I le fonotaga fa’apitoa a Kovana Lolo Moliga ma le vasega o Fa’afeagaiga mai Ekalesia eseese i le atunuu ile aso Lulu o le vaiaso ua te’a, na matua aigani ai le ta’ita’i o le tatou Malo i le vasega o Faife’au uma, “Ua mana’omia e le malo la outou fesoasoani ona ua matua faigata le tulaga o le tagofia e tagata lautele ma ua oo lava i fanau talavou, le aisa ma le marijuana, ua tagofia fo’i le pia ma le sikaleti. O mea ua fa’aaoga le tatau i ai le tupe e tausi ai aiga.”

O se taumafaiga lea a le ta’ita’i ina ia mafai ona soloia lea fa’afitauli tele ua alia’i mai i totonu o afio’aga ta’itasi, ae o se isi lea vaega o le olaga o tupulaga ma aiga ua mafai fo’i ona oo i ai se fesaosoani malosi a faife’au fa’anofonuu i totonu o afio’aga ta’itasi.

I le sauniga lotu fa’apitoa fo’i a le afio’aga o Pago Pago na tula’i ai le fa’atama o le afioaga, le afioga le Ma’oputasi ma ia saunoa e toe fa’amanatu i faife’au uma i le afio’aga lea talosaga na fofogaina e Kovana Lolo Moliga i le latou fonotaga fonotaga ma i latou i lena aso. “Ua ou fa’alauiloa atu nei fo’i ma toe fa’amanatu atu i le vasega o fanau talavou, fanau fo’i ua fai aiga ma ua fa’alagolago ia i latou le latou lotoifale ina ia tausia lelei ma ia puipuimalu mai i nei fa’afitauli matuia, ia taofia nei loa le toe alia’i o le igoa o Pago Pago i nei ituaiga o fa’aletonu. Ua outou silafia lelei tulafono a le nu’u e tusa o le tagata e toe molia ma fa’amaonia o fuala’au fa’asaina ma vaila’au oona. E le toe alo ai le saofaiga a le tatou nuu i le fa’aoo atu o lea fa’asalaga pe afai ae maua ai se tasi o outou i na moliga tau solitulafono ua taogifia pe auai i fa’atauga o fuala’au fa’asaina ma so’o se ituaiga o vaila’au fa’asaina.”

I le lauga fo’i a le fa’afeagaiga tofia mo le Upu i lea sauniga mamalu, sa ia matua fa’ailoa mai lea fo’i fa’amoemoe maualuga, ia le toe tagofia e so’o se tama, tina ma fanau talavou i le afio’aga fuala’au fa’asaina ma vaila’au oona. “Poo a lava fo’i le sasa atu e le faifeau o la ituaiga o fa’afitauli, ma o se agasala lou so’ona fai o lou tino, o le malu o le Atua ua ia saunia e vi’ia o ia, ae ua e loto ane lava oe e fai ona ua lava le fa’asoa o le tupe, pe ua e le kea i se mea o lenei olaga, ae ua e manatu i lou tuinanaau e faamalie, ae i ai le aso e fa’amasinoina ai lau sala e le Atua ma e tali ai i lona fa’alogogata ma le le usiusita’i. E mautinoa le mea lena pe afai e te le au salamo ma fa’alelei le lua feagaiga ma lou Atua.”

I le fonotaga lava lea ma Faife’au o Ekalesia eseese i le teritori, ua fa’ailoa atu ai e Lolo, “Ua oo le fa’atauga ma le fa’aaogaina o nei vaila’au oona i totonu o aoga. O tagata foi leai se lagona e tasi o lo’o latou fa’aaogaina nei mea, ua maoga a’e o i latou nei ua faia lea matata.”

“O outou o lo’o i ai pea le sootaga ma tagata uma o le afio’aga, e fa’aaloalogia e le lautele o afio’aga outou, ma faigata i le pulega a afioaga ta’itasi lenei fa’afitauli, ma ua sulufa’i atu ai ia te outou ina ia talosia nei fa’afitauli ma lauga mai i luga o pulela’a ia oo i agaga o le fanau talavou ma tama o aiga ta’itasi, o le agasala lou so’ona fa’aleaga o le malumalu o le Atua, o lou tino lea.”

Ua fa’ailoa fo’i e Lolo, “Ua galulue malosi le malo ina ia fa’afoia lea fa’afitauli i nuu tetele e i ai Leone, Nuuuli ma Pago Pago, ae ua iloga mai ua maua mai i nuu laiti le umia ma le fa’aaoga o vaila’au oona ma fuala’au fa’asaina. Leai se manatu o le a  maua le ‘aisa i Ofu, Manu’a, sa i ai lava taofi, o lo’o saogalemu Manu’a i lea tulaga.”

Ua ia saunoa e tusa o ala ua oo mai ai le “aisa ma le coccaine” i le atunuu, “Ua aumaia i meli ma isi ala e aofia ai va’a fagota, va’alele ma va’a la’u oloa, lea ua tapunia nei fa’asolo atoa va’alele ma va’a la’u pasese, ua t atau ona fa’aitiitia le fa’aletonu, peitai ua fa’ateteleina, o lona uiga o lo’o sao mai lava pea lea tele o le aisa i le atunuu.”

Peitai o le mea mautinoa lava, e sau lava le ‘aisa i le faleoti, aua o le tui o loo tuia ai tagata oti ina ia fa’aumiumi o latou tino e tatalia ai le taimi e lagomau ai pelega a aiga, o le ‘aisa 100% lea. O lo ua i ai faletalavai, ua mafai ona umia latou laisene e aumaia ai lena ituaiga o vaila’au o’ona i le atunuu. O faetalavai ua i ai i le atunuu, o loo laisenea i lea Falema’i i Faga’alu ma le faipisinisi ua i ai nei. O lona uiga i atunuu uma o loo ua i ai fale maliu, o lea lava o lo’o oka mai ai le ‘aisa mama mo lea tautua.

Ua i ai le masalosaloga o le taitai o le atunuu, e tauau ua mae’a ona gaosia lava le ‘aisa iinei e nisi ua silafia vaila’au e tu’ufa’atasia ona maua lea o le ‘aisa e fa’aaogaina. O se tasi lea o ala ua mafua ai ona fa’ateteleina lea fa’afitauli, ae le fa’aititia.