Vaega e 03

Taeao Manuia. Taeao Totoa, i le mamalu o le tatou aufaitau nusipepa I lenei taeao fou. Tatou te tau fai sii le Viiga ma le Faamanu i le Silisili Ese, i Lana tausiga alofa ma Lana tausiga mamana, ia i tatou uma, ua mafai ai ona o tatou toe fesilafai i luma o nuu, ae le o tua o nuu, i lenei taeao fou. E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapaau i le Lagi.

Ae sagai mai loa mo le fa’aauauina o le tatou Fagogo, “O LE AVE PASI A’OGA”  i lona vaega e 03.

*******************************************

Sa fa’agataina le tatou Fagogo i le vaiaso ua mavae, ina ua fa’asaga atu le teineititi a’oga o Susana ma su’esu’e ia le alii ave pasi a’oga, o Paulo, ina ua toeititi lava a lavea le latou pasi.

Aua o la lava e ave le pasi a le alii o Paulo, ae ua amata lava ona pogisa ona mafaufauga ona o le pagatia o lona olaga ua iai, talu lava ona ia tagofia ia fualaau faasaina.  Ma atonu ua lagona e le teineititi o Susana ia le tulaga mafatia o le loto o le alii ave pasi a’oga.

Ma ua o’o nei le su’esu’ega a le teineititi o Susana i le olaga faaipoipo a le alii ave pasi a’oga o Paulo.

“A lua tete’a ma lou to’alua?” o le fesili lea a le teineititi a’oga o Susana.  “O o’u matua fo’i, ua fuafua e tete’a.  Ae ua tu’u mai ia te a’u ou te filifili po o le fea o o’u matua, ou te fia nofo ai.”

“Talofae,” o le tala lea a le alii ave pasi o Paulo.  “Ua fai sina leva ona o ma tete’a ma lo’u to’alua ae e leai se ma fanau.  Atonu o se mea lelei lea mea, aua atonu e avea a’u ma se tama lelei.”

Ua taunu’u le faigamalaga a le pasi ma ua paka nei le pasi e Paulo.

Ua savali atu le teineititi o Susana, e alu i lalo ma le pasi, ae toe liliu mai ma faapea mai i le alii ave pasi, “Ou te le talitonu i lau tala.  Ou te iloa ana iai sau fanau, e latou te alolofa ma fiafia ia te oe.”

Sa ‘o’ono le fia tagi a le alii ave pasi o Paulo, se’ia o’o uma i lalo tamaiti aoga, ona maligi loa lea o ona loimata, ona o le tala a le teineititi o Susana.

Ma ua faapea ifo Paulo ia te ia lava, “E leai, ou te iloa ana iai sa’u fanau, e le fiafia foi ia te a’u, ona o a’u filifiliga ia o lo’o faia.”

[E FAIA PEA]