Ads by Google Ads by Google

Autu galuega tima’i mo le aso fa’ataua HIV/AIDS - IA AUTASI

Pago Pago - AMERIKA SAMOA

 

O le aso lenei, Tesema 01, 2022, ua fa’atulagaina i le lalolagi o le Aso e Fa’ataua ai togafitiga, lapata’iga ma galuega tima’i mo le mamalu lautele e fa’atatau i le Ma’i faigata o le HIV AIDS i le lalolagi.

 

Ua le ‘auese foi le Iunaite Setete i lea tulaga ma ua matua tima’i mai le PEPFAR, poo le Komiti Fa’afoe mo Galuega Fa’ataoto a le Peresetene o Amerika Fa’asagatau i le AIDS, “Ia autasia tagata uma o le Iuaite Setete i galuega timai, galuega saili togafiti, galuega e puipui mai ai le mamalu lautele mai le a’afia i le HIV/AIDS.”

 

Ua le muta ai i tulimanu uma o le Iunaite Setete lenei fe’au taua, ae ua fa’asalafa atu mo atunuu uma e sili ma le 50 o le lalolagi atoa o lo ua soofa’atasi i lenei fa’amoemoe lelei, ina ia tutu fa’atasi e tete’e i le fa’aauau ona a’afia o latou tagatanuu i le HIV/AIDS.

 

I totonu o le Iunaite Setete ua fa’ailoa i fa’amaumauga a le PEPFAR, ua atoa le 37.7 miliona tagata ua soifua ma le ma’i o le HIV/AIDS ma e to’atele ua i ai i totonu o le Iunaite Setete mo togafitiga, ua soifua lava i latou, faia togafitiga, ae le toe mafai ona mama mai lea ma’i tiga.

 

O Tesema 01, 2022 lea fo’i ua toe aulia ai le isi aso fa’ailoga mo le tete’e atu i l HIV/AIDS i le lalolagi atoa. Ia fa’aaoga tatau e te nofo ai oe le tagata soifua ma toe manatu ia tausisia lapata’iga uma i mea e ao ina puipuia mai ai oe mai le a’afia i lenei gasegase tiga ma le mata’utia.

 

O a uma fo’i tautua o loo fa’atutu ina ia fa’alauiloa ai auga o lenei fa’ama’i, foliga va’aia e iloga ma masalomia ai ua e maua i lenei gasegase, fa’atasi ai ma galuega uma e ao ina fa’atino e puipuia mai ai le oo atu ina a’afia i lenei gasegase faigata, ua fa’aautu uma itaumafaiga e fa’atino i lea aso fa’apitoa mo le HIV/AIDS i lenei fo’i tausaga.

 

I Amerika Samoa, o se vaega o le atunuu o lo o aofia ai faifeau, faiaoga, soifua maloloina, tina, tama ma vaega eseese o itupa, o loo galulue faatasi ma le Matagaluega o le Soifua Maloloina ma le falema’i o le LBJ, i le unaia o le faalauiloaina o le HIV/AIDS ma fesoasoani e taofia le salalau atu.

 

O lea komiti, o lo’o ta’ita’ifono ai Father Kelemete Puaauli, o lo’o faia pea a latou polokalama e fa’ailoa i le atunu’u lenei fa’ama’i, ma talosaga i le atunu’u e saiki pe o maua i le HIV/AIDS.