Pago Pago - AMERIKA SAMOA

I tauaofiaga a le Maota o le Senate i le aso Gafua na se’i mavae atu, sa faapea ona fesiligia a e le Peresetene o le Senate, le Afioga i le alii Senatoa ia Tuaolo Manaia Fruean, ia le tulaga i Faatonusili mo ofisa o lo’o i lalo ole va’ava’aiga a le Ofisa o Leoleo po o Matagaluega Tuto’atasi.

Na ia fesiligia ai le Afioga i le Senatoa ia Togiola T.A. Tulafono, le Taitaifono o le Komiti o le Faagaioiga o le Malo, ona o tulaga ua masani ai i tausaga ua mavae atu, lea sa masani ona fa’ao’o mai ai suafa o Faatonusili mo le Ofisa o le ‘Criminal Justice’ faapea le Ofisa e pulea meatotino a le malo, i le Fono, e pasia.

Sa faamamafaina foi e Tuaolo ia le pasiaina e le Fono o le $6 miliona mo le Tausaga Tupe 2025 mo le polokalama a le Medicaid, o si’iga gasegase i atunu’u i fafo.  Na saunoa ai Tuaolo, i sona talitonuga, e le sa’o le pasiaina e le Fono o le faitau miliona o tupe a le malo mo le Medicaid, ae e le o iai so latou leo i le filifiliga o le tagata e ta’ita’iina lea ofisa.

E le gata i lea, e pei ona ta’ua e Tuaolo, e $10 miliona lea ua maua e le ofisa a le ‘Criminal Justice’ mai i le ARPA.  Ma ua taofi le Peresetene o le Senate, e ui ina e molimau ia Faatonu o nei ofisa i a latou paketi, ae e le o pasiaina i latou e le Fono.

Na fa’ailoa atu e Tuaolo ia Togiola le lagolagoina e le loia a le kovana, ia le manatu a le Fono, e tatau ona iloiloina ma pasiaina e le Maota Fono ia Faatonusili o ia ofisa ma ia fa’amamafaina ai foi e faapea, o le tiute lea a le Kovana ia mulimulita’i i lea tulaga.

Sa fa’amanino mai e le Afioga Togiola e faapea, o Faatonusili uma o ofisa ma matagaluega a le malo, e tatau ona pasia e le Maota Fono.  Ma na ia faamanino mai ai foi e faapea, o lea tulaga ua mae’a ona fa’atulafonoina.

Na saunoa Togiola, talu mai lava le nofoaiga a le Kovana, le afioga ia A.P. Lutali, na fa’ao’oina mai suafa o Faatonu a le Ofisa mo le Puipuiga o le Siosiomaga (ASEPA), o le Ofisa o le Enetia (TEO) ma le Ofisa a le OPAD (Office for the Protection and Advocacy for the Disabled), i luma o le Maota Fono mo le pasiaina.

Ma na ta’ua e Togiola, o lea tulaga na faia lava i taimi o isi kovana tua mai, e o’o lava i lona vaitaimi a’o avea o ia ma kovana.

Sa fautuaina ai e Togiola ia le Peresetene o le Senate, ina ia ave se tusi aloaia e fesiligia ai pe aisea ua le fa’ao’oina atu suafa o Faatonu o ofisa nei, e iloiloina e le Maota Fono.

TALA’AGA

O le Ofisa o le Kovana, o lo’o fa’amalumalu ai nisi o ofisa ma matagaluega, e aofia ai le Ofisa a le Medicaid, o le Ofisa e gafa ma le Faasaoina o Tala Faasolopito a Amerika Samoa (ASHPO), o le Ofisa a Fitafita Tuai, o le Ofisa a le Vocational Rehabilitation, o le Ofisa o Tulaga Faapolokiki, Iloiloga Faavae ma Feutagaiga ma le malo Feterale, faapea ma le Ofisa e mataituina le Suau’u ma Fesoasoani mo Faalavelave Faafuasei ma isi ofisa.