Ads by Google Ads by Google

Amata tufatufa siaki o le “Advance Child Tax Credit” i le masina o Setema

ausage@samoanews.com

Afai ae pasia e le Fono Faitulafono ma sainia e le Kovana le Pili a le Faigamalo a Lemanu ma Talauega, lea e aiaia ai le siitia o siaki o lafoga e maua mai mo tamaiti e tusa ai ma le Tulafono o Fuafuaga Lavea’i o le 2021 a le Malo Tele o Amerika, ua i ai le fuafuaga a le Ofisa o Lafoga a le malo o Amerika Samoa, o le vaiaso mulimuli o le masina fou o Setema e amata tufatufa ai siaki mo tagata faila lafoga i totonu o Amerika Samoa.

 

O le saunoaga lea mai le Pule Sili o le Ofisa o Lafoga a le malo, susuga Vaai Poufa ina ua molimau i luma o le Komiti o le Sailiga o le Tamaoaiga o le malo a le Maota o Sui i le vaiaso nei e tusa ai o le Tulafono taufaaofi a le faigamalo na tuuina mai i luma o le Fono Faitulafono i le vaiaso na te’a nei.

 

E tofu lava le Maota o Sui ma le Senate ma kopi o lea tulafono, lea fo’i e faagasolo ai lava iloiloga ma galuega suesue a Komiti a Maota e 2.

 

O le susuga a Vaai ma le Sui Faatonusili o le Ofisa o le Tupe ia Ms. Levi Reese na fai ma sui o le malo e molimau i luma o le Maota o Sui mo lenei tulafono taufaaofi. O le afioga i le Taitaifono o le Komiti ia Lavea Fatulegaee Palepoi Mauga na taitaia le iloiloga, ma sa auai fo’i le to’atele o afioga i Faipule e aofia ai ma le Sui Fofoga Fetalai ia Fetu Fetui Jr.

 

Ina ua fesiligia e le Komiti susuga i molimau i so la finagalo e faatatau i lenei tulafono, na saunoa ai loa le susuga a Vaai e faamanino le mafua’aga o le Tulafono Taufaaofi. 

 

Saunoa Vaai e faapea, o le Tulafono Taufaaofi na afua mai ina ua manatu le Faigamalo e faia ni suiga fou i le Tulafono o Lafoga mo faamanuiaga tau tupe e maua e fanau mai tagata faila lafoga a le atunu’u, ona o se suiga fou na pasia e le Konekeresi ma sainia e le afioga i le alii peresetene o le malo tele o Amerika ia Joe Biden, lea fo’i ua agava’a ai ma Amerika Samoa.

 

O ia suiga e moomia ai le sui o le Tulafono e Faila ai Lafoga i le atunuu, suia mai i le Tulafono o le 2000 i le Tulafono o le 2021, ma mafai ai loa ona agavaa tagata faila lafoga i se faamanuiaga tau tupe e silia i le $400 miliona lea ua mae’a ona faamatu’u mai e le malo tele o Amerika, tauala mai i le Ofisa o Lafoga a le Feterale, le IRS.

 

Na faamanino e le susuga a Vaai e faapea, ua mae’a ona tau aao mai e le Matagaluega o Tupe a le malo tele o Amerika le vaega tupe e agava’a ai Amerika Samoa, peita’i o le mafua’aga ua tuai ai ona tufatufa lea vaega tupe, e tatau ona pasia muamua suiga o le Tulafono e faila ai le lafoga.

 

Mo se faataitaiga e pei ona saunoa Vaai, o faamanuiaga tau tupe lea ua faamatuu mai ma ua agavaa ai i Amerika Samoa, e aofia ai le $3,000 mo le tausaga e tasi, tusa lea e ta’i $300 i le masina e tasi, e maua e fanau e 6 tausaga ma oo atu i le 17 tausaga, ma le faamanuiaga tupe e $3,600 i le tausaga, tusa lea o le $350 i le masina e tasi, e maua e fanau e i lalo o le ta’i 6 tausaga le matutua.

 

Na faamanino atili e le susuga a Vaai i le Komiti e faapea, e le tutusa le auala e tufatufa ai e Amerika Samoa siaki mo tagata faila lafoga, ma le auala o loo tufatufa ai e le malo tele o Amerika siaki mo a latou tagata faila lafoga.

