Ads by Google Ads by Google

Auai Peresetene Gymnastics Association A.S - Konekeresi i Azerbaijan


Peresetene o le Asosi Gymnastics i Amerika Samoa na malaga mamao lava i Sasa'e Tutotonu mo le Konekeresi FIG i le lalolagi na usuia i Azerbaijan, Doha Qatar ia Tesema 1 - 3, 2018. [Ata: Leua Aiono Frost]

Ua toe taliu mai le tama'ita'i Peresetene o le Ta'aloga Tatafiti po'o le Gymnastics i Amerika Samoa, sa totogia mai lona pasese mai le Ofisa autu o le Ta'aoga Gymnastics i le Lalolagi atoa i Geneva, e malaga atu e fai fo'i se sao o le tatou Peresetene i le palotaina o tofiga fou mo le isi lua tausaga a lea fo'i Asosi Gymnastics i le Lalolagi. O lea fonotaga e fa'aigoaina o le Konekeresi a le FIG po'o le Federation of International Gymnastics.

 

O le tama'ita'i Peresetene Leilani Tu'amoheloa - Tilo sa malaga mo lea fa'amoemoe, ma sa faia lea fonotaga taua i le a'ai o Azerbaijan i Doha, Qatar i sasae tutotonu. O lea nu'u o Qatar o ona malo tuaoi atu i ai o Iran, Iraq, Rusia ma Georgia State o Amerika.

 

Peita'i e le'i malaga le tama'ita'i peresetene o le fa'agatama lea e uia atu Georgia, ae ua malaga e uia atu Samoa, Niu Sila, sa'o loa i Doha Qatar mo le 17 itula o lea malaga i Sasa'e Tutotonu, ma fa'ato'a toe oso ai i le va'alele mo le a'ai o Azerbaijan.

 

O le tala mai o le faigamalaga na tele lu'iga ma sa misia le malaga na tatau ona tu'ua ai e ia Niu Sila, ona e faia fo'i le visa e malaga ai i Doha Qatar, e ao ina talosaga i luga o laina feso'ota'i a le Initeneti ma e totogia fo'i i le $20US lena visa.

 

Talosaga le visa ma toe faaauau ai le malaga, ma na maua atu lava le fonotaga, e ui ina o le sui fo'i o Amerika Samoa le sui usufono na mulimuli lava to'ai taunu'u.

 

"O se a'ai tele ma e matele na'ua nei atunu'u i le fa'aleleiga o latou faleta'alo tetele mo lea fo'i fa'agatama. Ua va'aia ai fo'i, e le o faigofie le ala i le mae'a fa'atuina o se faleta'alo mo le Gymnastics i le tatou atunu'u, ae le fa'apea ai e faia'ina ai le naunau ina ia fa'atino lea fa'amoemoe." O se tala lea a le tama'ita'i usufono a Amerika Samoa, ma sa mafaia fo'i ona palota o ia i le suigatofi, ma isi mataupu uma sa talanoaina ma palotaina.

 

"I le fonotaga e matua matutua lava nisi o sui usufono, aua o peresetene uma nei o le Gymanstics a latou atunu'u o lo'o latou galulue ma alaalatai ai. Lona lua, o le tele o malo uma o le lalolagi sa tofu sui i lenei fonotaga e fai se leo ma se sao o latou asosi gymnastics i le Konekeresi o lenei lua tausaga." O se tala fiafia lenei a lea tama'ita'i ma sa ia fa'ailoa fo'i, ua mautu le tele o nofoaga uma e fa'atautaia ai lea fa'agatama i malo o nei sui usufono, peita'i, sa ia talanoa i nisi o sui iloga ma ia fa'ailoa patino lava, e tele le mana'omia o le Gymnastics Association i le Malo o Amerika Samoa.

 

"O le to'atele o nei sui o tama'ita'i ma tama fo'i, o lo ua aumai ia te a'u ala o latou feso'ota'iga ma i latou, ina ia mafai ona ou tusi fa'ailoa atu ia i latou, mea o lo'o mana'omia ai le fesoasoani mai a i latou i Amerika Samoa. Lona lua ua fa'ailoa mai, e mafai ona o mai ni a latou 'au ta'a'alo e fa'atauva ma sui o le tatou Asosi Gymnastics iinei, ina ia fa'aleleia atili ai le tomai i lea fo'i fa'agatama." O se tala fiafia lea a Leilani Tu'amoheloa - Tilo i lana malaga.

 

O le tatou lea Asosi Gymnastics o lo'o i lalo o le fa'amalumaluga a le Asosi Gymnastics a le Malo o Ausetalia, peita'i ua mae'a fa'atulaga e fai le palota a le tatou sui usufono. O i tatou ma Samoa, Tonga, Fiti ma le Atu Kuki e aofia fa'atasi uma i lalo o le Oceania lea e va'aia e Ausetalia.

 

Na malaga atu fo'i la le sui o i Atu Kuki mo lea fonotaga, peita'i e le'i va'aia lava se sui mai le Malo Tuto'atasi o Samoa.

 

O mataupu sa talanoaina e aofia ai aiaiga uma tau le fa'atuina lelei o Asosi Gymnastics i so'o se atunu'u o le lalolagi. E ao ina usita'ia uma nei aiaiga, pe o le safa o le Asosi i suesuega e toe fa'asolofua ai le latou asosi. O lo ua fa'atulaga fo'i isi mataupu uma e aoga i le silafia a peresetene ma laulau uma i le fa'atautaiga o ta'amilosaga fa'atulaga fa'avaomalo ma ta'amilosaga lava latou e fa'atautaia e le Asosi mo le sailiga o latou tama ma teine ta'a'alo lelei ma le agava'a e fa'atauva fa'avaomalo.

 

E ui ina atoa lelei le lua o aso o fono le tama'ita'i peresetene lea, ae o le tele o lona taimi o le fa'amasani atu lea i sui eseese ua ia fetaui i ai, ma fetufa'i i ala e fa'aleleia atili ai le taumafaiga e faatula'i se Asosi Malosi a le Gymnastic i Amerika Samoa.

 

I le taimi nei o le Peresetene Leilani Tu'amoheloa - Tilo i le laulauatofi a lea Fa'agatama; Failautusi ai Zena Iese ae o lo'o avanoa nei le Teutupe ma le sui Peresetene o le a filifilia se tasi e agavaa ai  le faaiuga o le vaiaso a sau.