Pago Pago - AMERIKA SAMOA

O le aso ananafi sa fa’atulaga e tatala aloaia ai le a’oa’oga fa’apitoa a le malo o Amerika Samoa mo le tofia o le pule i le ola, ma sa valaauina ai e le afioga i le ali’i kovana ia Lemanu P.S Mauga sui o le kapeneta mo le auai atu i le Gov. Rex Lee Auditorium i le sauniga. 

“O le a’afiaga leaga o le pule i le ola ua toe taia ai le tatou Teritori,” o le tusi lea a Lemanu i se fa’amaumauga ia Setema 15 i fa’atonusili o le kapeneta. "I le avea ai ma taʻitaʻi, e tatau ona tatou faia se tulaga faʻapitoa i le atinaʻeina ma le faʻatinoina o fuafuaga faʻapitoa e faʻatatau i le puipuia mo le taofia o le pule i le ola.”

“O le tatou sini autu o le faʻaitiitia lelei o le aʻafiaga o le pule i le ola e ala i le faʻaaogaina o se aʻoaʻoga faʻalauiloa a le malo i le pule i le ola e faʻatatau i tulaga lamatia ma gaioiga e tali atu ai i le pule i le ola," o le faʻamatalaga lea a le kovana.

“E ono mafai ona ausia la tatou sini pe afai tatou te auai malosi i taumafaiga mo le puipuia o le pule i le ola. O le mea lea, e amata ia i tatou, ”o lana tala lea.

I le avea ai ma sui o le afioga ile lutena kovana Talauega Eleasalo Ale, na talosagaina ai e le ali’i kovana sui o le kapeneta mo tagata uma ina ia “aufaatasi le malosi e foia ai lenei mataupu taua ma galulue i le fausiaina o se nuu saogalemu mo tagata uma”.

“O lou auai o le a avea lea ma fa’aaliga malosi i le atunu’u, o lo tatou naunau ma le fa’amaoni i le fa’afoeina o lenei fa’afitauli ma le matua’i mamafa,” o le saunoaga lea a le ali’i kovana i sui o le kapeneta.

O le aoauli o le aso Tofi na te’a nei na faia ai se fonotaga a le kapeneta i le potu fono a le Ofisa o le Kovana e tusa ai o aoaoga.

O fa'amaumauga i le aofa'i o mataupu pule i le ola mo le 2022 e le'i maua i le taimi o fa'asalalau, ae o lo'o fa'amoemoe sa fa'asoa i le taimi so a'oa'oga fa'atasi ai ma isi fa'amatalaga talafeagai.

Peita’i, o fa’amaumauga na lipotia e le LBJ Medical Center’s Health Information Management Department e uiga i le mafuaaga o le maliu - ma o lo o aofia i le American Samoa Statistical 2021 Yearbook - ua faaalia ai le 7 mataupu o le pule i le ola i le tausaga 2021. O le numera maualuga o mataupu pule i le ola na lipotia e le LBJ i le va o le 2021 ma le 2010 e sefulutasi mataupu.

Sa faalauiloa aloaia e le Matagaluega o le Soifua Maloloina faatasi ai ma le ASG i le 2021 le “988 Helpline”, o le Laina Fesoasoani mo le Puipuiga o le Pulea o le ola i Amerika Samoa ma le Soifua Maloloina o Mafaufau.

O le taeao o le Aso Faraile na te’a nei na tutula’i ai tamaiti aoga ma le aufaigaluega a le Aoga Maualuga a Samoana mo le talotaloga, mo le taofia o le pule i le ola. Sa faia ai foi i lea aso aoaoga fa’apitoa mo Samoana i lenei mataupu taua.

Mo le fesoasoani e taofia le pule i le ola, "Valaau 988, aapa atu".