 

O Amerika e ta’i masina lava ma maua le siaki a le tamaitiiti, ae o Amerika Samoa e tusa ai o le fuafuaga lea ua mae’a ona Faataoto e le Ofisa o le Lafoga ma le Matagaluega o Tupe, e faafa (4) ona maua le siaki a le tamaitiiti. E faalua (2) i le tausaga lenei ma le isi fo’i faalua (2) i le tausaga fou 2022.

 

Mo se faataitaiga, afai o le tamaitiiti lea e $3,000 lana siaki e maua i le tausaga, ua i ai le fuafuaga a le malo e vaevae le siaki lea i vaega e fa, ona maua ai lea o le ta’i $750 i le siaki e tasi. 

 

O le siaki muamua la lea e maua i le vaiaso mulimuli o le masina fou o Setema, o le a maua ai e le tamaitiiti lea e toatasi lana siaki muamua e $750, ona toe maua fo’i lea o le isi ana siaki lona 2 e $750 i le masina o Tesema ao le’i oo i le Kerisimasi.

 

O isi siaki e 2 o loo totoe ai e ta’i $750, faatoa tufatufa atu i le tausaga fou 2021, i le va o le masina o Ianuari e oo atu i le masina o Iuni, lea e faatulaga mai e faamuta ai le aoga o le polokalame. 

 

Na fautua le afioga i le ali’i Faipule ia Vailoata E. Amituana’i i le susuga a Vaai, ina ia silasila toto’a lona Ofisa i le faafitauli lea o loo maitauina pea le tupu soo i soo se tausaga e faila ai lafoga, o le faila lea e le isi tagata faila lafoga o le fanau a le isi tagata. O lea faafitauli e pei ona saunoa Vailoata, e le tatau ona faaauauina ma ua tatau fo’i ona taofia ona e le amiotonu.

 

Mo fanau laiti ma lava na atoa le latou ta’i 18 tausaga i le tausaga lenei 2021, na faamanino e le susuga a Vaai, e le agava’a i latou i lalo o le polokalame fou lenei. 

 

Na talosaga sui o le Komiti o Sui i le Faatonusili o le Ofisa o Lafoga, pe maua se avanoa o nai fanau na fananau i fafo ae o le olaga atoa na ala a’e ai iinei ma aoga ai, ae o le faafitauli e le o i ai se numera saogalemu. Na fia malamalama afioga i Faipule pe maua se avanoa e agavaa ai nai alo ma fanau nei.

 

Na faamaino e le susuga a Vaai tulaga faigata o le polokalame, ona e mulimulita’i lava lona Ofisa i ta’iala ua mae’a ona faataoto mai e le Ofisa o Lafofa a le malo tele e ao ona latou usita’i ma mulimuli i ai - e na o fanau lava e i ai le saogalemu e agava’a i le polokalame 

 

Saunoa atili Vaai e faapea, e le faigofie le tulaga e pei ona fesiligia e nisi o sui o le Komiti, ona o le isi lea mataupu o loo latou finauina pea ma le Ofisa o Lafoga a le malo tele, ina ua amata ona sasa’a mai faamanuiaga tau tupe nei mai le malo tele mo Amerika Samoa.

 

Na fesili le Sui Fofoga Fetalai ia Fetu poo fea tonu masina o le tausaga fou e tufatufa ai siaki a tagata fai lafoga o loo totoe, ae na saunoa Vaai, e fuafua lava i le taimi e faila ai lafoga a tagata.

 

E pei ona taua i le gagana o lenei Tulafono Tau faaofi e faapea, o le masina o Mati 11, 2021 na pasia ai e le Konekeresi se tulafono e aiaia ai faamanuiaga tau tupe eseese e fesoasoani ai i tagata taitoatasi e aofia ai aiga, pisinisi na aafia ona o le faama’i pipisi o le KOVITI-19.

 

O se vaega o le Tulafono lea na pasia e le Konekeresi, o loo i ai lona ulutala e faapea, “Lafoga o le Faaleleia mo Tamaiti o le 2021”, o iina lea e auala mai ai faamanuiaga tau tupe lea ua faamanuiaina atu ai ma Amerika Samoa.

 

E manino le Tulafono a le malo tele na pasia, e agavaa Amerika Samoa pe afai e i ai sana fuafuaga e sui lana tulafono o Lafoga o loo i ai, aga’i i le Tulafono o Lafoga o le 201 na pasia e le Konekeresi.

 

O le aso ananafi na pasia ai e le Maota o Sui lenei Tulafono Taufaaofi i lona faitauga faalua, ma ua faamoemoe o le taeao nei e tuuina atu ai loa lenei tulafono i lona faitauga faatolu.