Vaega e 04

Taeao Manuia. Taeao Totoa, i le mamalu o le tatou aufaitau nusipepa i lenei taeao fou. Tatou te tau fai sii le Viiga ma le Faamanu i le Silisili Ese i Lana tausiga alofa ma Lana tausiga mamana, ia i tatou uma, ua mafai ai ona o tatou toe fesilafai i luma o nuu, ae le o tua o nuu, i lenei taeao fou. 

E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapaau i le Lagi.

Ae sagai mai loa mo le fa’aauauina  o le tatou Fagogo, “O LE AVE PASI A’OGA” i lona vaega e 04.

**************************************************

O lona igoa o Simeona.  E sau mai i se aiga e sili atu ona tulaga faaletonu, i lo le aiga a le alii ave pasi a’oga, o Paulo.

O Simeona, e fiafia tele e fa’amisa i luga o le pasi a’oga.  Ae na le amana’ia tele e Paulo, ona e le’i mana’o e pisa mai ni matua ia te ia.

I se tasi aoauli, ina o lo’o aga’i atu Paulo e fa’afo’i ia tamaiti a’oga i o latou aiga, ae ua tetele a’e lava Faiga a le alii o Simeona ma ua lelava foi ia Paulo. Sa fa’aafe loa e Paulo ia le pasi, i tua ma le auala ma savali atu i tua i le mea o saofa’i ai Simeona.

“Simeona, o le a lau mea lena e fai?” o le fesili atu lea iai a Paulo.

“Leai se mea.” O le tali mai lea a Simeona ma ata.

“Ae aisea le mea ua fetagisi ai teineiti ia?” o le toe fesili atu lea a Paulo.

“Sa tago i le tau’ai ma’ua i le polo,” o le oso mai lea a se tasi o teineititi o lo’o tagi.

“E moni le tala a Felise, alii Simeona?” o le fesili atu lea a Paulo.

“O le ta’aloga,” o le tali mai lea a Simeone.

“E te mana’o ou te vala’au i le pulea’oga?” o le toe fesili atu lea a Paulo ia Simeona.

“Sole, le a mea la’a vala’au ai fua le puleaoga?” o le tala tau le lagona a Simeona.

“E toe fa’atu loa le pasi ona o oe, ua valaau loa le pulea’oga.  Ma ou te iloa, afai ae sau le pulea’oga, o le a le fiafia ia oe.  Aua la ne’i o’u toe fa’alogo mai o fetagisi atu nisi ia oe.”

[E FAIA PEA]