AVE LE FAAMUAMUA A LE PALEMIA SAMOA I LE SOIFUA MALOLOINA MA A’OA’OGA
Apia - SAMOA
Ua toe faamamafa mai e le Palemia o Samoa, le Afioga Fiame Naomi Mataafa, i le taimi nei, e le o faamuamua e le malo se manatu e toe faatau se vaalele a Samoa.
I sana saunoaga i totonu o le Palemene i le Aso Lulu na se’i mavae atu, sa saunoa ai Fiame - o ia foi o lo’o avea ma Minisita o Turisi a Samoa (S.T.A), sa ia faaleoina ai talanoaga e tusa ai ma penefiti e maua mai i le iai o se vaalele a le malo, aemaise le atina’eina o Turisi faapea ma le pa’u o pasese.
O saunoaga a Fiame o lo’o mulimuli mai i se felafolafoaiga i le ripoti a le Komiti tau Tamaoaiga e faatatau i le ripoti faaletausaga a le Ofisa o Turisi, mo le Tausaga 2022/2023.
O le Taitaifono a le Komiti ia Laura’s Salafai Purcell sa na ia folasia le ripoti, ma na aofia ai ma se fautuaga mo le faatauina o seisi vaalele a le taunuu. E toatele sui o le Palemene sa faaalia lo latou lagolagoina o lenei fuafuaga ma o latou faaalia ai se manatu i le pa’u o pasese mo le mamalu lautele pe a iai se vaalele a le taunuu.
Ae peitai, sa saunoa Fiame, e ui i le aoga o lenei fuafuaga ae sa ia faamamafaina le tumau pea o lenei mataupu i lalo o Koloa a le Komiti Faapitoa a le Kapeneta ma le Komiti Faafoe a le Samoa Airways.
Sa ta’ua e le tamaitai palemia e faapea, e le o se mataupu fou lenei mataupu ae e tatau ona faamautuina le mafai ona faatupeina e le malo o lenei Faamoemoe.
Sa saunoa foi Fiame, e le faapea e iai loa se vaalele ona faapea lea o le a taugofie pasese. E ui ina mafai ona fesoasoani le malo i le pa’u o pasese, ae e faafaigata le tausiga ma le mataituina o se vaalele.
E le gata, na saunoa Fiame le tatau ona iloilo lelei e le malo ia tulaga e ao ona ave iai le latou faamuamua i tulaga o alagamanuia. Mo se faataitaiga, afai ua soalaupuleina le faatauina o se vaalele, e tatau ona fesili ifo le malo pe o tagata uma o Samoa o lo o fia faimalaga.
A tagai i ni isi mataupu, o lo o manaomia ona fa’aauau ona atina’e ia tulaga tau a’oa’oga mo fanau, ma faamalosia tulaga o auaunaga tau i le soifua maloloina.
Sa ia faamamafaina le tatau ona toe iloiloina nei mataupu taua mo le atunuu.
E ui i nei atugaluga, ae na aloaia e Fiame le taua o manatu faaalia, e ala i sui e to’a 10 o le Palemene lea na faaalia o latou manatu ma fautuaga i auala e mafai ona faalelei ai tulaga o Turisi.
Ma na saunoa Fiame, o le a fa’aauau pea ona o latou iloiloina auala e mafai ona faaleleia atili ai lenei auaunaga. Ma sa faamaonia mai foi e le Minisita o le Samoa Airways is Leatinu’u Wayne So’oialo, le saunia o le tala o le tupe mo le vaalele a le malo mai i le 2023/2024, e tuuina atu i luma o le Palemene.
O lea ripoti, e pei ona ta’ua e Leatinu’u, o le a mafai ona maua ai se ata manino pe mafai ona faatauina se vaalele fou a le atunuu.