 

Na faaalia e Anderson nisi o vaega o le molimau a le tamaitai na aafia, e le o manino mai ai tu’uaiga faasaga i le alii ua molia.

 

Na tete’e malosi le itu a le malo i le talosaga a le itu tete’e. Na taua e le tamaitai loia ia Soule’ e faapea, o le molimau a le tamaitai na aafia e pei ona ia faailoa ai mea na tutupu i totonu o lona potu i le po o le aso 4 o Mati o le tausaga nei, ua lava lea ma totoe e lagolago ai le tagi faasaga i le alii ua molia.

 

Na tallosaga Soule’ i le Faamasinoga e teena le talosaga a le itu tete’e.

 

I le mase’a ai o se malologa puupuu na iloilo ai e afioga i ali’i Fa’amasino mau faamaonia atoa ai ma faafinauga a loia, na saunoa ai loa Patea e faamanino le faaiuga a le Fa’amasinoga.

 

Saunoa Patea, ua manino i mau ua folasia e le malo, e leai se mau e faamaonia ai le moliga muamua, o le fai’aiga faamalosi lea ma se tamaitai e i lalo o le 16 tausaga le matua. Talu ai lea tulaga, ua solofua ai e le malo le moliaga muamua faasaga i le alii ua molia.

 

Ae mo le moliga 2, 3 ma le 4, e talitonu le Fa’amasinoga, o lo o i ai mau faamaonia e lagolago ai elemeni o le tulafono, e tusa ai o gaioiga sa faatino e le ua molia.

 

Ona o lea tulaga, na manatu ai le Fa’amasinoga, e taoto atu pea i le Vaega Iloilo iuga le faamaonia poo le le faamaonia foi o le moliga 2, 3 ma le 4.